Home Blog

అక్కినేని అఖిల్ ‘లెనిన్’ సినిమా టీజర్ చూశారా?

Shaurya Vardhan
-
0

లెనిన్ టీజర్‌ను చిత్రబృందం శనివారం విడుదల చేసింది. అఖిల్ అక్కినేని హీరోగా, మురళీకిశోర్ అబ్బూరు దర్శకత్వంలో తెరకెక్కుతున్న ఈ చిత్రం జూన్ 26న ప్రేక్షకుల ముందుకు రానుంది. భాగ్యశ్రీ బోర్సే కథానాయికగా నటిస్తున్న ఈ సినిమాకు సంబంధించిన టీజర్‌ను నాగార్జున ఇండస్ట్రీలోకి వచ్చి 40 ఏళ్లు పూర్తైన సందర్భంగా విడుదల చేయడం ప్రత్యేక ఆకర్షణగా నిలిచింది.

టాలీవుడ్‌లో యువ హీరోగా తనకంటూ ప్రత్యేక గుర్తింపు తెచ్చుకునేందుకు ప్రయత్నిస్తున్న అఖిల్ అక్కినేని, ఈసారి పూర్తి మాస్ యాక్షన్ మరియు ఎమోషనల్ ఎలిమెంట్స్‌తో ప్రేక్షకుల ముందుకు వస్తున్నట్లు టీజర్ చూస్తే అర్థమవుతోంది.

మనోడు వస్తున్నాడు..

తాజాగా రిలీజైన టీజర్‌లో అఖిల్ చెప్పిన డైలాగులు అభిమానులను విశేషంగా ఆకట్టుకుంటున్నాయి. ముఖ్యంగా “మనోడు వస్తున్నాడు..”, “నేను తప్పిపోయి రాలేదు.. మీ అందరినీ వెతుక్కుంటూ వచ్చా” అనే డైలాగులు సోషల్ మీడియాలో వైరల్ అవుతున్నాయి.

ఈ చిత్రంపై ఇప్పటికే సినీ వర్గాల్లో.. భారీ అంచనాలు నెలకొన్నట్లు స్పష్టమవుతోంది. గత సినిమాల కంటే భిన్నమైన పాత్రలో అఖిల్ కనిపిస్తున్నట్లు టీజర్ ద్వారా స్పష్టమవుతోంది. యాక్షన్‌తో పాటు భావోద్వేగాలకు కూడా ప్రాధాన్యం ఇచ్చినట్లు కనిపిస్తోంది. మాస్ ప్రేక్షకులను దృష్టిలో పెట్టుకుని తెరకెక్కించిన ఈ సినిమా అఖిల్ కెరీర్‌లో కీలక మలుపు కావచ్చని అభిమానులు భావిస్తున్నారు.

నాగార్జున షేర్ చేసిన ‘లెనిన్’ టీజర్

నాగార్జున అక్కినేని తన సోషల్ మీడియా ఖాతా ద్వారా ‘లెనిన్’ టీజర్‌ను అభిమానులతో పంచుకున్నారు. “నాకు సర్‌ప్రైజ్ ఇచ్చాడు” అంటూ.. ఆయన చేసిన కామెంట్ అభిమానులను ఆకట్టుకుంది. టీజర్ చూస్తున్నంతసేపు చాలా హాయిగా అనిపించిందని నాగార్జున పేర్కొన్నారు.

నాగార్జున ఇండస్ట్రీలోకి అడుగుపెట్టి 40 ఏళ్లు పూర్తవుతున్న సందర్భంగా ఈ టీజర్ విడుదల కావడం అభిమానులకు ప్రత్యేక అనుభూతిని కలిగించింది. అక్కినేని కుటుంబ అభిమానులు ఈ సందర్భంగా సోషల్ మీడియాలో నాగార్జునకు శుభాకాంక్షలు తెలుపుతున్నారు.

అఖిల్ పాత్రపై పెరిగిన ఆసక్తి

‘లెనిన్’ టీజర్ విడుదల తర్వాత సినిమాలో అఖిల్ పాత్రపై ఆసక్తి పెరిగింది. టీజర్‌లో కనిపించిన లుక్స్, బాడీ లాంగ్వేజ్, యాక్షన్ సన్నివేశాలు ఆయన కొత్తగా కనిపించేలా చేశాయి. గ్రామీణ నేపథ్యంలో కథ సాగుతుందనే సంకేతాలు కూడా టీజర్‌లో కనిపిస్తున్నాయి.

