Martha Telugu

Tag: Upcoming Cars India

  • టాటా హారియర్ ఈవీ లాంచ్ ఎప్పుడంటే?: ఫీచర్లు, రేంజ్ & మరిన్ని వివరాలు

    టాటా హారియర్ ఈవీ లాంచ్ ఎప్పుడంటే?: ఫీచర్లు, రేంజ్ & మరిన్ని వివరాలు

    Tata Harrier EV: భారతీయ ఎలక్ట్రిక్ వాహన రంగంలో అగ్రగామిగా కొనసాగుతున్న టాటా మోటార్స్, మరో శక్తివంతమైన కారును ఎలక్ట్రిక్ రూపంలో మార్కెట్లోకి తీసుకురావడానికి సన్నాహాలు చేస్తోంది. ఆసక్తిగా ఎదురుచూస్తున్న ఈ కొత్త ఎలక్ట్రిక్ కారు ‘హారియర్ ఈవీ’. తాజా సమాచారం ప్రకారం, ఈ వాహనాన్ని కంపెనీ 2025 జూన్ 3న అధికారికంగా విడుదల చేయనున్నట్లు తెలుస్తోంది.

    ఆవిష్కరణ మరియు కీలక వివరాలు

    టాటా మోటార్స్ ప్రతిష్టాత్మకంగా తీసుకురానున్న హారియర్ ఈవీ మొదటిసారిగా 2025 భారత్ మొబిలిటీ గ్లోబల్ ఎక్స్‌పోలో ప్రదర్శించబడింది. ఇది టాటా యొక్క నూతన యాక్టీ.ఈవీ ప్లస్ (Acti.ev Plus) ఆర్కిటెక్చర్‌పై నిర్మితమైంది. ఈ అధునాతన ప్లాట్‌ఫాం కారణంగా, హారియర్ ఈవీ ఒక పూర్తి ఛార్జ్‌పై 500 కిలోమీటర్లకు పైగా రేంజ్ అందిస్తుందని అంచనా. మార్కెట్లో ఇది మహీంద్రా ఎక్స్ఈవీ 9ఈ (Mahindra XUV9e) వంటి మోడళ్లకు గట్టి పోటీనిస్తుందని భావిస్తున్నారు.

    ఆకట్టుకునే డిజైన్‌

    విడుదలకు సిద్ధమవుతున్న కొత్త టాటా హారియర్ ఈవీ ఆకట్టుకునే డిజైన్‌తో, చూడగానే ఆకర్షించేలా ఉంటుంది. దీని హెడ్‌ల్యాంప్ మరియు డేటైమ్ రన్నింగ్ లైట్స్ (DRL) వంటివి చాలా ప్రత్యేకంగా, ఫ్యూచరిస్టిక్ లుక్‌తో రూపొందించబడ్డాయి. అప్‌డేటెడ్ గ్రిల్, కొత్త బంపర్ డిజైన్ ఈ ఎలక్ట్రిక్ వాహనానికి మరింత ఆకర్షణను జోడిస్తాయి. అలాగే, టర్బైన్ బ్లేడ్ స్టైల్ అల్లాయ్ వీల్స్ పొందుతుందని సమాచారం.

    ఇంటీరియర్ డిజైన్‌

    కేవలం బాహ్య రూపమే కాకుండా, హారియర్ ఈవీ ఇంటీరియర్ ఫీచర్లు కూడా వాహన వినియోగదారులకు సౌకర్యవంతమైన మరియు ఆధునిక అనుభూతిని అందించేలా ఉంటాయని తెలుస్తోంది. విశాలమైన క్యాబిన్, ప్రీమియం మెటీరియల్స్, మరియు లేటెస్ట్ టెక్నాలజీ ఫీచర్లు ఇందులో ఉండనున్నాయి.

