Author: Kumar

నిస్సాన్ మాగ్నైట్ సీఎన్‌జీ వచ్చేసింది: ధర రూ.6.89 లక్షలే!

Nissan Magnite CNG: భారతదేశంలో ఒకప్పుడు అత్యంత ప్రజాదరణ పొంది, ప్రత్యర్థులకు సైతం గట్టి పోటీ ఇచ్చిన జపనీస్ బ్రాండ్ నిస్సాన్ (Nissan).. తాజాగా తన మాగ్నైట్ కారును సీఎన్‌జీ రూపంలో లాంచ్ చేసింది. ఈ కారు ధరలు, డిజైన్ మరియు ఫీచర్స్, మైలేజ్ వంటి వివరాలను వివరంగా ఈ కథనంలో తెలుసుకుందాం.

నిస్సాన్ మాగ్నైట్ CNG: ధరలు, వేరియంట్లు & బుకింగ్ వివరాలు

ఇండియన్ మార్కెట్లో లాంచ్ అయిన కొత్త ‘నిస్సాన్ మాగ్నైట్ సీఎన్‌జీ’ (Nissan Magnite CNG) కారు మొత్తం ఆరు వేరియంట్లలో అందుబాటులో ఉంది. వీటి ధరలు రూ. 6.89 లక్షల నుంచి రూ. 10.02 లక్షల మధ్య ఉన్నాయి. కంపెనీ ఈ కారు బుకింగ్స్ 2025 జూన్ 1 నుంచి ప్రారంభించనున్నట్లు సమాచారం.

నిస్సాన్ మాగ్నైట్ సీఎన్‌జీ కారును జూన్ 1 నుంచి.. ఢిల్లీ ఎన్‌సీఆర్‌, హర్యానా, ఉత్తరప్రదేశ్, గుజరాత్, మహారాష్ట్ర, కేరళ మరియు కర్ణాటక రాష్ట్రాలలోని కంపెనీ యొక్క అధీకృత డీలర్‌షిప్‌లలో బుక్ చేసుకోవచ్చు. డెలివరీలు త్వరలోనే ప్రారంభమవుతాయి. ఇది చూడటానికి స్టాండర్డ్ మాగ్నైట్ మాదిరిగా ఉన్నప్పటికీ.. కొన్ని చిన్న చిన్న మార్పులు కనిపిస్తాయి.

నిస్సాన్ మాగ్నైట్ CNG: డిజైన్ & ఫీచర్లు

ఆకర్షణీయమైన డిజైన్

నిస్సాన్ మాగ్నైట్ సీఎన్‌జీ.. సాధారణ మోడల్ మాదిరిగా అదే హెడ్‌లాంప్, ఫాగ్ లాంప్, సైడ్ ప్రొఫైల్ మరియు రియర్ లైటింగ్ సెటప్ పొందుతుంది. బ్రాండ్ లోగోలు మాత్రమే కాకుండా.. ఈ కారులో ప్రత్యేకమైన CNG బ్యాడ్జెస్ కూడా చూడవచ్చు. ఇవి కారును CNG వేరియంట్ అని గుర్తించడానికి ఉపయోగపడతాయి.

అధునాతన ఫీచర్లు

ఫీచర్స్ విషయానికి వస్తే.. ఈ కారులో టచ్‌స్క్రీన్ ఇన్ఫోటైన్‌మెంట్ సిస్టం, డిజిటల్ డ్రైవర్ డిస్‌ప్లే, స్టీరింగ్ మౌంటెడ్ కంట్రోల్స్, ఏసీ వెంట్స్ మరియు కప్ హోల్డర్స్ మొదలైనవన్నీ ఉన్నాయి. ఇవన్నీ వాహన వినియోగదారులకు సౌకర్యవంతమైన మరియు మంచి డ్రైవింగ్ అనుభూతిని అందిస్తాయి.

నిస్సాన్ మాగ్నైట్ CNG: ఇంజిన్, మైలేజ్ మరియు వారంటీ

ఇంజిన్ పనితీరు మరియు మైలేజ్

నిస్సాన్ మాగ్నైట్ సీఎన్‌జీ కారులో.. సింగిల్ సిలిండర్ సీఎన్‌జీ కిట్‌తో కూడిన 1.0 లీటర్ త్రీ సిలిండర్ న్యాచురల్లీ ఆస్పిరేటెడ్ పెట్రోల్ ఇంజిన్ ఉంటుంది. ఇది 5 స్పీడ్ మాన్యువల్ గేర్‌బాక్స్ ఆప్షన్ పొందుతుంది. ఈ ఇంజిన్ సుమారుగా 20 కిమీ/kg నుంచి 22 కిమీ/kg మైలేజ్ అందిస్తుందని అంచనా. అయితే, కచ్చితమైన మైలేజ్ గణాంకాలు కంపెనీ ఇంకా అధికారికంగా వెల్లడించలేదు. CNG కిట్ అన్ని వేరియంట్లలోనూ అందుబాటులో ఉంటుంది, దీని కోసం అదనంగా రూ. 75,000 చెల్లించాల్సి ఉంటుంది.

CNG కిట్ & వారంటీ

ఈ CNG కిట్‌ను మోటోజెన్ (Motozen) సరఫరా చేస్తుంది మరియు ప్రభుత్వ అధికారిక ఫిట్‌మెంట్ కేంద్రాల్లో దీనిని ఇన్‌స్టాల్ చేస్తారు. CNG ఫిట్‌మెంట్‌తో వాహనానికి 3 సంవత్సరాలు లేదా 1 లక్ష కిలోమీటర్ల వారంటీ ప్రామాణికంగా లభిస్తుంది. ఇది వాహన వినియోగదారులకు మరింత విశ్వాసాన్ని అందిస్తుంది.

ప్రత్యర్థులు

ఇండియన్ మార్కెట్లో అడుగుపెట్టిన కొత్త నిస్సాన్ మాగ్నైట్ CNG కారు.. దేశీయ విఫణిలో ఇప్పటికే ఉన్న టాటా పంచ్ CNG మరియు హ్యుందాయ్ ఎక్స్‌టర్ CNG వంటి మోడళ్లకు ప్రధాన ప్రత్యర్థిగా నిలుస్తుంది. కాబట్టి, అమ్మకాల పరంగా మాగ్నైట్ CNG గట్టి పోటీని ఎదుర్కోవాల్సి ఉంటుందని మార్కెట్ వర్గాలు భావిస్తున్నాయి.

May 29, 2025
ప్రపంచంలో అత్యంత వేగవంతమైన టాప్ 5 బైక్‌లు ఇవే!.. ధర & వివరాలు
Top Five Fastest Motorcycles In The World: ప్రపంచ మార్కెట్లో అత్యంత ఖరీదైన బైకులు ఉన్నాయి, అతి తక్కువ ధరలో లభించే బైకులు ఉన్నాయి. ఎక్కువ మైలేజ్ ఇచ్చే బైకులు ఉన్నాయి, ఓ మోస్తరు మైలేజ్ ఇచ్చే బైకులు కూడా ఉన్నాయి. ఈ కథనంలో, మనం ప్రపంచంలోనే అత్యంత వేగవంతమైన టాప్ 5 బైక్‌లు ఏవి, వాటి ధర మరియు ఇతర కీలక వివరాలను సమగ్రంగా తెలుసుకుందాం.

1. కవాసకి నింజా హెచ్2ఆర్ (Kawasaki Ninja H2R)

గ్లోబల్ మార్కెట్లో అత్యంత శక్తివంతమైన మరియు వేగవంతమైన బైకులలో ‘కవాసకి నింజా హెచ్2ఆర్’ అగ్రస్థానంలో ఉంది. ఈ బైక్ ట్రాక్-ఓన్లీ వెర్షన్ మరియు దీని వేగం అసాధారణమైనది.

కవాసకి నింజా హెచ్2ఆర్ – ముఖ్యమైన ఫీచర్లు మరియు ధర
- గరిష్ట వేగం (Top Speed): గంటకు సుమారు 400 కిలోమీటర్లు
- ఇంజిన్ (Engine): 998 సీసీ, లిక్విడ్-కూల్డ్, సూపర్‌ఛార్జ్డ్ ఇన్‌లైన్ ఫోర్-సిలిండర్ ఇంజిన్
- పవర్ (Power): 317 హార్స్ పవర్ (HP)
- టార్క్ (Torque): 164.7 న్యూటన్ మీటర్ (Nm)
- ధర (Price): సుమారు రూ. 81 లక్షలు (ఎక్స్ షోరూమ్, భారతదేశంలో)
అత్యద్భుతమైన ఏరోడైనమిక్ డిజైన్ కలిగిన ఈ బైక్, రైడర్‌కు సాటిలేని డ్రైవింగ్ అనుభూతిని అందిస్తుంది. దీనిలోని అత్యాధునిక ఫీచర్లు దీనిని ఒక ప్రత్యేకమైన సూపర్ బైక్‌గా నిలబెడతాయి.