దర్శకుడు మురళీకిశోర్ అబ్బూరు కథను ఎమోషనల్ మరియు కమర్షియల్ అంశాల మేళవింపుతో రూపొందించినట్లు తెలుస్తోంది. సంగీతం, బ్యాక్‌గ్రౌండ్ స్కోర్ కూడా టీజర్‌కు బలంగా నిలిచాయి. విజువల్స్ పరంగా కూడా సినిమా గ్రాండ్‌గా ఉండబోతుందనే అభిప్రాయం వ్యక్తమవుతోంది.

జూన్ 26న ప్రేక్షకుల ముందుకు

‘లెనిన్’ చిత్రం జూన్ 26న ప్రపంచవ్యాప్తంగా థియేటర్లలో విడుదల కానుంది. ఇప్పటికే టీజర్‌తో హైప్ పెరగడంతో సినిమా విడుదలపై అభిమానుల్లో ఆసక్తి నెలకొంది. అఖిల్‌కు ఇది కీలక ప్రాజెక్ట్ కావడంతో అభిమానులు భారీ అంచనాలు పెట్టుకున్నారు. సినిమా ప్రమోషన్స్‌ను కూడా చిత్రబృందం త్వరలో వేగవంతం చేయనుంది. ట్రైలర్, పాటలు, ప్రీ రిలీజ్ ఈవెంట్ వంటి కార్యక్రమాల ద్వారా సినిమాను మరింతగా ప్రేక్షకులకు చేరవేయాలని ప్లాన్ చేస్తున్నట్లు సమాచారం.

Also Read: రామ్ చరణ్ పెద్ది.. శృతిహాసన్ ఐటమ్ సాంగ్ అదుర్స్!

Petrol Diesel Price: మూడోసారి పెరిగిన పెట్రోల్ ధరలు.. సారి ఎంతంటే?

Giribabu
-
0

దేశవ్యాప్తంగా వాహనదారులపై మరోసారి ఇంధన భారం పడింది. ఆయిల్ మార్కెటింగ్ కంపెనీలు పెట్రోల్‌, డీజిల్ ధరలను వరుసగా మూడోసారి పెంచుతూ తాజా నిర్ణయం తీసుకున్నాయి. లీటర్ పెట్రోల్‌పై 87 పైసలు, డీజిల్‌పై 91 పైసలు పెంచినట్లు ప్రకటించగా, పెరిగిన ధరలు శనివారం ఉదయం నుంచే అమల్లోకి వచ్చాయి. హైదరాబాద్‌తో పాటు దేశంలోని ప్రధాన నగరాల్లో కొత్త ధరలు అమలవుతున్నాయి.

గత రెండు వారాల వ్యవధిలో ఇది మూడోసారి ఇంధన ధరల పెంపు కావడం గమనార్హం. అంతర్జాతీయ మార్కెట్లో ముడిచమురు ధరల పెరుగుదల, రవాణా వ్యయాలు అధికమవడం వంటి కారణాలతో ఆయిల్ కంపెనీలు ధరలను సవరించినట్లు సమాచారం. వరుస పెంపులతో సామాన్య ప్రజలు, ముఖ్యంగా రోజువారీగా వాహనాలు వినియోగించే ఉద్యోగులు, వ్యాపారులు తీవ్ర ఆందోళన వ్యక్తం చేస్తున్నారు.

పెట్రోల్‌, డీజిల్ ధరల పెంపు ప్రభావం కేవలం వాహనదారులపైనే కాకుండా అన్ని రంగాలపై పడే అవకాశం ఉందని ఆర్థిక నిపుణులు అభిప్రాయపడుతున్నారు. రవాణా ఖర్చులు పెరిగితే.. తప్పకుండా నిత్యావసర వస్తువుల ధరలు కూడా పెరిగే అవకాశం ఉంది. ముఖ్యంగా కూరగాయలు, పాలు, సరుకు రవాణా వంటి రంగాల్లో ధరల భారం వినియోగదారులపై పడనుంది.

వరుసగా పెరుగుతున్న ఇంధన ధరలు

ఇటీవల కాలంలో అంతర్జాతీయంగా క్రూడ్ ఆయిల్ ధరలు హెచ్చుతగ్గులకు లోనవుతున్నాయి. ఈ నేపథ్యంలో దేశీయ ఆయిల్ కంపెనీలు కూడా తరచూ ధరలను సవరిస్తున్నాయి. రెండు వారాల్లో మూడోసారి పెట్రోల్‌, డీజిల్ ధరలు పెరగడంతో సామాన్య మధ్యతరగతి కుటుంబాల ఖర్చులు మరింత పెరిగే పరిస్థితి ఏర్పడింది.