    పనితీరు మరియు రేంజ్

    టాటా హారియర్ ఈవీ డ్యూయెల్ మోటార్ సెటప్‌తో వస్తుందని, ఇది క్వాడ్ వీల్ డ్రైవ్ (ఆల్-వీల్ డ్రైవ్) ఆప్షన్‌ను అందిస్తుందని అంచనా. ఈ పవర్‌ట్రైన్ సుమారు 500 న్యూటన్ మీటర్ల టార్క్ ఉత్పత్తి చేస్తుందని భావిస్తున్నారు, ఇది అద్భుతమైన యాక్సిలరేషన్ మరియు డ్రైవింగ్ అనుభవాన్ని అందిస్తుంది. ఈ కారును కంపెనీ ప్రత్యేకంగా ఎక్కువ రేంజ్ అందించేలా తీర్చిదిద్దుతోంది. వాస్తవ ప్రపంచంలో ఈ కారు రేంజ్ 500 కిమీ వరకు ఉంటుందని టాటా ప్యాసింజర్ ఎలక్ట్రిక్ మొబిలిటీ చీఫ్ కమర్షియల్ ఆఫీసర్ వివేక్ శ్రీ వత్స పేర్కొన్నారు. అయితే, బ్యాటరీ స్పెసిఫికేషన్లకు సంబంధించిన వివరాలను కంపెనీ ఇంకా అధికారికంగా వెల్లడించలేదు.

    పర్యావరణ హితం దిశగా టాటా మోటార్స్ ప్రయాణం

    భారతదేశంలో టాటా మోటార్స్ తన ‘ఓపెన్ కొలాబరేషన్ 2.0’ చొరవలో భాగంగానే ఎలక్ట్రిక్ వాహనాలను వేగంగా అభివృద్ధి చేసి, మార్కెట్లోకి విడుదల చేస్తోంది. పర్యావరణ పరిరక్షణకు ప్రాధాన్యతనిస్తూ, ఎప్పటికప్పుడు మార్కెట్లో కొత్త కార్లు లేదా అప్‌డేటెడ్ ఈవీలను లాంచ్ చేస్తోంది. అంతే కాకుండా, తమ బ్రాండ్ వాహనాల కోసం పబ్లిక్ ఛార్జింగ్ స్టేషన్లను కూడా విస్తృతంగా ఏర్పాటు చేస్తోంది. 2027 నాటికి దేశవ్యాప్తంగా 4,00,000 ఛార్జింగ్ పాయింట్లను ఏర్పాటు చేయడమే లక్ష్యంగా టాటా మోటార్స్ పనిచేస్తోంది.

    భారతదేశంలో టాటా ఎలక్ట్రిక్ వాహనాల లైనప్

    ఇప్పటికే భారతీయ మార్కెట్లో టాటా మోటార్స్ విజయవంతంగా నెక్సాన్ ఈవీ, కర్వ్ ఈవీ, పంచ్ ఈవీ, టియాగో ఈవీ మరియు టిగోర్ ఈవీ వంటి పలు ఎలక్ట్రిక్ మోడళ్లను విక్రయిస్తోంది. ఈ విజయవంతమైన జాబితాలోకి ఇప్పుడు కొత్తగా హారియర్ ఈవీ కూడా చేరనుంది. రాబోయే రోజుల్లో కంపెనీ మరిన్ని కార్లను ఎలక్ట్రిక్ రూపంలో లాంచ్ చేసే అవకాశం కూడా ఉంది.

    నెక్సాన్ ఈవీ: అమ్మకాలలో అగ్రగామి

    టాటా మోటార్స్ 2020లో తన మొట్టమొదటి పూర్తిస్థాయి ఎలక్ట్రిక్ SUV అయిన నెక్సాన్ ఈవీను లాంచ్ చేసింది. అప్పటి నుంచి ఇది వినియోగదారుల ఆదరణ పొందుతూ, ఎప్పటికప్పుడు పలు అప్‌డేట్‌లను అందుకుంటూనే ఉంది. భారతీయ మార్కెట్లో ఇది ఇప్పటికే 2,00,000 కంటే ఎక్కువ అమ్మకాలను సాధించింది. దీంతో, అతి తక్కువ కాలంలోనే అత్యధిక అమ్మకాలు పొందిన ఎలక్ట్రిక్ కారుగా నెక్సాన్ ఈవీ రికార్డ్ సృష్టించింది.

