డైరెక్టర్ కల నెరవేర్చిన హీరో కార్తీ.. సూర్య ఇంట్లో మరిచిపోలేని గిఫ్ట్

దర్శకుడికి మహీంద్రా థార్ బహుమతి

గతేడాది విడుదలైన ‘సత్యం శివమ్ సుందరం’ సినిమా ఆశించిన కలెక్షన్స్ చేయలేకపోయింది. కానీ.. చాలామంది హృదయాలను టచ్ చేసింది. ఈ సినిమా డైరెక్టర్ ‘ప్రేమ్ కుమార్’కు ఇప్పుడు హీరో కార్తీ మహీంద్రా థార్ 5 డోర్ వెర్షన్ గిఫ్ట్ ఇచ్చారు.

దర్శకుడు ప్రేమ్ కుమార్ కారు కలను నిజం చేసిన కార్తీ

నిజానికి తెలుపు రంగు మహీంద్రా థార్ 5 డోర్ కారును కొనుగోలు చేయాలని చాలా రోజుల క్రితమే ప్రేమ్ కుమార్ అనుకున్నారు. దీనికోసం డబ్బులు కూడా కూడబెట్టడం మొదలుపెట్టారు. కానీ అనుకోని సమస్యల వల్ల డబ్బు మొత్తం ఖర్చు అయిపోయింది. దీంతో కారును కొనుగోలు చేయలేకపోయినట్లు ప్రేమ్ కుమార్ చెప్పారు. ఈ విషయం తెలుసుకున్న కార్తీ.. మహీంద్రా థార్ రోక్స్ ఏఎక్స్ 5ఎల్ 4×4 వెర్షన్ గిఫ్ట్ ఇచ్చారు.

కార్తీ కారును కొనుగోలు చేసిన తరువాత తనకు ఫోటో పంపించారని.. అది చూసి తాను షాక్ అయ్యానని ప్రేమ్ కుమార్ చెప్పారు. ఆ తరువాత అది కార్తీ ఇస్తున్న గిఫ్ట్ అని తెలుసుకుని సంబరపడిపోయానని అన్నారు. ఆ తరువాత సూర్య ఇంటికి వెళ్లి కారును తీసుకున్నారు. మొత్తానికి ప్రేమ్ కుమార్ కలను కార్తీ తీర్చేశారు.

సరికొత్త మహీంద్రా థార్ రోక్స్: ఫీచర్లు & స్పెసిఫికేషన్లు

భారతదేశంలో అత్యంత ప్రజాదరణ పొందిన కార్లలో మహీంద్రా థార్ చెప్పుకోదగ్గది. ఈ కారు ఇప్పుడు 5 డోర్ రూపంలో థార్ రోక్స్ పేరుతో అమ్మకానికి ఉంది. చూడటానికి సాధారణ థార్ మాదిరిగా ఉన్నప్పటికీ.. ఇది థార్ కంటే పరిమాణంలో పెద్దదిగా ఉంటుంది. ఇది మొత్తం 18 వేరియంట్లలో అందుబాటులో ఉంటుంది. దీని ధరలు రూ. 12.99 లక్షల నుంచి రూ. 23.09 లక్షల (ఎక్స్ షోరూమ్) మధ్య ఉన్నాయి.

డిజైన్ & అత్యాధునిక ఫీచర్లు

చూడగానే ఆకట్టుకునే డిజైన్ కలిగిన థార్ రోక్స్.. 10.25 ఇంచెస్ స్క్రీన్‌లు, వైర్‌లెస్ ఛార్జింగ్ ప్యాడ్, ఆటోమాటిక్ క్లైమేట్ కంట్రోల్, నాలుగు పవర్ విండోస్, స్లైడింగ్ ఫ్రంట్ ఆర్మ్‌రెస్ట్, కూల్డ్ గ్లోవ్ బాక్స్ వంటి మరెన్నో ఫీచర్స్ ఉంటాయి.

ఇంజిన్ ఆప్షన్లు & పనితీరు

మహీంద్రా థార్ రోక్స్ కారులో 2.0 లీటర్ టర్బో పెట్రోల్ ఇంజిన్ మరియు 2.2 లీటర్ డీజిల్ ఇంజిన్ వంటివి ఉన్నాయి. పెట్రోల్ ఇంజిన్ 122 హార్స్ పవర్, 330 న్యూటన్ మీటర్ టార్క్ అందిస్తాయి. డీజిల్ ఇంజిన్ 152 హార్స్ పవర్, 330 న్యూటన్ మీటర్ టార్క్ ప్రొడ్యూస్ చేస్తుంది. రెండు ఇంజిన్లు మాన్యువల్ గేర్‌బాక్స్‌తో జత చేయబడి ఉత్తమ పనితీరుని అందిస్తాయి. కాబట్టి ఎక్కువమంది ఈ కారును కొనుగోలు చేయడానికి ఇష్టపడతారు.