హైదరాబాద్‌లో ఇప్పటికే పెట్రోల్ ధరలు శతకానికి చేరువలో ఉండగా, తాజా పెంపుతో మరింత భారం పెరిగింది. డీజిల్ ధరల పెంపు ప్రభావం రవాణా రంగంపై తీవ్రంగా ఉండనుంది. లారీలు, బస్సులు, వాణిజ్య వాహనాల నిర్వహణ ఖర్చులు పెరగడంతో రవాణా ఛార్జీల పెంపు కూడా తప్పదని ట్రాన్స్‌పోర్ట్ రంగ ప్రతినిధులు చెబుతున్నారు.

సామాన్యులపై భారం

ఇంధన ధరల పెరుగుదలతో రోజువారీ జీవన వ్యయం కూడా క్రమంగా పెరుగుతోంది. ఉద్యోగులకు ప్రయాణ ఖర్చులు అధికమవుతుండగా, చిన్న వ్యాపారులు కూడా సరుకు రవాణా ఖర్చులతో ఇబ్బందులు ఎదుర్కొంటున్నారు. నగర ప్రాంతాల్లో ద్విచక్ర వాహనాలు, కార్లు ఉపయోగించే వారి నెలవారీ బడ్జెట్‌పై ఈ ప్రభావం స్పష్టంగా కనిపిస్తోంది.

పెట్రోల్‌, డీజిల్ ధరల పెంపు కారణంగా ఇప్పటికే కొన్ని రాష్ట్రాల్లో ఆటో ఛార్జీలు, క్యాబ్ సేవల ధరలు పెంచాలన్న డిమాండ్లు వినిపిస్తున్నాయి. ప్రజా రవాణా వ్యవస్థలపై కూడా దీని ప్రభావం ఉండే అవకాశముంది. ముఖ్యంగా డీజిల్‌పై 91 పైసల పెంపు భారీ వాణిజ్య రవాణా రంగానికి అదనపు భారంగా మారింది.

కేంద్ర, రాష్ట్ర ప్రభుత్వాలపై ఒత్తిడి

ఇంధన ధరల పెరుగుదల నేపథ్యంలో పన్నులు తగ్గించాలని ప్రజలు, ప్రతిపక్ష పార్టీలు ప్రభుత్వాలను కోరుతున్నాయి. కేంద్ర ఎక్సైజ్ డ్యూటీ, రాష్ట్ర వ్యాట్ తగ్గిస్తే కొంతవరకు వినియోగదారులకు ఉపశమనం లభించే అవకాశం ఉందని ఆర్థిక నిపుణులు సూచిస్తున్నారు.

అయితే అంతర్జాతీయ మార్కెట్ పరిస్థితులు, దిగుమతి వ్యయాలు వంటి అంశాలను దృష్టిలో పెట్టుకుని ధరల నిర్ణయం తీసుకుంటున్నట్లు ఆయిల్ కంపెనీలు చెబుతున్నాయి. అయినప్పటికీ వరుసగా మూడోసారి ధరల పెంపు కావడంతో ప్రజల్లో అసంతృప్తి వ్యక్తమవుతోంది.

రవాణా, వ్యాపార రంగాలపై ప్రభావం

డీజిల్ ధరల పెరుగుదలతో సరుకు రవాణా వ్యయం పెరగడం ఖాయం అని వ్యాపార వర్గాలు పేర్కొంటున్నాయి. వ్యవసాయ ఉత్పత్తుల రవాణా నుంచి పరిశ్రమల సరుకు తరలింపుల వరకు అన్ని రంగాల్లో అదనపు వ్యయం ఎదురుకానుంది. దీంతో మార్కెట్‌లో నిత్యావసర వస్తువుల ధరలు కూడా పెరిగే అవకాశాలు కనిపిస్తున్నాయి. హైదరాబాద్ వంటి మెట్రో నగరాల్లో ఉద్యోగులు వ్యక్తిగత వాహనాల వినియోగాన్ని తగ్గించి ప్రజా రవాణా వైపు మొగ్గుచూపే పరిస్థితి రావచ్చని నిపుణులు విశ్లేషిస్తున్నారు. అదే సమయంలో ఎలక్ట్రిక్ వాహనాలపై ఆసక్తి కూడా పెరిగే అవకాశం ఉందని భావిస్తున్నారు.