    భవిష్యత్తులో మరిన్ని టాటా ఎలక్ట్రిక్ కార్లు

    టాటా మోటార్స్ భవిష్యత్తులో తన ప్రఖ్యాత ‘సియెర్రా’ కారును కూడా ఎలక్ట్రిక్ రూపంలో లాంచ్ చేయడానికి సన్నద్ధమవుతున్నట్లు సమాచారం. దీనికి సంబంధించిన అధికారిక ప్రకటన ఇంకా వెలువడాల్సి ఉంది. హారియర్ ఈవీ విజయంతో, టాటా ఎలక్ట్రిక్ వాహన విభాగంలో తన స్థానాన్ని మరింత సుస్థిరం చేసుకోనుంది.

  • మరో పెద్ద ఎలక్ట్రిక్ కారు లాంచ్ త్వరలోనే!.. మొదలైన బుకింగ్స్

    మరో పెద్ద ఎలక్ట్రిక్ కారు లాంచ్ త్వరలోనే!.. మొదలైన బుకింగ్స్

    MG M9 Electric Car: ప్రముఖ కార్ల తయారీ సంస్థ ఎంజీ మోటార్ ఇండియా.. జేఎస్‌డబ్ల్యు (JSW) భాగస్వామ్యంతో ఎం9 (MG M9) ఎలక్ట్రిక్ కారును లాంచ్ చేయడానికి సిద్ధమవుతోంది. అయితే కంపెనీ ఈ కారును ఇండియన్ మార్కెట్లో లాంచ్ చేయడానికి ముందే బుకింగ్స్ స్వీకరించడం ప్రారంభించింది. అంతే కాకుండా ఈ కారు దేశీయ విఫణిలో లాంచ్ అయిన తరువాత ఎంపిక చేసిన ప్రీమియం నెట్‌వర్క్‌ల ద్వారా విక్రయించనుంది.

    ఎంజీ ఎం9: బుకింగ్స్ మరియు లాంచ్ వివరాలు

    ఎంజీ ఎం9 ఎలక్ట్రిక్ కారు కోసం కంపెనీ ఇప్పుడు రూ. 51,000 టోకెన్ మొత్తంతో బుకింగ్స్ స్వీకరిస్తుంది. కాబట్టి ఇది త్వరలోనే మార్కెట్లో లాంచ్ కానుంది. ఆ తరువాత డెలివరీలు ప్రారంభమవుతాయి. నిజానికి సంస్థ ఈ కారును 2025 మార్చిలో లాంచ్ చేయడానికి సంకల్పించింది. అయితే కొన్ని అనివార్య కారణాల వల్ల.. లాంచ్ ఆలస్యమైంది.

    ఎంజీ ఎం9 ధర మరియు ప్రత్యర్థులు

    కంపెనీ లాంచ్ చేయనున్న కొత్త ఎంజీ ఎం9 ఎలక్ట్రిక్ కారు ధర రూ. 65 లక్షల వరకు ఉంటుందని సమాచారం. ఈ కారు ఇప్పటికే మార్కెట్లో అమ్మకానికి ఉన్న కియా కార్నివాల్ (Kia Carnival) మరియు టయోటా వెల్‌ఫైర్ (Toyota Vellfire) కంటే పెద్దదిగా ఉంటుంది. కాబట్టి ఇది ఈ రెండు కార్లకు ప్రధాన ప్రత్యర్థిగా ఉండనుంది.

    ఎంజీ ఎం9: డిజైన్ విశేషాలు

    పరిమాణంలో పెద్దదిగా ఉన్న కొత్త ఎంజీ ఎం9 ఎలక్ట్రిక్ కారు.. స్లైడింగ్ సైడ్ డోర్‌లను కలిగి ఉంటుందని భావిస్తున్నారు. ఫాసియా కింద మెయిన్ హెడ్‌లైట్ యూనిట్లతో పాటు సొగసైన ఎల్ఈడీ స్ట్రిప్, బంపర్ అంతటా ఉండే క్రోమ్ యాక్సెంట్‌లను ఇందులో గమనించవచ్చు. వెనుక భాగంలో వెడల్పు అంతటా విస్తరించి ఉండే టెయిల్ ల్యాంప్, ఇంటిగ్రేటెడ్ బ్రేక్ లైట్, రూఫ్ స్పాయిలర్ మొదలైనవి కూడా ఉన్నాయి.