2. లైట్‌నింగ్ ఎల్ఎస్-218 (Lightning LS-218)

అత్యంత వేగవంతమైన ఎలక్ట్రిక్ బైకుల జాబితాలో లైట్‌నింగ్ ఎల్ఎస్-218 ఒక సంచలనం. ఇది దాని పేరుకు తగ్గట్టే అద్భుతమైన వేగాన్ని కలిగి ఉంది.

లైట్‌నింగ్ ఎల్ఎస్-218 – ముఖ్యమైన ఫీచర్లు మరియు ధర
- గరిష్ట వేగం (Top Speed): గంటకు సుమారు 351 కిలోమీటర్లు
- మోటార్ (Motor): లిక్విడ్ కూల్డ్, IPM (ఇంటీరియర్ పర్మినెంట్ మాగ్నెట్) మోటారు
- పవర్ (Power): 241 Bhp (బ్రేక్ హార్స్ పవర్)
- టార్క్ (Torque): 298 Nm
- ధర (Price): అమెరికన్ మార్కెట్లో సుమారు 47,000 డాలర్లు (భారతదేశంలో రూ. 40 లక్షల కంటే ఎక్కువ)
ఈ ఎలక్ట్రిక్ సూపర్ బైక్ పర్యావరణ అనుకూలమైనది మాత్రమే కాకుండా, పనితీరులో కూడా పెట్రోల్ బైక్‌లకు గట్టి పోటీనిస్తుంది. దీని డిజైన్ మరియు ఫీచర్లు ప్రత్యేక ఆకర్షణగా నిలుస్తాయి.

3. కవాసకి నింజా జెడ్ఎక్స్-10ఆర్ (Kawasaki Ninja ZX-10R)

కవాసకి నుండి వచ్చిన మరో అద్భుతమైన సూపర్ బైక్ నింజా జెడ్ఎక్స్-10ఆర్. ఇది వేగం, సాంకేతికత మరియు సరసమైన ధరల కలయికతో రైడర్‌లను ఆకట్టుకుంటుంది.

కవాసకి నింజా జెడ్ఎక్స్-10ఆర్ – ముఖ్యమైన ఫీచర్లు మరియు ధర
- గరిష్ట వేగం (Top Speed): గంటకు సుమారు 319 కిలోమీటర్లు
- ఇంజిన్ (Engine): 998 సీసీ, లిక్విడ్-కూల్డ్, ఇన్-లైన్ ఫోర్-సిలిండర్ ఇంజిన్
- పవర్ (Power): 200 Bhp @ 13,200 rpm
- టార్క్ (Torque): 115 Nm @ 11,400 rpm
- ధర (Price): సుమారు రూ. 18.50 లక్షలు (ఎక్స్ షోరూమ్, భారతదేశంలో)
అప్‌డేటెడ్ డిజైన్, అత్యాధునిక ఎలక్ట్రానిక్ రైడర్ ఎయిడ్స్ మరియు ఆకర్షణీయమైన కలర్ ఆప్షన్లలో లభించే ఈ బైక్, రేస్ ట్రాక్ పైన మరియు రోడ్డు పైన కూడా అద్భుతమైన పనితీరును కనబరుస్తుంది. ధర కొంత తక్కువగా ఉండటం వల్ల, ఎక్కువ మంది రైడర్‌లు ఈ బైక్‌ను కొనుగోలు చేయడానికి ఆసక్తి చూపుతారు.

4. డుకాటీ పానిగేల్ వీ4 ఆర్ (Ducati Panigale V4 R)

ఇటాలియన్ సూపర్ బైక్ తయారీదారు డుకాటీ నుండి వచ్చిన పానిగేల్ వీ4 ఆర్, దాని రేసింగ్ వారసత్వానికి నిదర్శనం. ఇది అత్యుత్తమ పనితీరు మరియు సాంకేతికతకు ప్రసిద్ధి చెందింది.

డుకాటీ పానిగేల్ వీ4 ఆర్ – ముఖ్యమైన ఫీచర్లు మరియు ధర
- గరిష్ట వేగం (Top Speed): గంటకు సుమారు 318 కిలోమీటర్లు
- ఇంజిన్ (Engine): 998 సీసీ, డెస్మోసెడిసి స్ట్రాడేల్ వీ4 ఇంజిన్
- పవర్ (Power): 234 Bhp (రేస్ కిట్‌తో)
- టార్క్ (Torque): 118 Nm
- ధర (Price): సుమారు రూ. 69.99 లక్షలు (ఎక్స్ షోరూమ్, భారతదేశంలో)
ఈ బైక్ అత్యంత వేగవంతమైన మరియు ఖరీదైన బైకులలో ఒకటి. ప్రత్యేకమైన ఏరోడైనమిక్ డిజైన్, అత్యాధునిక ఎలక్ట్రానిక్స్ మరియు శక్తివంతమైన ఇంజిన్‌తో, ఇది చూడగానే ఆకట్టుకుంటుంది మరియు అసాధారణ రైడింగ్ అనుభవాన్ని అందిస్తుంది.

5. ఏప్రిలియా ఆర్‌ఎస్‌వీ4 1100 ఫ్యాక్టరీ (Aprilia RSV4 1100 Factory)

ఏప్రిలియా కంపెనీకి చెందిన ఆర్‌ఎస్‌వీ4 1100 ఫ్యాక్టరీ, అత్యంత వేగవంతమైన మరియు సాంకేతికంగా అభివృద్ధి చెందిన బైక్‌లలో ఒకటి. ఇది రేస్ ట్రాక్ నుండి ప్రేరణ పొందింది.

ఏప్రిలియా ఆర్‌ఎస్‌వీ4 1100 ఫ్యాక్టరీ – ముఖ్యమైన ఫీచర్లు మరియు ధర
- గరిష్ట వేగం (Top Speed): గంటకు సుమారు 315 కిలోమీటర్లు
- ఇంజిన్ (Engine): 1099 సీసీ, వీ4 ఇంజిన్
- పవర్ (Power): 214 Bhp @ 13,000 rpm
- టార్క్ (Torque): 125 Nm @ 10,500 rpm
- ధర (Price): సుమారు రూ. 31.26 లక్షలు (ఎక్స్ షోరూమ్, భారతదేశంలో)
ఈ బైక్ ధర కొంత ఎక్కువే అయినప్పటికీ, దాని అధునాతన సస్పెన్షన్, శక్తివంతమైన బ్రేకులు మరియు ఏరోడైనమిక్స్‌తో ధరకు తగిన అద్భుతమైన పనితీరును అందిస్తుంది. రేసింగ్ ಉತ್సాహపరులకు ఇది ఒక అద్భుతమైన ఎంపిక.
May 28, 2025
వర్షాకాలంలో మీ కారు సేఫ్‌గా ఉండాలంటే.. ఈ టిప్స్ పాటించాల్సిందే!
Driving Tips For Flooded Roads: ఎండలు మండిపోతున్నాయ్.. ఎలా దేవుడా అనేలోపే భారీ వర్షాలు మొదలైపోయాయి. ఢిల్లీ, ముంబై, బెంగళూరు వంటి ప్రధాన నగరాలను వర్షాలు ముంచెత్తుతున్నాయి. ఈ వర్షాల కారణంగా లోతట్టు ప్రాంతాల్లో నీరు నిలిచిపోయి, జనజీవనం స్తంభించిపోతుంది. ఇలాంటి క్లిష్ట సమయంలో వాహనదారులు తమ కార్లు లేదా బైకులను అత్యంత జాగ్రత్తగా కాపాడుకోవాలి. కొంచెం ఏమరపాటుగా ఉన్నా వాహనాల్లో తీవ్రమైన సమస్యలు తలెత్తి, రిపేర్ల కోసం భారీగా ఖర్చు చేయాల్సి వస్తుంది. ఈ కథనంలో, వర్షాకాలంలో మీ వాహనాలను సురక్షితంగా ఉంచుకోవడానికి తీసుకోవాల్సిన ముఖ్యమైన జాగ్రత్తలు ఏమిటో వివరంగా తెలుసుకుందాం.

వర్షాకాలంలో వాహన సంరక్షణకు పాటించాల్సిన ముఖ్య సూచనలు

1. నీరు ఎక్కువగా నిలిచిన రోడ్లను నివారించండి

భారీ వర్షాల సమయంలో లోతట్టు ప్రాంతాలు మరియు సరిగా డ్రైనేజీ వ్యవస్థ లేని రోడ్లపై నీరు ఎక్కువగా నిలిచిపోతుంది. కాబట్టి, అలాంటి రోడ్లపై ప్రయాణించడాన్ని పూర్తిగా నివారించాలి. అది దగ్గరి దారి అయినా సరే, ప్రత్యామ్నాయ మార్గాలను ఎంచుకోవడం ఉత్తమం. ఎందుకంటే, నీరు ఎక్కువగా ఉన్న రోడ్డుపై ప్రయాణించడం వల్ల వాహనం ఇంజిన్‌లోకి నీరు చేరి ‘హైడ్రోస్టాటిక్ లాక్’ అయ్యే ప్రమాదం ఉంది. ఇది జరిగితే, ఇంజిన్ రిపేర్ చేయడానికి చాలా ఎక్కువ డబ్బు ఖర్చు చేయాల్సి ఉంటుంది.