Also Read: రాజ్యసభ ఎన్నికల షెడ్యూల్ విడుదల: పూర్తి వివరాలు

కావ్య మారన్ పెళ్లి ఫిక్సా.. వరుడు అతడేనా?

Himansh
-
0

ప్రముఖ సంగీత దర్శకుడు అనిరుధ్ రవిచందర్, సన్‌రైజర్స్ హైదరాబాద్ ఓనర్ కావ్య మారన్ గురించి మరోసారి సోషల్ మీడియాలో పెళ్లి వార్తలు వైరల్ అవుతున్నాయి. గతేడాది నుంచే వీరిద్దరి డేటింగ్ రూమర్స్ వినిపిస్తుండగా, తాజాగా ఈ ఏడాది చివర్లో వీరు వివాహం చేసుకోబోతున్నారనే ప్రచారం మరింత ఊపందుకుంది. స్పెయిన్‌లో పెళ్లి, చెన్నైలో గ్రాండ్ రిసెప్షన్ నిర్వహించనున్నట్లు కొన్ని నివేదికలు పేర్కొంటున్నాయి.

గత కొంతకాలంగా అనిరుధ్ రవిచందర్, కావ్య మారన్ జంట గురించి నెట్టింట చర్చ కొనసాగుతూనే ఉంది. ముఖ్యంగా.. ఇద్దరూ కలిసి న్యూయార్క్‌లో కనిపించారనే వార్తలు వెలుగులోకి వచ్చిన తర్వాత.. వీరిద్దరి మధ్య రిలేషన్ ఉందనే ప్రచారం మొదలైపోయింది. ఆ తర్వాత కూడా పలు సందర్భాల్లో వీరి పేర్లు సోషల్ మీడియాలో ట్రెండ్ అయ్యాయి. అయితే ఈ వార్తలపై అధికారిక ధృవీకరణ మాత్రం ఎప్పుడూ రాలేదు.

ఇటీవల మరోసారి పెళ్లి వార్తలు బయటకు రావడంతో అభిమానులు, నెటిజన్లు ఆసక్తిగా చర్చించుకుంటున్నారు. అయితే గతంలో కూడా ఇలాంటి రూమర్స్ వచ్చిన నేపథ్యంలో ఇది కూడా కేవలం ప్రచారమే కావచ్చని కొందరు అభిప్రాయం వ్యక్తం చేస్తున్నారు.

అనిరుధ్ – కావ్య మారన్ రిలేషన్‌పై మళ్లీ చర్చ

తమిళ సినీ పరిశ్రమలో టాప్ మ్యూజిక్ డైరెక్టర్లలో ఒకరిగా కొనసాగుతున్న అనిరుధ్ రవిచందర్ పేరు గతేడాది నుంచి కావ్య మారన్‌తో కలిపి తరచూ వినిపిస్తోంది. ముఖ్యంగా ఇద్దరూ విదేశాల్లో కలిసి కనిపించారనే వార్తలు వైరల్ కావడంతో డేటింగ్ రూమర్స్ బలపడ్డాయి.

అయితే అప్పట్లో ఈ ప్రచారంపై అనిరుధ్ సోషల్ మీడియా ద్వారా స్పందించారు. తమ మధ్య అలాంటి విషయం ఏమీ లేదని స్పష్టం చేశారు. దీంతో ఆ వార్తలకు కొంతకాలం బ్రేక్ పడింది. కానీ ఇప్పుడు మరోసారి పెళ్లి టాపిక్ తెరపైకి రావడంతో సోషల్ మీడియాలో పెద్ద ఎత్తున చర్చ జరుగుతోంది. కొన్ని మీడియా నివేదికల ప్రకారం, ఇరు కుటుంబాలు కూడా ఈ వివాహంపై చర్చలు జరుపుతున్నట్లు సమాచారం. ముఖ్యంగా స్పెయిన్‌లో డెస్టినేషన్ వెడ్డింగ్ నిర్వహించే ఆలోచనలో ఉన్నట్లు టాక్ వినిపిస్తోంది.

స్పెయిన్‌లో వీరి పెళ్లి?