    ఇంటీరియర్ మరియు ఫీచర్స్

    విశాలమైన మరియు విలాసవంతమైన క్యాబిన్ కలిగిన ఎంజీ ఎం9 కారు.. రెండు సన్‌రూఫ్‌లను పొందుతుంది (ముందు వైపు సింగిల్ పేన్ యూనిట్, వెనుక డ్యూయెల్ పేన్ యూనిట్ ఉండటం గమనించవచ్చు). 64 కలర్ యాంబియంట్ లైటింగ్, హీటెడ్, వెంటిలేషన్ అండ్ మసాజ్ ఫంక్షన్‌లతో కూడిన పవర్ ఫ్రంట్ అండ్ రియర్ సీట్లు మరియు రియర్ ఎంటర్‌టైన్‌మెంట్ స్క్రీన్ మొదలైనవి ఉన్నాయి. భద్రత కోసం లెవెల్ 2 ఏడీఏఎస్ (ADAS) ఫీచర్స్ కూడా అందించబడతాయి.

    బ్యాటరీ ప్యాక్ మరియు రేంజ్

    కొత్త ఎంజీ ఎం9 ఎలక్ట్రిక్ కారు ఇప్పటికే విదేశీ మార్కెట్లలో.. ‘ఎంజీ మిఫా9’ (MG Mifa 9) పేరుతో అమ్ముడవుతోంది. ఇందులో 90 kWh బ్యాటరీ ప్యాక్ ఉంటుంది. అదే బ్యాటరీ ప్యాక్ ఎం9 కారులో కూడా ఉండనుంది. ఇది ఒక సింగిల్ ఛార్జితో సుమారు 430 కిమీ రేంజ్ అందిస్తుందని సమాచారం (WLTP సైకిల్ ప్రకారం). ఈ కారులోని ఎలక్ట్రిక్ మోటార్ 245 హార్స్ పవర్ మరియు 350 Nm టార్క్ అందిస్తుంది.

    ఎంజీ విండ్సర్ ఈవీ యొక్క మరో వేరియంట్

    ఎంజీ మోటార్ ఇదివరకే జేఎస్‌డబ్ల్యు భాగస్వామ్యంతో.. విండ్సర్ ఈవీ (Windsor EV) కారును లాంచ్ చేసింది. ఈ కారు మార్కెట్లో అడుగుపెట్టిన అతి తక్కువ కాలంలోనే మంచి అమ్మకాలను పొందింది. కాగా ఇప్పుడు ఈ నెలలోనే కంపెనీ.. ఈ కారు యొక్క లాంగ్ రేంజ్ బ్యాటరీ వేరియంట్‌ను లాంచ్ చేయడానికి సన్నద్ధమవుతోంది. ఇది ఇప్పుడున్న విండ్సర్ వేరియంట్ల కంటే ఎక్కువ రేంజ్ అందిస్తుందని తెలుస్తోంది. దీనికి సంబంధించిన మరిన్ని వివరాలు త్వరలో వెల్లడయ్యే అవకాశం ఉంది.

  • ఇండియన్ మార్కెట్లో.. ఈ నెలలో లాంచ్ అయ్యే కొత్త కార్లు ఇవే!

    ఇండియన్ మార్కెట్లో.. ఈ నెలలో లాంచ్ అయ్యే కొత్త కార్లు ఇవే!

    Car Launches in May 2025: ఆటోమొబైల్ పరిశ్రమలో దూసుకెళ్తున్న భారతదేశంలో లెక్కకు మించిన కొత్త కార్లను లాంచ్ అవుతూనే ఉన్నాయి. 2025 ప్రారంభమైన ఇప్పటికి నాలుగు నెలల కాలం పూర్తయింది. ఈ సమయంలోనే చాలా కొత్త వాహనాలు, అప్డేటెడ్ వాహనాలు ఇండియన్ మార్కెట్లో అడుగుపెట్టాయి. కాగా.. ఈ నెలలో దేశీయ విఫణిలో లాంచ్ కావడానికి సిద్దమవుతున్న కార్లను గురించి ఈ కథనంలో వివరంగా తెలుసుకుందాం.