2. నీటి లోతును అంచనా వేయండి

ఒకవేళ తప్పనిసరి పరిస్థితుల్లో నీరు నిలిచిన ప్రాంతం గుండా వెళ్లాల్సి వస్తే, ముందుగా నీటి లోతును (వాటర్ డెప్త్) అంచనా వేయండి. మీ వాహనం వీల్‌బేస్ హైట్ తక్కువగా ఉంటే, కారు ఎక్కువ భాగం నీటిలో మునిగిపోయి ఇంజిన్‌లోకి నీరు చేరే అవకాశం ఎక్కువ. హై ఎండ్ కార్లు లేదా SUVలు కొంతవరకు నీటిని తట్టుకోగలవు, కానీ హ్యాచ్‌బ్యాక్‌లు, సెడాన్‌లు వంటి చిన్న కార్లు త్వరగా సమస్యలకు గురవుతాయి.

3. స్థిరమైన, నెమ్మదైన వేగంతో ప్రయాణించండి

నీరు నిండిన రోడ్డుపై ప్రయాణించాల్సి వస్తే, మొదటి గేర్‌లోనే నెమ్మదిగా, స్థిరమైన వేగంతో ప్రయాణించాలి. ఇంజిన్ RPM (రివొల్యూషన్స్ పర్ మినిట్) కొంచెం ఎక్కువగా ఉండేలా చూసుకోండి, కానీ ఆకస్మికంగా యాక్సిలరేషన్ ఇవ్వడం లేదా బ్రేకులు వేయడం వంటివి చేయకూడదు. ఇలా చేయడం వలన ఎగ్జాస్ట్ పైపు ద్వారా ఇంజిన్‌లోకి నీరు వెళ్లే ప్రమాదం తగ్గుతుంది మరియు వాహనంపై నియంత్రణ కోల్పోకుండా ఉంటారు.

4. ఏసీ (AC) ఆఫ్ చేయండి

కారు నీటిలో ప్రయాణిస్తున్నప్పుడు ఏసీని తప్పకుండా ఆఫ్ చేయాలి. నీటిలో ప్రయాణించేటప్పుడు ఇంజిన్‌పై అదనపు భారం పడుతుంది. ఇలాంటి సమయంలో ఏసీ ఆన్ చేస్తే, ఇంజిన్‌పై పనిభారం మరింత పెరిగి, ఇంజిన్ దెబ్బతినే అవకాశం ఉంటుంది. కాబట్టి, ఈ విషయాన్ని వాహనదారులు గుర్తుంచుకోవాలి.

5. నీటిలో వాహనం ఆగిపోతే ఇంజిన్ స్టార్ట్ చేయొద్దు

ఒకవేళ మీ కారు నీటిలో ప్రయాణిస్తూ మధ్యలో ఆగిపోతే, తొందరపడి వెంటనే ఇంజిన్ స్టార్ట్ చేయడానికి ప్రయత్నించవద్దు. ఎందుకంటే, అలాంటి సమయంలో ఇంజిన్ స్టార్ట్ చేస్తే, ఇంజిన్‌లోని కీలక భాగాల్లోకి నీరు చేరి, ఇంజిన్ పూర్తిగా చెడిపోయే ప్రమాదం ఉంది. ఇలాంటి పరిస్థితుల్లో, ఇతరుల సహాయం తీసుకుని వాహనాన్ని నీటి నుంచి బయటకు లాగి, ఆ తర్వాత మెకానిక్‌కు చూపించి రిపేర్ చేయించుకోవాలి.

6. హెడ్‌లైట్స్ మరియు ఫాగ్ ల్యాంప్స్ ఆన్ చేయండి

భారీ వర్షం కురుస్తున్నప్పుడు రోడ్డు సరిగా కనిపించక (దృశ్యమానత తగ్గి) ప్రమాదాలు జరిగే అవకాశం ఎక్కువగా ఉంటుంది. కాబట్టి, అలాంటి సమయంలో ప్రమాదాలను నివారించడానికి మీ వాహనం హెడ్‌లైట్స్, హాజర్డ్ లైట్స్ మరియు ఫాగ్ ల్యాంప్‌లను తప్పకుండా ఆన్ చేయాలి. ఇది మీ వాహనాన్ని ఇతరులకు స్పష్టంగా కనిపించేలా చేస్తుంది మరియు సురక్షిత ప్రయాణానికి దోహదపడుతుంది.

7. అవసరమైన యాక్ససరీస్ ఉపయోగించండి

వర్షాకాలంలో వాహనాలను రక్షించుకోవడానికి మార్కెట్లో అనేక రకాల యాక్ససరీలు అందుబాటులో ఉన్నాయి. రబ్బర్ ఫ్లోర్ మ్యాట్స్, వాటర్‌ప్రూఫ్ కార్ సీట్ కవర్లు, డోర్ వైజర్స్ వంటివి ఉపయోగించడం వల్ల కారు ఇంటీరియర్‌ను కొంతవరకు కాపాడుకోవచ్చు. అలాగే, వాహనం పార్క్ చేసినప్పుడు బాడీ కవర్‌ను ఉపయోగించడం వల్ల కారు వర్షంలో తడిసిపోకుండా నివారించవచ్చు.

వర్షాకాలంలో మరిన్ని వాహన సంరక్షణ చిట్కాలు
- టైర్లలో గాలి పీడనం (ఎయిర్ ప్రెజర్) సరిగ్గా ఉందో లేదో ఎప్పటికప్పుడు చెక్ చేసుకోవాలి. మంచి గ్రిప్ కోసం టైర్ ట్రెడ్ కూడా సరిగ్గా ఉండాలి.
- వాహనం నీటిలోంచి బయటకు వచ్చిన తర్వాత బ్రేక్ ప్యాడ్‌లను ఆరబెట్టుకోవడానికి, కొద్ది దూరం నెమ్మదిగా ప్రయాణిస్తూ అప్పుడప్పుడు తేలికగా బ్రేకులు వేయాలి.
- బ్యాటరీ కనెక్షన్లు, వైరింగ్, ఫ్యూజ్‌లు మరియు లైట్లు వంటి ఎలక్ట్రికల్ భాగాలను తనిఖీ చేసుకోవాలి, తేమ చేరకుండా జాగ్రత్త పడాలి.
- మీ మొబైల్ ఫోన్‌లో జీపీఎస్ నావిగేషన్ మరియు ఎమర్జెన్సీ కాంటాక్ట్ యాప్‌లు ఉండేలా చూసుకోవాలి. వర్షం కారణంగా దారి తప్పినా లేదా అత్యవసర సహాయం కావాలన్నా ఇవి ఉపయోగపడతాయి.
ఈ జాగ్రత్తలు పాటించడం ద్వారా వర్షాకాలంలో మీ వాహనాన్ని సురక్షితంగా ఉంచుకోవచ్చు మరియు అనవసరమైన రిపేర్ ఖర్చులను నివారించుకోవచ్చు.
May 27, 2025
సుజుకి ఫస్ట్ ఎలక్ట్రిక్ స్కూటర్ ‘ఈ-యాక్సెస్’ ఇదే: పూర్తి వివరాలు ఇక్కడ

Suzuki E Access Electric Scooter: ప్రముఖ టూ వీలర్ తయారీ సంస్థ సుజుకి మోటార్‌సైకిల్ ఇండియా (Suzuki Motorcycle India) భారతదేశంలో తన మొట్టమొదటి ఎలక్ట్రిక్ స్కూటర్ ‘ఈ-యాక్సెస్’ లాంచ్ చేయడానికి సిద్ధమైంది. ఈ స్కూటర్ ఉత్పత్తిని కంపెనీ గుర్గావ్‌లోని తన తయారీ ప్లాంట్‌లో శుక్రవారం ప్రారంభించనున్నట్లు ప్రకటించింది. దీన్ని బట్టి చూస్తే.. ఈ స్కూటర్ అమ్మకాలు త్వరలోనే ప్రారంభమయ్యే అవకాశం ఉందని తెలుస్తోంది. ధరలు కూడా రానున్న రోజుల్లో వెల్లడవుతాయి.