తాజాగా వైరల్ అవుతున్న సమాచారం ప్రకారం, అనిరుధ్ – కావ్య మారన్ వివాహాన్ని స్పెయిన్‌లో నిర్వహించేందుకు కుటుంబాలు ప్రణాళికలు సిద్ధం చేస్తున్నట్లు ప్రచారం సాగుతోంది. అనంతరం చెన్నైలో సినీ, వ్యాపార, క్రీడా ప్రముఖుల కోసం భారీ రిసెప్షన్ ఏర్పాటు చేసే అవకాశముందని వార్తలు వస్తున్నాయి.

ప్రస్తుతం ఈ వార్త సోషల్ మీడియాలో హాట్ టాపిక్‌గా మారింది. అయితే ఈ విషయంపై అనిరుధ్ గానీ, కావ్య మారన్ గానీ ఎలాంటి అధికారిక ప్రకటన చేయలేదు. దీంతో ఈ వార్త నిజమా? లేక మళ్లీ రూమరేనా? అన్న సందేహాలు వ్యక్తమవుతున్నాయి. గతంలో కూడా వీరిద్దరి పెళ్లి గురించి అనేక కథనాలు వచ్చినప్పటికీ, అవి అధికారికంగా ఎక్కడా నిర్ధారణ కాలేదు. అందువల్ల తాజా ప్రచారాన్ని కూడా చాలామంది నెటిజన్లు జాగ్రత్తగా పరిశీలిస్తున్నారు.

అనిరుధ్ కెరీర్ ఫుల్ బిజీ

అనిరుధ్ రవిచందర్ ప్రస్తుతం దక్షిణాది సినీ పరిశ్రమలో అత్యంత బిజీ మ్యూజిక్ డైరెక్టర్లలో ఒకరిగా కొనసాగుతున్నారు. తమిళం, తెలుగు, హిందీ భాషల్లో వరుస ప్రాజెక్టులతో ఆయన బిజీ షెడ్యూల్‌లో ఉన్నారు.

ఇటీవలి కాలంలో ఆయన అందించిన పాటలు, బ్యాక్‌గ్రౌండ్ స్కోర్లు భారీ విజయాలు సాధించాయి. ముఖ్యంగా స్టార్ హీరోల సినిమాలకు అనిరుధ్ సంగీతం ప్రత్యేక ఆకర్షణగా మారింది. దీంతో ఆయనకు దేశవ్యాప్తంగా మంచి క్రేజ్ ఏర్పడింది. తెలుగు ప్రేక్షకుల్లో కూడా అనిరుధ్‌కు మంచి ఫాలోయింగ్ ఉంది. ఆయన సంగీతం అందించిన పలు సినిమాలు బాక్సాఫీస్ వద్ద మంచి విజయాలు సాధించడంతో పాటు పాటలు కూడా చార్ట్‌బస్టర్లుగా నిలిచాయి.

ఐపీఎల్‌తో కావ్య మారన్ బిజీ

మరోవైపు కావ్య మారన్ ప్రస్తుతం ఇండియన్ ప్రీమియర్ లీగ్ (IPL) కారణంగా బిజీ షెడ్యూల్‌లో ఉంది. సన్‌రైజర్స్ హైదరాబాద్ జట్టుకు సంబంధించిన కార్యకలాపాల్లో ఆమె చురుకుగా పాల్గొంటోంది.

మ్యాచ్‌ల సమయంలో స్టేడియంలో కనిపించే కావ్య మారన్‌కు సోషల్ మీడియాలో భారీ ఫ్యాన్ ఫాలోయింగ్ ఉంది. ఆమె రియాక్షన్స్, జట్టు పట్ల చూపించే ఆసక్తి తరచూ వైరల్ అవుతుంటాయి. దీంతో IPL అభిమానుల్లో కూడా ఆమెకు ప్రత్యేక గుర్తింపు లభించింది. కావ్య మారన్ వ్యక్తిగత జీవితం గురించి పెద్దగా బయటకు రానప్పటికీ, అనిరుధ్‌తో రిలేషన్ వార్తలు రావడంతో ఆమె పేరు గత కొంతకాలంగా ఎక్కువగా ట్రెండ్ అవుతోంది.

అధికారిక ప్రకటన కోసం ఎదురుచూపులు

ప్రస్తుతం అనిరుధ్ – కావ్య మారన్ పెళ్లి వార్తలపై సోషల్ మీడియాలో విస్తృతంగా చర్చ జరుగుతున్నప్పటికీ, అధికారిక ధృవీకరణ మాత్రం రాలేదు. దీంతో అభిమానులు క్లారిటీ కోసం ఎదురుచూస్తున్నారు. గత అనుభవాలను దృష్టిలో పెట్టుకుంటే, ఈ వార్తలు కూడా కేవలం ప్రచారంగానే మిగిలిపోవచ్చని కొందరు భావిస్తున్నారు. మరోవైపు, నిజంగానే ఈ జంట పెళ్లి చేసుకుంటే అది సినీ, క్రీడా రంగాల్లో పెద్ద వార్తగా మారే అవకాశముంది. ఇప్పటికైతే ఈ వార్తలపై అధికారిక ప్రకటన వచ్చే వరకు వేచి చూడాల్సిందే.