    2025 కియా కారెన్స్ ఫేస్‌లిఫ్ట్ (Kia Carens Facelift)

    దేశీయ విఫణిలో ఇప్పటికే అత్యధిక ప్రజాదరణ పొందిన కియా మోటార్స్ యొక్క కారెన్స్.. మే 8న ఆధునిక హంగులతో ఫేస్‌లిఫ్ట్ రూపంలో లాంచ్ అయ్యే అవకాశం ఉంది. ఇది మార్కెట్లో లాంచ్ అయినా తరువాత ప్రస్తుతం అందుబాటులో ఉన్న స్టాండర్డ్ కారెన్స్ మోడల్‌తో పాటు అమ్మకానికి ఉంటుంది.

    ముఖ్యమైన అప్‌డేట్స్ మరియు ఇంజన్ వివరాలు

    త్వరలో లాంచ్ కానున్న కొత్త కియా కారెన్స్ ఫేస్‌లిఫ్ట్.. ప్రీమియర్ ఇంటీరియర్ డిజైన్ కలిగి, అదే ఇంజిన్ ఆప్షన్స్ (1.5 లీటర్ పెట్రోల్, 1.5 లీటర్ టర్బో పెట్రోల్ మరియు 1.5 లీటర్ డీజిల్) పొందనున్నట్లు సమాచారం. అయితే దీనికి సంబంధించిన మరిన్ని వివరాలు అధికారికంగా తెలియాల్సి ఉంటుంది. ఈ కొత్త కారు ధరలు లాంచ్ సమయంలోనే వెల్లడవుతాయి.

    టాటా ఆల్ట్రోజ్ ఫేస్‌లిఫ్ట్ (Tata Altroz Facelift)

    దేశీయ వాహన తయారీ దిగ్గజం టాటా మోటార్స్ ఈ నెల (2025 మే) చివరలో తన ఆల్ట్రోజ్ కారును ఫేస్‌లిఫ్ట్ రూపంలో లాంచ్ చేసే అవకాశం ఉంటుంది. 2020లో ప్రారంభమైన ఈ కారు కాస్మొటిక్ అప్డేట్స్ పొందటం ఇదే మొదటిసారి అని తెలుస్తోంది.

    కాస్మెటిక్ మార్పులు మరియు ఫీచర్లు

    అయితే కంపెనీ ఎప్పటికప్పుడు కొత్త పవర్‌ట్రెయిన్ ఎంపికలను, కొత్త ఫీచర్లను అందించింది. ఇప్పుడు కాస్మొటిక్ అప్డేట్స్ చేయనుంది. లోపలి భాగంలో 10.25 ఇంచెస్ టచ్‌స్క్రీన్ ఉంటుందని తెలుస్తోంది. కాగా త్వరలోనే ఇండియన్ మార్కెట్లో అడుగుపెట్టనున్న కొత్త ఆల్ట్రోజ్ ఫేస్‌లిఫ్ట్ కారులో యాంత్రికంగా ఎలాంటి మార్పులు ఉండవని సమాచారం. అంటే ఇది డీజిల్ ఇంజిన్ పొందే అవకాశం ఉంది. ఈ కారు ధరలు, బుకింగ్స్ వంటి వివరాలు త్వరలోనే వెల్లడవుతాయి.

    ఫోక్స్‌వ్యాగన్ గోల్ఫ్ జీటీఐ (Volkswagen Golf GTI)

    ఈ నెలలో మార్కెట్లో లాంచ్ కానున్న కొత్త కార్లలో ఫోక్స్‌వ్యాగన్ కంపెనీకి చెందిన ‘గోల్ఫ్ జీటీఐ’ ఒకటి. నిజానికి ‘గోల్ఫ్’ అనేది గ్లోబల్ మార్కెట్లో అత్యధిక ప్రజాదరణ పొందిన ఫోక్స్‌వ్యాగన్ మోడల్. ఇది ఈ నెల చివరి నాటికి ఇండియన్ మార్కెట్లో లాంచ్ అయ్యే అవకాశం ఉంది.

    ఇంజిన్, ధర మరియు దిగుమతి వివరాలు

    ఇది కంప్లీట్ బిల్డ్ యూనిట్ (CBU) మార్గం ద్వారా దేశీయ మార్కెట్లోకి దిగుమతి చేసుకోబడుతుంది. కాబట్టి దీని ధర రూ. 50 లక్షల (ఎక్స్ షోరూమ్) కంటే ఎక్కువ ఉండొచ్చని సమాచారం. ఇది 2.0 లీటర్ టర్బో పెట్రోల్ ఇంజిన్ ద్వారా 265 హార్స్ పవర్ మరియు 370 న్యూటన్ మీటర్ టార్క్ ప్రొడ్యూస్ చేస్తూ.. 7 స్పీడ్ డ్యూయెల్ క్లచ్ ఆటోమాటిక్ గేర్‌బాక్స్‌తో జతచేయబడి ఉంటుంది.