భారత్ మొబిలిటీ గ్లోబల్ ఎక్స్‌పో 2025లో సుజుకి ఈ-యాక్సెస్

భారత్ మొబిలిటీ గ్లోబల్ ఎక్స్‌పో 2025లో కనిపించిన సుజుకి ఈ-యాక్సెస్ స్కూటర్.. బ్రాండ్ యొక్క మొదటి స్కూటర్. ఎలక్ట్రిక్ స్కూటర్ విభాగంలోకి అడుగుపెట్టాలనే ఉద్దేశ్యంతో కంపెనీ ఈ స్కూటర్ లాంచ్ చేస్తోంది. ఈ స్కూటర్ లేటెస్ట్ ఈ టెక్నాలజీని కలిగి.. లిథియం ఐరన్ ఫాస్ఫేట్ బ్యాటరీ పొందుతుంది.

సుజుకి ఈ-యాక్సెస్: బ్యాటరీ ఫీచర్లు మరియు భద్రత

లిథియం ఐరన్ బ్యాటరీ.. ఎక్కువ మన్నికగా ఉంటుంది. మెరుగైన ఉష్ణ స్థిరత్వాన్ని కలిగి ఉంటుంది. ఈ స్కూటర్‌లో రీజెనరేటివ్ బ్రేకింగ్, రివర్ మోడ్‌తో పాటు.. ఎకో, రైడ్ ఏ, రైడ్ బీ మోడ్స్ వంటివి ఉంటాయి. బ్యాటరీ చాలా పటిష్టంగా ఉంటుంది. బ్యాటరీ భాగాలను కంపెనీ సబ్‌మెర్షన్, ఉష్ణోగ్రత తీవ్రతలు, డ్రాప్స్, వైబ్రేషన్స్, మోటార్ బెంచ్, పంక్చర్ మరియు క్రాష్ టెస్ట్ వంటి కఠినమైన పరీక్షలకు గురిచేస్తుంది.

కొత్త సుజుకి ఈ-యాక్సెస్: స్పెసిఫికేషన్స్ మరియు పనితీరు

కొత్త సుజుకి ఈ-యాక్సెస్ స్కూటర్ ఫిక్స్‌డ్ టైప్ 3 కిలోవాట్ బ్యాటరీ ప్యాక్ పొందుతుంది. ఇది ఒక ఫుల్ ఛార్జితో 95 కిమీ రేంజ్ అందిస్తుందని సమాచారం. ఫోర్డబుల్ ఛార్జర్ ఉపయోగించి.. 6 గంటల 12 నిమిషాల్లో ఫుల్ ఛార్జ్ చేయవచ్చు. ఫాస్ట్ ఛార్జర్ ద్వారా ఫుల్ ఛార్జ్ చేయడానికి పట్టే సమయం 2 గంటల 12 నిముషాలు మాత్రమే. ఇందులో మోటార్ 5.5 హార్స్ పవర్, 15 న్యూటన్ మీటర్ టార్క్ అందిస్తుంది.

సుజుకి ఈ-యాక్సెస్: డిజైన్, ఫీచర్లు మరియు అంచనా ధర

కనెక్టెడ్ కలర్ డిస్‌ప్లే కలిగిన సుజుకి ఈ-యాక్సెస్ స్కూటర్.. రోజువారీ వినియోగానికి చాలా ఉపయోగకరంగా ఉంటుందని తెలుస్తోంది. ఇది సింపుల్ డిజైన్, లేటెస్ట్ ఫీచర్స్ పొందుతుంది. డీలర్‌షిప్‌లు కూడా ఈ స్కూటర్ వినియోగానికి సంబంధించిన వివరాలను కూడా కస్టమర్లకు వెల్లడిస్తారు. అయితే కంపెనీ ఇప్పటి వరకు ఈ స్కూటర్ ధరలను వెల్లడించలేదు. దీని ధర రూ. 1.0 లక్ష నుంచి రూ. 1.20 లక్షల మధ్య ఉంటుందని సమాచారం. ధరలకు సంబంధించిన అధికారిక ప్రకటన కంపెనీ చేయాల్సి ఉంది.

సుజుకి మోటార్‌సైకిల్ ఇండియా గురించి

జపాన్‌కు చెందిన సుజుకి మోటార్‌సైకిల్ కంపెనీ.. ఫిబ్రవరి 2006లో హర్యానాలోకి గురుగ్రామ్‌లోని ఖేర్కి దౌలాలోని దాని తయారీ ప్లాంట్ నుంచి కార్యకలాపాలను ప్రారంభించింది. ఈ ప్లాన్ వార్షిక వృద్ధి 13 లక్షల యూనిట్లు కావడం గమనార్హం. ఈ ప్లాంట్‌లో 125 సీసీ స్కూటర్లు, 150 సీసీ మోటార్‌సైకిల్స్ లేదా అంతకంటే ఎక్కువ సీసీ బైకులను తయారు చేస్తుంది.

May 27, 2025
ఫోక్స్‌వ్యాగన్ కొత్త కారు ఇదే: ధర మరియు పూర్తి వివరాలు ఇవే..
Volkswagen Golf GTI India Launch: చెప్పినట్లుగానే ఫోక్స్‌వ్యాగన్.. తన ‘గోల్ఫ్ జీటీఐ’ కారును ఇండియన్ మార్కెట్లో లాంచ్ చేసింది. ఈ లేటెస్ట్ ఫోక్స్‌వ్యాగన్ కారు గురించి మరిన్ని వివరాలు ఈ కథనంలో తెలుసుకుందాం.

ధర మరియు బుకింగ్స్

కంపెనీ లాంచ్ చేసిన ఈ కొత్త ఫోక్స్‌వ్యాగన్ గోల్ఫ్ జీటీఐ కారు ధర రూ. 53 లక్షలు (ఎక్స్ షోరూమ్, ఇండియా). ఇది సీబీయూ (కంప్లీట్ బిల్డ్ యూనిట్) మార్గం ద్వారా దేశంలోకి వస్తుంది, ఈ కారణంగానే దీని ధర అధికంగా ఉంటుంది.

దేశీయ విఫణిలో అడుగుపెట్టిన ఈ కారు.. ప్రారంభంలో 150 యూనిట్లకు మాత్రమే పరిమితమైంది. అంటే ఈ కారును కేవలం 150 మంది మాత్రమే కొనుగోలు చేయడానికి అర్హులు. దీని కోసం బుకింగ్స్ స్వీకరించడం కూడా ప్రారంభించింది. కాగా ఇప్పుడు మరో 100 యూనిట్లను విక్రయించనున్నట్లు కంపెనీ వెల్లడించింది. డెలివరీలు త్వరలోనే ప్రారంభమవుతాయి.

ఆకర్షణీయమైన ఎక్స్‌టీరియర్ డిజైన్

లేటెస్ట్ డిజైన్ కలిగిన కొత్త ఫోక్స్‌వ్యాగన్ గోల్ఫ్ జీటీఐ కారు ప్రకాశవంతమైన లైటింగ్ సెటప్‌ను పొందుతుంది. దీని ముఖ్యమైన ఎక్స్‌టీరియర్ ఫీచర్లు:
- ఎల్ఈడీ మ్యాట్రిక్స్ హెడ్‌లైట్స్
- సన్నని డీఆర్ఎల్ (డేటైమ్ రన్నింగ్ లైట్స్)
- స్పోర్టీ డిజైన్ బంపర్
- ఎక్స్-షేప్ ఎల్ఈడీ ఫాగ్ లైట్
- గ్రిల్ మీద జీటీఐ బ్యాడ్జ్
- ఫ్రంట్ డోర్స్ మరియు టెయిల్‌గేట్‌పై జీటీఐ బ్యాడ్జ్
- 18 ఇంచెస్ డ్యూయెల్ టోన్ అల్లాయ్ వీల్స్
- రెడ్ బ్రేక్ కాలిపర్స్
- ఎల్ఈడీ టెయిల్ లైట్స్
- రూఫ్ స్పాయిలర్
- రెండు ఎగ్జాస్ట్ టిప్స్
ప్రీమియం ఇంటీరియర్ మరియు ఫీచర్లు

ఇంటీరియర్ విషయానికి వస్తే, ఫోక్స్‌వ్యాగన్ గోల్ఫ్ జీటీఐ లోపల ఆకట్టుకునే ఫీచర్లు ఉన్నాయి:
- హెడ్‌రెస్ట్‌పై రెడ్ కలర్ జీటీఐ స్టిచ్చింగ్ కలిగిన స్పోర్ట్స్ సీట్లు (మధ్యలో సిగ్నేచర్ టార్టన్ ఇన్సర్ట్‌లతో)
- లెదర్‌తో చుట్టబడిన స్టీరింగ్ వీల్
- 12.9 ఇంచెస్ టచ్‌స్క్రీన్ ఇన్ఫోటైన్‌మెంట్ సిస్టమ్
- 10.25 ఇంచెస్ డిజిటల్ ఇన్‌స్ట్రుమెంట్ క్లస్టర్
- సన్‌రూఫ్
- వైర్‌లెస్ ఛార్జర్
- త్రీ జోన్ క్లైమేట్ కంట్రోల్
- ప్యాడిల్ షిఫ్టర్లు
- 30 కలర్ యాంబియంట్ లైటింగ్
- హీటెడ్ ఫ్రంట్ సీట్లు
కలర్ అషన్స్ & సేఫ్టీ ఫీచర్స్