Also read:

అగార్కర్ వ్యాఖ్యలు.. వైభవ్‌కు ఇంకా సమయం ఉంది!

రాజ్యసభ ఎన్నికల షెడ్యూల్ విడుదల: పూర్తి వివరాలు

Giribabu
-
0

దేశవ్యాప్తంగా పది రాష్ట్రాల్లో ఖాళీ కానున్న 24 రాజ్యసభ స్థానాలకు.. ఎన్నికల షెడ్యూల్‌ను భారత ఎన్నికల సంఘం ప్రకటించింది. జూన్‌ 18న పోలింగ్ నిర్వహించనున్నట్లు ఈసీ వెల్లడించింది. ఇందులో ఆంధ్రప్రదేశ్‌కు చెందిన నాలుగు రాజ్యసభ స్థానాలు కూడా ఉన్నాయి. ప్రస్తుతం రాజ్యసభ సభ్యులుగా ఉన్న పలువురు నేతల పదవీకాలం జూన్ చివరితో ముగియనున్న నేపథ్యంలో ఈ ఎన్నికలు ప్రాధాన్యత సంతరించుకున్నాయి.

జూన్‌, జులై నెలల్లో మొత్తం 24 మంది రాజ్యసభ సభ్యుల పదవీకాలం ముగియనుంది. దీంతో ఆయా రాష్ట్రాల్లో కొత్త సభ్యులను ఎన్నుకునేందుకు ఎన్నికల ప్రక్రియను కేంద్ర ఎన్నికల సంఘం ప్రారంభించింది. రాజ్యసభ ఎన్నికలు సాధారణ ఎన్నికల మాదిరిగా కాకుండా ఎమ్మెల్యేల ఓట్ల ద్వారా నిర్వహించబడతాయి. అందువల్ల రాష్ట్ర అసెంబ్లీల్లో పార్టీ బలం ఈ ఎన్నికల్లో కీలక పాత్ర పోషిస్తుంది. ప్రస్తుతం రాజకీయంగా కీలక పరిణామాలు జరుగుతున్న సమయంలో రాజ్యసభ ఎన్నికలు మరింత ఆసక్తికరంగా మారాయి. ముఖ్యంగా ఆంధ్రప్రదేశ్‌లో కొత్త రాజకీయ సమీకరణాల నేపథ్యంలో ఈ ఎన్నికలపై ప్రధాన పార్టీల దృష్టి కేంద్రీకృతమైంది.

జూన్‌ 18న రాజ్యసభ ఎన్నికలు!

భారత ఎన్నికల సంఘం విడుదల చేసిన షెడ్యూల్ ప్రకారం జూన్‌ 1న ఎన్నికల నోటిఫికేషన్ విడుదల కానుంది. నామినేషన్ల దాఖలుకు జూన్‌ 8 చివరి తేదీగా నిర్ణయించారు. జూన్‌ 9న నామినేషన్ల పరిశీలన జరగనుండగా, ఉపసంహరణకు జూన్‌ 11 వరకు అవకాశం కల్పించారు.

జూన్‌ 18న పోలింగ్ నిర్వహించనున్నారు. అదే రోజు సాయంత్రం 5 గంటల తర్వాత ఓట్ల లెక్కింపు చేపట్టనున్నారు. ఎన్నికల ప్రక్రియ మొత్తం జూన్‌ 20 నాటికి పూర్తికానుందని ఈసీ స్పష్టం చేసింది. రాజ్యసభ ఎన్నికల్లో ఎమ్మెల్యేలు ప్రాధాన్యత క్రమంలో ఓటు వేయాల్సి ఉంటుంది. శాసనసభలో పార్టీకి ఉన్న సంఖ్యాబలం ఆధారంగా అభ్యర్థుల విజయం నిర్ణయించబడుతుంది.