    పెద్ద బ్యాటరీతో కూడిన ‘ఎంజీ విండ్సర్’ (MG Windsor – Large Battery)

    అతి తక్కువ కాలంలోనే అత్యధిక ప్రజాదరణ పొందిన ఎంజీ మోటార్ కంపెనీకి చెందిన విండ్సర్.. ఈ నెలలో పెద్ద బ్యాటరీతో కూడిన వేరియంట్ రూపంలో మార్కెట్లో అడుగుపెట్టనుంది. అంటే త్వరలో లాంచ్ అయ్యే ఎంజీ విండ్సర్ కారు ‘ఏడీఏఎస్’ (ADAS)తో పాటు 50.6 కిలోవాట్ బ్యాటరీ పొందనుంది. కాగా మార్కెట్లో ప్రస్తుతం అమ్మకానికి ఉన్న విండ్సర్ 38 కిలోవాట్ బ్యాటరీ ప్యాక్‌తో ఉంది.

    బ్యాటరీ, రేంజ్ మరియు పర్ఫామెన్స్

    విండ్సర్ 50.6 కిలోవాట్ బ్యాటరీ ప్యాక్ పొందితే.. ఇది ఒక సింగిల్ ఛార్జితో 460 కిమీ రేంజ్ అందిస్తుందని సమాచారం. దీని ధర రూ. 14 లక్షల నుంచి రూ. 16 లక్షల (ఎక్స్ షోరూమ్) మధ్య ఉంటుంది. ఈ కారులోని మోటారు 138 హార్స్ పవర్ మరియు 200 న్యూటన్ మీటర్ టార్క్ ప్రొడ్యూస్ చేస్తుంది.

    ఎంజీ సైబర్‌స్టర్ ఈవీ (MG Cyberster EV)

    గత కొంత కాలంగా ఎప్పుడెప్పుడా అని ఎదురు చూస్తున్న ఎంజీ సైబర్‌స్టర్ ఎలక్ట్రిక్ కన్వర్టిబుల్ స్పోర్ట్స్ కారు.. ఈ నెలలో లాంచ్ అయ్యే అవకాశం ఉంది. అయితే కంపెనీ ఇది ఎప్పుడు లాంచ్ అవుతుందనే విషయాన్ని మాత్రం అధికారికంగా వెల్లడించలేదు. అయితే దీని ధర రూ. 70 లక్షల (ఎక్స్ షోరూమ్) వరకు ఉండొచ్చని అంచనా.

    ఫీచర్లు, రేంజ్ మరియు ధర

    ఎంజీ సైబర్‌స్టర్ ఇండియన్ మార్కెట్లో లాంచ్ అయిన తరువాత ఎంపిక చేసిన కొన్ని ప్రీమియం షోరూమ్‌లలో మాత్రమే విక్రయించనుంది. ఈ స్పోర్ట్ కారు డ్యూయెల్ మోటార్ కాన్ఫిగరేషన్‌తో.. హై స్పెక్ 77 కిలోవాట్ బ్యాటరీ ఉండనున్నట్లు సమాచారం. ఇది ఒక సింగిల్ ఛార్జితో 580 కిమీ రేంజ్ అందిస్తుందని తెలుస్తోంది. ఈ కారు ఇప్పటి వరకు మార్కెట్లో అమ్మకానికి ఉన్న ఎంజీ మోటార్ బ్రాండ్ యొక్క ఇతర కార్ల కంటే భిన్నంగా ఉంటుంది.

    గమనిక: పైన పేర్కొన్న లాంచ్ తేదీలు, ధరలు మరియు స్పెసిఫికేషన్‌లు అంచనాలు మరియు మీడియా నివేదికలపై ఆధారపడి ఉంటాయి. అధికారిక ప్రకటనల కోసం వేచి ఉండండి.