కొత్త ఫోక్స్‌వ్యాగన్ గోల్ఫ్ జీటీఐ కారు నాలుగు ఆకర్షణీయమైన రంగుల ఆప్షన్లలో లభిస్తుంది:

కలర్ ఆప్షన్స్:
- గ్రెనడిల్లా బ్లాక్
- కింగ్స్ రెడ్
- మూన్‌స్టోన్ గ్రే
- ఓరిక్స్ వైట్
భద్రత విషయంలో కూడా ఈ కారు అనేక అధునాతన ఫీచర్లతో వస్తుంది:

సేఫ్టీ ఫీచర్స్:
- ఏడు ఎయిర్‌బ్యాగ్‌లు
- రియర్ వ్యూ కెమెరా
- టైర్ ప్రెజర్ మానిటరింగ్ సిస్టం (TPMS)
- ఐసోఫిక్స్ యాంకర్లు
- ఆటో ఎమర్జెన్సీ బ్రేకింగ్
- లేన్ చేంజ్ అసిస్ట్
- రియర్ ట్రాఫిక్ అలర్ట్
- లెవెల్ 2 ఏడీఏఎస్ (అడ్వాన్స్‌డ్ డ్రైవర్ అసిస్టెన్స్ సిస్టమ్స్)
ఇంజిన్ మరియు పనితీరు

ఇక ప్రధానంగా చెప్పుకోదగ్గది ఇంజిన్. ఫోక్స్‌వ్యాగన్ గోల్ఫ్ జీటీఐ కారు 2.0 లీటర్ ఫోర్ సిలిండర్ టర్బో పెట్రోల్ ఇంజిన్‌తో వస్తుంది. ఈ ఇంజిన్ 265 హార్స్ పవర్ మరియు 370 న్యూటన్ మీటర్ టార్క్ ప్రొడ్యూస్ చేస్తుంది.

ఇది 7 స్పీడ్ డ్యూయెల్ క్లచ్ ఆటోమాటిక్ (DSG) ట్రాన్స్‌మిషన్‌తో జతచేయబడి ఉంటుంది. ఈ కారు కేవలం 5.9 సెకన్లలో గంటకు 0 నుంచి 100 కిలోమీటర్ల వేగాన్ని అందుకుంటుంది. దీని టాప్ స్పీడ్ గంటకు 250 కిలోమీటర్లు.
May 26, 2025
26 ఏళ్ల కొడుకు ఇచ్చిన గిఫ్ట్: కన్నీళ్లు పెట్టుకున్న తండ్రి

Son Gifts To Dad His Restored Royal Enfield Bullet: మన ప్రియమైనవారికి నచ్చిన గిఫ్ట్ ఇచ్చి సంతోషపెట్టడంలో ఉన్న ఆనందం మాటలకు అందనిది. ఆ అనుభూతి అనుభవించినవారికి మాత్రమే తెలుస్తుంది. ఇటీవల ఓ కొడుకు తన తండ్రికి ఇష్టమైన బైకుని ఇచ్చి సంతోషపెట్టాడు. దీనికి సంబంధించిన ఒక వీడియో కూడా సోషల్ మీడియాలో తెగ వైరల్ అవుతోంది.

తండ్రి పుట్టినరోజుకు కొడుకు గిఫ్ట్

కేరళకు చెందిన వ్యక్తి 60వ పుట్టిన రోజుకు, తన కొడుకు ఒక రాయల్ ఎన్‌ఫీల్డ్ బుల్లెట్ బైక్ గిఫ్ట్ ఇచ్చాడు. నిజానికి ఈ బుల్లెట్ బైక్ ఆ తండ్రి దశాబ్దాల క్రితం కొనుగోలు చేసి ఉపయోగించిందే. ఆ బైకంటే తన తండ్రికి ఎంతో ఇష్టం కావడంతో, ఆ కొడుకు ఆ బండిని మళ్ళీ కొత్త బుల్లెట్ మాదిరిగానే తయారు చేయించాడు.

పాత జ్ఞాపకాలకు కొత్త జీవం

తన తండ్రి బుల్లెట్ బైకును మళ్ళీ కొత్తదానిలాగా చేయడానికి తన స్నేహితుల సహాయం కూడా తీసుకున్నాడు. సరిగ్గా తన తండ్రి పుట్టిన రోజు నాడే గిఫ్ట్ ఇవ్వాలని ముందుగానే ప్లాన్ వేసుకున్నాడు. అదే రోజున బుల్లెట్ బైకు తీసుకుని ఇంటికి వచ్చాడు.

ఆనందభాష్పాలు చిందించిన తండ్రి

బైక్ చూసిన ఆనందంతో ఆ తండ్రి కొడుకుని కౌగలించుకుని కన్నీళ్లు పెట్టుకున్నాడు. తండ్రి కొడుకులు ఆనంద బాష్పాలు కారుస్తుంటే, తల్లి కూడా కన్నీళ్లు పెట్టుకుంది. ఈ సంఘటన చూపరులను కూడా మంత్రముగ్ధుల్ని చేసింది.

సోషల్ మీడియాలో వైరల్ అవుతున్న వీడియో

ఆ తండ్రి ఒకప్పుడు ఉపయోగించిన బైకు నెంబర్ కూడా యధావిధిగా ఉండటం చూడవచ్చు. తండ్రి కోసం కొడుకు ఆ బైకును మళ్ళీ ఎలా కొత్తదానిలా మార్చాడో తెలియజేసే వీడియో కూడా సోషల్ మీడియాలో వైరల్ అవుతోంది. కేరళలోని తిరూర్‌లో ఆ పాత బైకును మళ్ళీ కొత్తదానిలా మార్చినట్లు తెలుస్తోంది.

నిజానికి తల్లిదండ్రులకు నచ్చిన గిఫ్ట్స్ ఇచ్చి సంతోషపెట్టిన సంఘటనలు గతంలో కూడా చాలానే వెలుగులోకి వచ్చాయి. అయితే ఇప్పుడు సోషల్ మీడియాలో వైరల్ అయిన ఈ సంఘటన మాత్రం అందరినీ ఆకట్టుకుంది. ఒక్కమాటలో చెప్పాలంటే, ఈ ఘటన చాలామంది హృదయాలను తాకింది.

రాయల్ ఎన్‌ఫీల్డ్ బుల్లెట్

భారతదేశంలో రాయల్ ఎన్‌ఫీల్డ్ అనేది కేవలం బ్రాండ్ కాదు, అది బైక్ ప్రేమికుల ఫీలింగ్. దశాబ్దాల చరిత్ర ఉన్న ఈ కంపెనీ, మార్కెట్లో వివిధ ఇంజిన్ ఆప్షన్లలో బైకులను లాంచ్ చేస్తూనే ఉంది. అయితే మార్కెట్లో ఎన్ని బైకులను కంపెనీ లాంచ్ చేసినా, బుల్లెట్ బైకుకు మాత్రం ఓ ప్రత్యేకమైన ఆదరణ ఉంది. ఈ కారణంగానే చాన్నాళ్లుగా ఎంతోమంది బైక్ ప్రేమికులు ఇష్టపడి కొనుగోలు చేస్తూనే ఉన్నారు. ఈ నాటికి కూడా ఈ బైకుని ఇష్టపడేవారు చాలామందే ఉన్నారని చెప్పడంలో ఎటువంటి అతిశయోక్తి లేదు.

భారత మార్కెట్లో రాయల్ ఎన్‌ఫీల్డ్ బైకులు

ప్రస్తుతం ఇండియన్ మార్కెట్లో రాయల్ ఎన్‌ఫీల్డ్ కంపెనీ లాంచ్ చేసిన బైకుల జాబితాలో బుల్లెట్ 350 బైక్ మాత్రమే కాకుండా, హంటర్ 350, క్లాసిక్ 650, స్క్రామ్ 440, బేర్ 650, క్లాసిక్ 350, గెరిల్లా 450, షాట్‌గన్ 650, హిమాలయన్ 450, మీటియోర్ 350, కాంటినెంటల్ జీటీ 650, సూపర్ మీటియోర్ 650 మరియు ఇంటర్‌సెప్టర్ 650 వంటివి ఉన్నాయి.