ఏపీలో నాలుగు స్థానాలకు ఎన్నిక

ఆంధ్రప్రదేశ్‌లో ప్రస్తుతం రాజ్యసభ సభ్యులుగా ఉన్న పిల్లి సుభాష్ చంద్రబోస్, ఆళ్ల అయోధ్యరామిరెడ్డి, పరిమళ్ నత్వానీ, సానా సతీష్ పదవీకాలం జూన్‌ 26తో ముగియనుంది.

దీంతో ఈ నాలుగు స్థానాలకు జూన్‌ 18న ఎన్నికలు నిర్వహించనున్నారు. రాష్ట్రంలో ప్రస్తుతం ఉన్న అసెంబ్లీ బలం ప్రకారం అధికార కూటమికి ఆధిక్యం ఉన్నప్పటికీ, అభ్యర్థుల ఎంపికపై రాజకీయ వర్గాల్లో ఆసక్తి నెలకొంది. కొత్తగా ఎవరికి అవకాశం కల్పిస్తారు? ప్రాంతీయ సమీకరణాలు ఎలా ఉండబోతున్నాయి? అనే అంశాలపై ఇప్పటికే రాజకీయ చర్చ ప్రారంభమైంది.

రాజ్యసభ ఎన్నికల ప్రాధాన్యత

రాజ్యసభ భారత పార్లమెంట్‌లో ఎగువ సభగా కీలక పాత్ర పోషిస్తుంది. రాష్ట్రాలకు ప్రాతినిధ్యం వహించే ఈ సభలో సభ్యులు ఆరు సంవత్సరాల పదవీకాలంతో ఉంటారు. ప్రతి రెండేళ్లకు మూడో వంతు సభ్యులు పదవీ విరమణ చేయడంతో కొత్త ఎన్నికలు జరుగుతుంటాయి.

దేశ రాజకీయాల్లో రాజ్యసభకు ప్రత్యేక ప్రాధాన్యం ఉంది. ముఖ్యంగా కీలక బిల్లుల ఆమోదంలో ఈ సభ పాత్ర కీలకంగా ఉంటుంది. అందువల్ల అన్ని రాజకీయ పార్టీలు రాజ్యసభ స్థానాలపై ప్రత్యేక దృష్టి పెడతాయి. ఆంధ్రప్రదేశ్‌లోనూ ఈ ఎన్నికలు రాజకీయంగా ఆసక్తికరంగా మారే అవకాశం ఉంది. ముఖ్యంగా అధికార, ప్రతిపక్ష పార్టీల వ్యూహాలు ఎలా ఉంటాయన్నది చర్చనీయాంశంగా మారింది.

అభ్యర్థుల ఎంపికపై ఉత్కంఠ

రాజ్యసభ ఎన్నికల షెడ్యూల్ విడుదలతో పార్టీల్లో అభ్యర్థుల ఎంపిక ప్రక్రియ వేగవంతం కానుంది. సామాజిక సమీకరణాలు, రాజకీయ ప్రాధాన్యతలు, పార్టీకి సేవలందించిన నేతలకు అవకాశం వంటి అంశాలను దృష్టిలో ఉంచుకుని ఎంపిక జరిగే అవకాశముంది. కొన్ని సందర్భాల్లో పారిశ్రామికవేత్తలు, సినీ ప్రముఖులు, జాతీయ స్థాయి నేతలకు కూడా రాజ్యసభ ద్వారా అవకాశం కల్పించడం సాధారణమే. దీంతో ఈసారి ఏపీ నుంచి ఎవరికీ అవకాశం దక్కుతుందన్న అంశంపై ఆసక్తి నెలకొంది.

ఎన్నికల ప్రక్రియపై ఈసీ స్పష్టత

ఎన్నికల నిర్వహణలో పారదర్శకత కోసం అన్ని ఏర్పాట్లు చేస్తున్నట్లు ఎన్నికల సంఘం తెలిపింది. నిబంధనల ప్రకారం పోలింగ్, ఓట్ల లెక్కింపు చేపట్టనున్నట్లు పేర్కొంది. జూన్‌ 20 నాటికి ఎన్నికల ప్రక్రియ పూర్తవుతుందని ఈసీ ప్రకటించడంతో రాజకీయ పార్టీలు తమ వ్యూహాలను సిద్ధం చేసుకుంటున్నాయి.

Also read: స్టాలిన్ సంచలన వ్యాఖ్యలు.. విజయ్ ప్రభుత్వం కూలిపోతుందా?

రామ్ చరణ్ పెద్ది.. శృతిహాసన్ ఐటమ్ సాంగ్ అదుర్స్!

