Ampere Magnus Neo EV Launched in India: మార్కెట్లో ప్రస్తుతం లెక్కలేనన్ని స్కూటర్లు, బైకులు అందుబాటులో ఉన్నాయి. కానీ ఒక సాధారణ వ్యక్తి ఓ స్కూటర్ కొనుగోలు చేసి ఉపయోగించాలంటే.. కనీసం రూ. 1 లక్ష రూపాయలైన పెట్టాల్సిందే. డబ్బున్నవారికి లక్ష రూపాయాలు పెద్ద విషయమేమీ కాకపోవచ్చు. కానీ కింది తరగతి కుటుంబాలకు మాత్రం చాలా ఎక్కువే. అలాంటి వారు కూడా తమ రోజువారీ వినియోగానికి ఓ స్కూటర్ కలిగి ఉండాలనే ఉద్దేశ్యంతో.. ‘ఆంపియర్’ కంపెనీ తక్కువ ధరతో ‘మాగ్నస్ నియో’ పేరుతో ఒక ఎలక్ట్రిక్ స్కూటర్ వేరియంట్ లాంచ్ చేసింది. దీని ధర లక్ష కంటే తక్కువే. దీని గురించి పూర్తి సమాచారం ఇక్కడ తెలుసుకుందాం.
ధర & కలర్ ఆప్షన్స్
ఆంపియర్ లాంచ్ చేసిన మాగ్నస్ నియో ఎలక్ట్రిక్ స్కూటర్ ధర రూ. 79,999 మాత్రమే (ఎక్స్ షోరూమ్, ఢిల్లీ). ఈ స్కూటర్ డ్యూయెల్ టోన్ ఫినిషింగ్ కలిగి ఎరుపు, తెలుపు, నీలం, బూడిద రంగు మరియు నలుపు అనే ఐదు కలర్ ఆప్షన్లలో లభిస్తుంది. మల్టిపుల్ కలర్ ఆప్షన్లలో లభిస్తుండటం వల్ల.. ఈ స్కూటర్ ఎక్కువమంది వాహన ప్రేమికులను ఆకర్శించే అవకాశం ఉందని ఆశిస్తున్నాము.
బ్యాటరీ అండ్ రేంజ్
ఆంపియర్ మాగ్నస్ నియో ఎలక్ట్రిక్ స్కూటర్ 2.3 కిలోవాట్ లిథియం ఐరన్ ఫాస్పేట్ బ్యాటరీ పొందుతుంది. ఇది ఒక సింగిల్ ఛార్జీతో 70 నుంచి 80 కిమీ రేంజ్ అందిస్తుంది. కాబట్టి ఇది రోజువారీ ప్రయాణానికి, తక్కువ దూరాలకు లేదా నగర ప్రయాణానికి చాలా ఉపయోగకరంగా ఉంటుంది. దాని ఇతర మోడల్స్ కంటే దీని రేంజ్ కొంత తక్కువే అయినప్పటికీ.. ఉత్తమ పనితీరును అందిస్తుందని తెలుస్తోంది.
కొత్త మాగ్నస్ నియో ఎలక్ట్రిక్ స్కూటర్ టాప్ స్పీడ్ గంటకు 65 కిమీ. స్పీడ్ పరంగా ఇది దాని ఇతర వేరియంట్ల కంటే కొంత ఎక్కువే అని తెలుస్తోంది. ఈ బైక్ 10 ఇంచెస్ వీల్స్ కాకుండా 12 ఇంచెస్ వీల్స్ పొందుతుంది. అయితే ఇందులోని అన్ని ఫీచర్స్.. దాదాపు దాని మునుపటి మోడళ్లలో మాదిరిగానే ఉంటాయి. ఇందులో చిన్న డిజిటల్ డ్యాష్ బోర్డు చూడవచ్చు.
ఆంపియర్ మాగ్నస్ నియో ఎలక్ట్రిక్ స్కూటర్ ఫుల్ ఛార్జ్ కావడానికి 5 నుంచి 6 గంటల సమయం పడుతుందని తెలుస్తోంది. ఇందులో మూడు రైడింగ్ మోడ్స్ ఉన్నాయి. రివర్స్ మోడ్ కూడా ఉంది. ఇది రివర్స్ చేసే సమయంలో చాలా ఉపయోగపడుతుంది. కంపెనీ ఈ స్కూటర్ కొనుగోలుపై 5 సంవత్సరాల వ్యారంటీ.. బ్యాటరీ మీద 75000 కిమీ వ్యారంటీ అందిస్తుంది. ప్రస్తుతం మార్కెట్లో ఈ స్కూటర్ అమ్మకానికి ఉంది.
తక్కువ ధరలో బెస్ట్ స్కూటర్
ప్రస్తుతం మాగ్నస్ నియో ఎలక్ట్రిక్ స్కూటర్.. భారతదేశంలో అత్యంత సరసమైన స్కూటర్ల జాబితాలో ఒకటిగా ఉంది. తక్కువ ధరలో ఓ మంచి ఎలక్ట్రిక్ స్కూటర్ కావాలని కోరుకునే వారికి ఇది ఓ మంచి ఆప్షన్ అనే చెప్పాలి. ఇది సింపుల్ డిజైన్ కలిగి, ఆధునిక కాలంలో వాహన వినియోగదారులకు లేదా బైక్ రైడర్లకు అవసరమైన ఫీచర్స్ పొందుతుంది. తద్వారా ఇది అత్యుత్తమ రైడింగ్ అనుభూతిని అందిస్తుంది.
తక్కువ ధరలో మంచి ఎలక్ట్రిక్ స్కూటర్లను అందిస్తున్న కంపెనీలో ఆంపియర్ కూడా ఒకటి. ఇది దేశీయ మార్కెట్లో ఆంపియర్ నెక్సస్, ఆంపియర్ రియో ఎల్ఐ ప్లస్, ఆంపియర్ ప్రైమస్ మరియు ఆంపియర్ జీల్ ఈఎక్స్ అనే స్కూటర్లను విక్రయిస్తోంది. వీటి ధరలు.. ఇతర కంపెనీల స్కూటర్ల ధరల కంటే తక్కువే. కాబట్టి ఈ ఎలక్ట్రిక్ స్కూటర్లను చాలామంది తమ రోజువారీ వినియోగానికి కొనుగోలు చేస్తున్నారు.
Also Read: ఆ సర్టిఫికెట్ ఉంటేనే రిజిస్ట్రేషన్ – కొత్త కారు కొనేవారికి దబిడిదిబిడే
నిజానికి పెట్రోల్ బైకుల కంటే కూడా ఎలక్ట్రిక్ బైకుల మెయింటెన్స్ చాలా తక్కువగా ఉంటుంది. అంతే కాకుండా ఇవి పర్యావరణానికి ఎటువంటి హాని తలపెట్టవు. ఇవి జీరో ఉద్గారాలను విడుదల చేయడం వల్ల వాతావరణంలో కార్బన్ ఉద్గారాలు కూడా తగ్గుతాయి. కాగా ఇప్పుడు మార్కెట్లో ఆంపియర్ లాంచ్ చేసిన మాగ్నస్ నియో ఎలక్ట్రిక్ స్కూటర్ ఎలాంటి అమ్మకాలను పొందుతుందో తెలుసుకోవడానికి కొంతకాలం వేచి ఉండక తప్పదు.