May 25, 2025
సిద్దమవుతున్న కొత్త ఎలక్ట్రిక్ బైక్: రూ. లక్ష కంటే తక్కువలోనే!
Oben Electric Upcoming Bike: 2025 నాటికి ఎలక్ట్రిక్ బైక్ లేదా స్కూటర్ కొనుగోలు చేయాలంటే కనీసం లక్ష రూపాయలు ఖర్చు చేయాల్సిన పరిస్థితి. అయితే, బెంగళూరుకు చెందిన స్టార్టప్ కంపెనీ ఒబెన్ ఎలక్ట్రిక్, ఈ అంచనాలను తలకిందులు చేస్తూ లక్ష రూపాయల కంటే తక్కువ ధరలో ఓ సరికొత్త ఎలక్ట్రిక్ బైక్‌ను మార్కెట్లోకి తీసుకురావడానికి సన్నాహాలు చేస్తోంది. ఆ బైక్ విశేషాలు, ఫీచర్లు, మరియు అంచనాలు ఈ కథనంలో తెలుసుకుందాం.

ఒబెన్ ఎలక్ట్రిక్ ప్రణాళిక: ‘0100’ ప్లాట్‌ఫామ్‌పై కొత్త ఆవిష్కరణ

ఒబెన్ ఎలక్ట్రిక్ కంపెనీ ఇప్పటికే మార్కెట్లో ఓ ఎలక్ట్రిక్ బైకును విజయవంతంగా లాంచ్ చేసి, మంచి అమ్మకాలను నమోదు చేసుకుంది. ఈ ఉత్సాహంతో, త్వరలోనే ‘0100’ అనే వినూత్న ప్లాట్‌ఫామ్‌పై మరో కొత్త బైకును, అది కూడా అందరికీ అందుబాటులో ఉండే ధరలో విడుదల చేయాలని లక్ష్యంగా పెట్టుకుంది. ఈ రాబోయే బైక్, సుమారుగా 100 cc పెట్రోల్ బైక్‌కు సమానమైన పనితీరును అందిస్తుందని అంచనా. అయితే, దీనికి సంబంధించిన అధికారిక ప్రకటన ఇంకా వెలువడాల్సి ఉంది.

0100 ప్లాట్‌ఫామ్ ప్రత్యేకతలు

‘0100’ ప్లాట్‌ఫామ్ మాడ్యూలర్ మరియు స్కేలబుల్ డిజైన్‌తో రూపొందించబడింది. దీని అర్థం, అవసరాన్ని బట్టి బ్యాటరీ ప్యాక్ సైజును మార్చుకునే వెసులుబాటు ఉండొచ్చు. కంపెనీ ఈ బైక్‌ను వివిధ బ్యాటరీ సామర్థ్యాలతో (బహుశా 2.6 కిలోవాట్ మరియు 4.4 కిలోవాట్ బ్యాటరీ ఆప్షన్లతో) మల్టిపుల్ వేరియంట్లలో లాంచ్ చేసే అవకాశం ఉంది. ధరలు మరియు ఇతర సాంకేతిక వివరాలు అధికారిక ప్రకటన ద్వారా వెల్లడి కానున్నాయి.

లక్ష రూపాయల లోపు నాణ్యమైన ఎలక్ట్రిక్ బైక్ సాధ్యమేనా?

ప్రస్తుతం భారతీయ మార్కెట్లో లక్ష రూపాయల కంటే తక్కువ ధరలో లభించే టూవీలర్లు చాలా తక్కువ. ఒకవేళ ఉన్నా, అవి డిజైన్ మరియు ఫీచర్ల విషయంలో కొనుగోలుదారులను అంతగా ఆకట్టుకోలేకపోతున్నాయి. అయితే, ఒబెన్ ఎలక్ట్రిక్ లాంచ్ చేయనున్న ఈ కొత్త బైక్ ఆకర్షణీయమైన డిజైన్‌తో పాటు, వాహన వినియోగదారులకు అవసరమైన దాదాపు అన్ని ఆధునిక ఫీచర్లను కలిగి ఉంటుందని సమాచారం. ఇది మార్కెట్లో ఒక కొత్త ట్రెండ్‌కు శ్రీకారం చుట్టే అవకాశం ఉంది.

వాహన ప్రియులకు శుభవార్త

ఎలక్ట్రిక్ బైక్ కొనాలనే ఆసక్తి ఉన్నప్పటికీ, అధిక ధరల కారణంగా చాలామంది వెనుకడుగు వేస్తున్నారు. ధరలు తగ్గినప్పుడు కొనుగోలు చేద్దామని ఎదురుచూస్తున్న వారి సంఖ్య కూడా ఎక్కువే. అలాంటి వారి కోసమే ఒబెన్ ఎలక్ట్రిక్ ఈ చౌకైన బైకును తీసుకురావడానికి ప్రయత్నిస్తోంది. అయితే, ఈ బైక్ ఎప్పుడు మార్కెట్లోకి వస్తుందనే కచ్చితమైన తేదీని కంపెనీ ఇంకా అధికారికంగా ప్రకటించలేదు.

ఎలక్ట్రిక్ బైక్‌ల వల్ల కలిగే ప్రయోజనాలు

భారతదేశంలో ఎలక్ట్రిక్ బైక్‌ల వాడకం క్రమంగా పెరుగుతోంది. దీనికి ప్రధాన కారణాలు అనేకం ఉన్నాయి:
- పర్యావరణ పరిరక్షణ: పెట్రోల్ వాహనాలతో పోలిస్తే ఇవి వాయు కాలుష్యాన్ని గణనీయంగా తగ్గిస్తాయి.
- తక్కువ నిర్వహణ ఖర్చులు: ఎలక్ట్రిక్ బైక్‌లకు మెయింటెనెన్స్ చాలా తక్కువ. ఇంజిన్ ఆయిల్ మార్చడం, స్పార్క్ ప్లగ్స్ వంటి సమస్యలు ఉండవు.
- ఖర్చు ఆదా: ఉదాహరణకు, ఒక ఎలక్ట్రిక్ బైక్ సింగిల్ ఛార్జ్‌తో 100 కిలోమీటర్ల రేంజ్ అందిస్తే, దీనికి అయ్యే కరెంట్ ఖర్చు సుమారు 20-30 రూపాయలు మాత్రమే (యూనిట్ ధరను బట్టి). అదే పెట్రోల్ బైక్ 100 కిలోమీటర్లు ప్రయాణించాలంటే కనీసం 150 రూపాయలు ఖర్చు అవుతుంది.
- ట్రెండ్ మరియు ఆధునికత: కొత్త టెక్నాలజీని ఇష్టపడేవారు, పర్యావరణ స్పృహ కలిగినవారు ఎలక్ట్రిక్ వాహనాల వైపు మొగ్గు చూపుతున్నారు.
ఒబెన్ ఎలక్ట్రిక్ తీసుకురాబోయే ఈ కొత్త, తక్కువ ధర బైక్ మార్కెట్లో ఎలాంటి స్పందనను పొందుతుందో చూడాలి. ఖచ్చితంగా ఇది ఎలక్ట్రిక్ వాహన రంగంలో ఒక మైలురాయిగా నిలిచే అవకాశం ఉంది.
May 24, 2025
యాపిల్‌ను తాకిన ట్రంప్ టారిఫ్స్: ఆ ఐఫోన్లపై 25 శాతం సుంకం

Trump 25 Percent Tariff On Apple: అమెరికా అధ్యక్షుడిగా డొనాల్డ్ ట్రంప్ (Donald Trump) బాధ్యతలు స్వీకరించినప్పటి నుంచి ప్రపంచ దేశాలపై అధిక సుంకాలను విధించిన సంగతి అందరికీ తెలిసిందే. ఈ సుంకాల కారణంగానే స్టాక్ మార్కెట్లు సైతం కుప్పకూలిపోయాయి. చైనా మాత్రం వెనక్కి తగ్గేదేలే అన్నట్లు అమెరికాపై విరుచుకుపడి సుంకాలను అమాంతం పెంచుకుంటూ పోయింది. అమెరికా కూడా చైనాకు బుద్ధిచెప్పాలనే క్రమంలో సుంకాలను అంతకంతకూ పెంచుకుంటూ పోయింది. అయితే ఈ మధ్యకాలంలో ఈ రెండు దేశాలు సుంకాలను దాదాపు తగ్గించుకున్నాయి. కానీ ట్రంప్ సుంకాల ప్రభావం ఇప్పుడు యాపిల్ కంపెనీ మీద పడింది.

అమెరికా బయట తయారీ చేస్తే 25% సుంకం

యాపిల్ కంపెనీ అమెరికాలో తన ఉత్పత్తులను తయారు చేయనియెడల భారీ సుంకాలు చెల్లించాల్సి ఉంటుందని శుక్రవారం డొనాల్డ్ ట్రంప్ పేర్కొన్నారు. భారతదేశంలోనో లేదా ఇతర దేశాల్లోనూ యాపిల్ తమ ఉత్పత్తులను తయారు చేసి అమెరికాకు దిగుమతి చేసుకుంటే 25 శాతం సుంకాలను విధించాల్సి ఉంటుందని ట్రంప్ స్పష్టం చేశారు.

ఐఫోన్ ధరలపై సుంకాల ప్రభావం

ప్రస్తుతం అమెరికాలో యాపిల్ ఐఫోన్ విలువ 1200 డాలర్ల (రూ.1.02 లక్షలు) వరకు ఉంది. 25 శాతం సుంకాలను విధిస్తే వీటి ధరలు 1500 డాలర్ల నుంచి 2000 డాలర్లకు చేరే అవకాశం ఉంటుంది.

భారత్‌లో యాపిల్ ప్రణాళికలకు అడ్డంకి?

డొనాల్డ్ ట్రంప్ చైనాపై అధిక సుంకాలను విధించిన తరువాత యాపిల్ కంపెనీ భారతదేశంలో తమ ఉత్పత్తులను గణనీయంగా పెంచాలని సంకల్పించింది. అయితే దీనికి ఇప్పుడు ట్రంప్ సుంకాలు అడ్డుపడుతున్నాయి. కాబట్టి యాపిల్ కంపెనీ సుంకాల కారణంగా అమెరికాలోనే ఉత్పత్తులను పెంచుతుందా?, సుంకాలను పక్కన పెట్టి భారతదేశంలోనే ఉత్పత్తులను పెంచుతుందా?, అనే విషయం తెలియాల్సి ఉంది.

“మేడ్ ఇన్ అమెరికా”కు ప్రాధాన్యత..

యాపిల్ కంపెనీ ప్రస్తుతం అమెరికాలో ఐమ్యాక్, ఐప్యాడ్, ఎయిర్‌పాడ్, యాపిల్ వాచ్ వంటి వాటిని ఉత్పత్తి చేస్తోంది. వీటన్నిటికీ కంపెనీ ప్రత్యేకంగా సుంకాలను చెల్లించాల్సిన అవసరం లేదు. ఎందుకంటే అవన్నీ “మేడ్ ఇన్ అమెరికా” ఉత్పత్తులు. అదే అమెరికా వెలుపల యాపిల్ తన ఉత్పత్తులను ఉత్పత్తి చేసి దిగుమతి చేసుకుంటే భారీ మూల్యం చెల్లించాల్సి ఉంటుందని ట్రంప్ స్పష్టంగా వెల్లడించారు. అమెరికాలోనే దాదాపు అన్ని కంపెనీలు తమదేశంలోనే ఉత్పత్తులను పెంచాలని, కావాలంటే కొత్త ప్లాంట్స్ కూడా ఏర్పాటు చేసుకోవాలని ట్రంప్ చెబుతున్నారు. ఈ కారణంగానే ఇప్పుడు యాపిల్ వేరే దేశాలకు తరలి వెళ్లకుండా ఉండటానికే 25 శాతం సుంకాలను చెల్లించాల్సి ఉంటుందని అన్నారు.

ప్రపంచ మార్కెట్‌లో యాపిల్ హవా

ప్రపంచ మార్కెట్లో యాపిల్ ఉత్పత్తులకు మంచి డిమాండ్ ఉంది. దీనిని దృష్టిలో ఉంచుకుని కంపెనీ ప్రతి ఏటా కొత్త ఉత్పత్తులను పరిచయం చేయడం లేదా ఉన్న ఉత్పత్తులనే గణనీయంగా పెంచడం వంటివి చేస్తోంది. దీంతో యాపిల్ ఉత్పత్తులను కొనుగోలు చేసేవారి సంఖ్య కూడా విపరీతంగా పెరిగింది.

ఐఫోన్ ప్రత్యేకత: స్టేటస్ మరియు భద్రత

ఐఫోన్ అంటే కేవలం స్టేటస్ మాత్రమే కాదు, సెక్యూర్ అని భావించే చాలామంది నేడు ఐఫోన్స్ ఉపయోగిస్తున్నారు. రాబోయే రోజుల్లో ఈ సంఖ్య భారీగా పెరుగుతుందని స్పష్టంగా తెలుస్తోంది.

May 24, 2025
కియా కారెన్స్ క్లావిస్ ధరలు తెలిసిపోయాయ్: ఇదిగో ఫుల్ డీటెయిల్స్
Kia Carens Clavis Launched: ఎప్పుడెప్పుడా అని వేయి కళ్ళతో ఎదురు చూస్తున్న ‘కియా కారెన్స్ క్లావిస్’ ధరలు అధికారికంగా వెల్లడైపోయాయి. కంపెనీ ఈ కారు కోసం ఇప్పటికే రూ.25,000 టోకెన్ మొత్తంతో బుకింగ్స్ స్వీకరించడం కూడా ప్రారభించేసింది. ఇది స్టాండర్డ్ కారెన్స్ కారుతో పాటు విక్రయానికి ఉంటుంది.

వేరియంట్స్ & ధరలు

కొత్త కియా కారెన్స్ క్లావిస్ మొత్తం ఏడు వేరియంట్లలో లభిస్తుంది. ధరలు రూ. 11.50 లక్షల నుంచి రూ. 18.00 లక్షల (ఎక్స్ షోరూమ్) మధ్య ఉన్నాయి. ఇవన్నీ 7 సీటర్ మరియు 6 సీటర్ రూపంలో అమ్మకానికి ఉంటాయి. అయితే కంపెనీ వీటిని పెట్రోల్, టర్బో పెట్రోల్ మరియు డీజిల్ ఇంజిన్ ఎంపికలతో అందిస్తుంది.

డిజైన్ మరియు ఎక్స్‌టీరియర్

కియా కారెన్స్ క్లావిస్ పూర్తిగా కొత్త డిజైన్ పొందుతుంది. ముందు భాగంలో త్రిభుజాకారంలో ఫిక్స్ చేయబడిన మూడు ఎల్ఈడీ హెడ్‌లైట్స్ ఉన్నాయి. వీ షేప్ ఎల్ఈడీ డీఆర్ఎల్, బ్లాక్డ్ ఆఫ్ గ్రిల్, సిల్వర్ స్కిడ్ ప్లేట్‌లతో కూడిన బ్లాక్ క్లాడింగ్ వంటివన్నీ ఇక్కడ కనిపిస్తాయి. వీల్ ఆర్చెస్ మరియు డోర్స్ వరకు బ్లాక్ క్లాడింగ్ ఉండటం చూడవచ్చు. సిల్హౌట్ అలాగే ఉంది. డ్యూయెల్ టోన్ 17 ఇంచెస్ అల్లాయ్ వీల్స్, క్రోమ్ డోర్ హ్యాండిల్స్, సిల్వర్ రూఫ్ రెయిల్ కోసం కొత్త డిజైన్.. వెనుక భాగంలో ఎల్ఈడీ లైట్స్ ఉన్నాయి. అయితే రియర్ ప్రొఫైల్ దాదాపు.. కారెన్స్ మాదిరిగానే ఉన్నట్లు తెలుస్తోంది.

ఇంటీరియర్ ఫీచర్లు

సరికొత్త కియా కారెన్స్ క్లావిస్ ఎంపీవీ ఫీచర్స్ విషయానికి వస్తే, ఇందులో అనేక ఆకర్షణీయమైన అంశాలు ఉన్నాయి:
- 22.62 ఇంచెస్ డ్యూయెల్ స్క్రీన్ సెటప్ (డిజిటల్ ఇన్‌స్ట్రుమెంట్ క్లస్టర్, టచ్‌స్క్రీన్ ఇన్ఫోటైన్‌మెంట్ స్క్రీన్). ఇది కియా సెల్టోస్ కారులో కూడా కనిపిస్తుంది.
- వెంటిలేటెడ్ ఫ్రంట్ సీట్స్
- రీ డిజైన్ చేయబడిన ఏసీ వెంట్స్
- ఆటోమాటిక్ ఎయిర్ కండిషనింగ్ కోసం కంట్రోల్స్
- డ్యూయెల్ పేన్ పనోరమిక్ సన్‌రూఫ్
- ఫోర్ వే పవర్ అడ్జస్టబుల్ సీట్లు
- వైర్‌లెస్ ఆండ్రాయిడ్ ఆటో మరియు ఆపిల్ కార్‌ప్లే
- 8 స్పీకర్ బోస్ (Bose) సౌండ్ సిస్టం
సేఫ్టీ ఫీచర్స్

కారు అనగానే మైలేజ్ మాత్రమే కాదు సేఫ్టీ ఫీచర్స్ కూడా ప్రధానమే. దీనిని దృష్టిలో ఉంచుకుని కియా మోటార్స్ తన కారెన్స్ క్లావిస్ కారులో ఆధునిక సేఫ్టీ ఫీచర్స్ ప్రవేశపెట్టింది. అవి:
- లెవల్ 2 ఏడీఏఎస్ (ADAS)
- 360 డిగ్రీ కెమెరా
- బ్లైండ్ స్పాట్ మానిటరింగ్
- లేన్ కీప్ అసిస్ట్
- రియర్ క్రాస్ ట్రాఫిక్ అలర్ట్
- ఆరు ఎయిర్‌బ్యాగులు
- ఏబీఎస్ విత్ ఈబీడీ
- హిల్ స్టార్ట్ అసిస్ట్
- టైర్ ప్రెజర్ మానిటరింగ్ సిస్టం
- నాలుగు డిస్క్ బ్రేకులు
ఇవన్నీ ప్రయాణికులకు భద్రత కల్పించడంలో సహాయపడతాయి.

ఇంజిన్ ఆప్షన్స్ మరియు పనితీరు

కియా కారెన్స్ క్లావిస్ మొత్తం మూడు ఇంజిన్ ఆప్షన్స్ పొందుతుంది. అవి:
- 1.5 లీటర్ టర్బో పెట్రోల్ ఇంజిన్: 157 హార్స్ పవర్ & 253 Nm టార్క్ ఉత్పత్తి చేస్తుంది.
- 1.5 లీటర్ న్యాచురల్లీ ఆస్పిరేటెడ్ పెట్రోల్ ఇంజిన్: 113 హార్స్ పవర్ & 143.8 Nm టార్క్ అందిస్తుంది.
- 1.5 లీటర్ డీజిల్ ఇంజిన్: 113 హార్స్ పవర్ & 250 న్యూటన్ మీటర్ టార్క్ అందిస్తుంది.
ఇవన్నీ మాన్యువల్ మరియు ఆటోమాటిక్ ట్రాన్స్‌మిషన్ ఆప్షన్స్ పొందుతాయి.

మార్కెట్లో పోటీదారులు

ఇండియన్ మార్కెట్లో ఎంపీవీలకు మంచి డిమాండ్ ఉంది. కాబట్టి కియా యొక్క కొత్త కారెన్స్ క్లావిస్ మంచి అమ్మకాలు పొందుతుందని భావిస్తున్నాము. అయితే అమ్మకాల పరంగా ఇది మారుతి సుజుకి ఎక్స్ఎల్6, టయోటా ఇన్నోవా క్రిష్టా, ఇన్నోవా హైక్రాస్, మారుతి సుజుకి ఇన్విక్టో వంటి వాటికి ప్రధాన ప్రత్యర్థిగా ఉంటుంది.
May 23, 2025
రూ.6.89 లక్షల టాటా కారు: తప్పకుండా తెలుసుకోవాల్సిన 5 విషయాలు
2025 Tata Altroz Facelift: భారతదేశంలో అత్యంత ప్రజాదరణ పొందిన దేశీయ వాహన తయారీ దిగ్గజం టాటా మోటార్స్ చెప్పినట్లుగానే.. ఇండియన్ మార్కెట్లో 2025 ఆల్ట్రోజ్ ఫేస్‌లిఫ్ట్ (2025 Altroz Facelift) లాంచ్ చేసింది. కంపెనీ లాంచ్ చేసిన ఈ కొత్త కారు ధర, బుకింగ్స్ మరియు ఇతర వివరాలను ఈ కథనంలో వివరంగా చూసేద్దాం..

1) ధరలు & వేరియంట్స్

టాటా మోటార్స్ లాంచ్ చేసిన కొత్త ఆల్ట్రోజ్ ఫేస్‌లిఫ్ట్ మల్టిపుల్ వేరియంట్లలో లభిస్తుంది. దీని ధరలు రూ. 6.89 లక్షల నుంచి రూ. 11.49 లక్షల (ధరలు ఎక్స్ షోరూమ్) మధ్య ఉంది. ఈ ధరలు స్టాండర్డ్ మోడల్ కంటే రూ. 24000 ఎక్కువ. కాగా కంపెనీ ఈ ప్రీమియం హ్యాచ్‌బ్యాక్ జూన్ 2 నుంచి బుకింగ్స్ స్వీకరించడం ప్రారంభించనుంది. ఆ తరువాత డెలివరీలు ప్రారంభమవుతాయి.

2) డిజైన్

కొత్త 2025 ఆల్ట్రోజ్ ఫేస్‌లిఫ్ట్.. దాని మునుపటి మోడల్స్ కంటే కూడా చాలా ఆకర్షణీయమైన డిజైన్ పొందుతుంది. ఎల్ఈడీ హెడ్‌ల్యాంప్, ఎల్ఈడీ డీఆర్ఎల్, 3డీ ఫినిషింగ్‌తో రీడిజైన్ చేయబడిన బ్లాక్ అల్లాయ్ వీల్స్, ఫ్లష్ ఫిట్టింగ్ డోర్ హ్యాండిల్స్ వంటి వాటితో పాటు.. రియర్ ప్రొఫైల్.. బ్లాక్డ్ అవుట్ టెయిల్‌గేట్ పొందుతుంది. కానీ కొన్ని టాప్ వేరియంట్లలో ఎల్ఈడీ కనెక్టెడ్ టెయిల్‌ల్యాంప్ ఉంటుంది.

3) ఫీచర్స్

ఐదు వేరియంట్లలో లభించే ఫేస్‌లిఫ్టెడ్ టాటా ఆల్ట్రోజ్.. రీడిజైన్ డ్యాష్‌బోర్డ్ లేఅవుట్‌ను పొందుతుంది. ఇందులో ప్రధాన ఫీచర్లు:
- 2 స్పోక్ ఇల్యూమినేటెడ్ స్టీరింగ్ వీల్
- రీడిజైన్డ్ గేర్ లివర్
- రీడిజైన్డ్ ఏసీ వెంట్స్
- రీడిజైన్డ్ ఏసీ కంట్రోల్స్
- 10.25 ఇంచెస్ టచ్‌స్క్రీన్ ఇన్ఫోటైన్‌మెంట్ సిస్టం
- 10.25 ఇంచెస్ ఇన్‌స్ట్రుమెంట్ క్లస్టర్
- 360 డిగ్రీ కెమెరా
- వైర్‌లెస్ స్మార్ట్‌ఫోన్ ఛార్జింగ్
- రియర్ ఏసీ వెంట్స్
- కీలెస్ ఎంట్రీ
- క్రూయిజ్ కంట్రోల్
- బ్లైండ్ స్పాట్ మానిటరింగ్
వంటి మరెన్నో ఫీచర్స్ ఉన్నాయి.

4) పవర్‌ట్రెయిన్

2025 టాటా ఆల్ట్రోజ్ ఫేస్‌లిఫ్ట్ కింది ఇంజిన్ ఎంపికలతో లభిస్తుంది:
- 1.2 లీటర్ త్రీ సిలిండర్ పెట్రోల్: 87 Bhp పవర్, 115 Nm టార్క్
- 1.5 లీటర్ ఫోర్ సిలిండర్ డీజిల్: 88 Bhp పవర్, 200 Nm టార్క్
- CNG ఇంజిన్
ఈ ఇంజిన్స్ 5 స్పీడ్ మాన్యువల్, 6 స్పీడ్ డ్యూయెల్ క్లచ్ ఆటోమాటిక్ మరియు 5 స్పీడ్ ఆటోమాటిక్ గేర్‌బాక్స్ ఆప్షన్స్ పొందుతాయి. ఇవి మీరు ఎంచుకునే వేరియంట్ మీద ఆధారపడి ఉంటుంది.

5) సేఫ్టీ ఫీచర్స్ & ప్రత్యర్థులు

కొత్త 2025 టాటా ఆల్ట్రోజ్ ఫేస్‌లిఫ్ట్ కారులో ఉండే ప్రధాన సేఫ్టీ ఫీచర్లు:
- 6 ఎయిర్‌బ్యాగులు
- ఎలక్ట్రానిక్ స్టెబిలిటీ ప్రోగ్రామ్ (ESP)
- ఏబీఎస్ విత్ ఈబీడీ (ABS with EBD)
- ఇంకా మరెన్నో ఆధునిక సేఫ్టీ ఫీచర్లు.
కంపెనీ యొక్క ఇతర మోడల్స్ మాదిరిగానే ఇది కూడా గొప్ప సేఫ్టీ ఫీచర్స్ పొందుతుందని స్పష్టమవుతోంది. కాగా ఇది ఇండియన్ మార్కెట్లో ఇప్పటికే అమ్మకానికి ఉన్న హ్యుందాయ్ ఐ20, మారుతి సుజుకి బాలెనొ వంటి వాటికి ప్రధాన ప్రత్యర్థిగా ఉంటుంది. కాబట్టి అమ్మకాల పరంగా కొంత పోటీని ఎదుర్కోవాల్సి వస్తుందని భావిస్తున్నాము.
May 23, 2025