Shaurya Vardhan
-
0

రామ్ చరణ్ హీరోగా నటిస్తున్న రూరల్ స్పోర్ట్స్ యాక్షన్ డ్రామా ‘పెద్ది’ సినిమా విడుదలకు ముందే భారీ అంచనాలు సృష్టిస్తోంది. బుచ్చిబాబు దర్శకత్వంలో తెరకెక్కుతున్న ఈ చిత్రంలో జాన్వీ కపూర్ హీరోయిన్‌గా నటిస్తోంది. తాజాగా ఈ మూవీ నుంచి విడుదలైన “హల్లల్లో హల్లల్లో” స్పెషల్ సాంగ్ ప్రోమో సోషల్ మీడియాలో వైరల్ అవుతోంది. మే 23న భోపాల్‌లో జరగనున్న ప్రత్యేక ఈవెంట్‌లో పూర్తి పాటను విడుదల చేయనున్నట్లు మేకర్స్ ప్రకటించారు.

తెలుగు సినీ పరిశ్రమలో రామ్ చరణ్ సినిమాలకు ఎప్పటిలాగే భారీ క్రేజ్ కనిపిస్తోంది. ముఖ్యంగా ‘ఆర్ఆర్ఆర్’ తర్వాత చెర్రీ నటిస్తున్న ప్రతి ప్రాజెక్ట్‌పై ప్రేక్షకుల్లో ఆసక్తి మరింత పెరిగింది. గ్రామీణ నేపథ్యం, స్పోర్ట్స్ యాక్షన్ అంశాలతో రూపొందుతున్న ‘పెద్ది’ మూవీ కూడా అదే స్థాయిలో హైప్‌ను సంపాదించుకుంది. ఇప్పటికే విడుదలైన ట్రైలర్ ప్రేక్షకుల నుంచి మంచి స్పందన అందుకోవడంతో సినిమాపై అంచనాలు మరింత పెరిగాయి.

ఈ సినిమా 2026 జూన్ 4న ప్రపంచవ్యాప్తంగా థియేటర్లలో విడుదల కానుండగా, ప్రమోషన్స్‌ను మేకర్స్ వేగవంతం చేశారు. ముఖ్యంగా సంగీత దర్శకుడు అందించిన మాస్ బీట్స్, రామ్ చరణ్ స్టైలిష్ లుక్, బుచ్చిబాబు తెరకెక్కించిన గ్రామీణ వాతావరణం ప్రేక్షకులను ఆకట్టుకుంటున్నాయి. ఇప్పుడు విడుదల చేసిన స్పెషల్ సాంగ్ ప్రోమో మెగా అభిమానుల్లో కొత్త ఉత్సాహాన్ని నింపింది.

‘హల్లల్లో హల్లల్లో’ ప్రోమో

‘పెద్ది’ సినిమా నుంచి విడుదలైన “హల్లల్లో హల్లల్లో” పాట ప్రోమో ప్రస్తుతం సోషల్ మీడియాలో ట్రెండింగ్‌లో ఉంది. కొద్ది సెకన్ల నిడివి ఉన్న ఈ వీడియోలో రామ్ చరణ్ ఎనర్జిటిక్ స్టెప్పులు, ఫోక్ బీట్‌లు ప్రత్యేక ఆకర్షణగా నిలిచాయి. గ్రామీణ జాతర వాతావరణంలో తెరకెక్కించిన ఈ సాంగ్ ప్రేక్షకులకు మాస్ ఫీస్ట్ ఇవ్వనుందని అభిమానులు కామెంట్లు చేస్తున్నారు.

ప్రోమోలో కనిపించిన విజువల్స్ చూస్తుంటే పాటను భారీ స్థాయిలో తెరకెక్కించినట్లు తెలుస్తోంది. కలర్‌ఫుల్ సెట్స్, డ్యాన్స్ మూవ్స్, మ్యూజిక్ బీట్‌లు ఈ పాటను థియేటర్లలో అభిమానులు ఎంజాయ్ చేసేలా రూపొందించినట్లు సినీ వర్గాలు చెబుతున్నాయి. ప్రత్యేకంగా మెగా ఫ్యాన్స్ ఈ సాంగ్‌ను సోషల్ మీడియాలో షేర్ చేస్తూ హిట్ ఖాయం అంటున్నారు. ట్రైలర్ తర్వాత వచ్చిన ఈ పాట ప్రోమో సినిమాపై బజ్‌ను మరింత పెంచిందనే అభిప్రాయం వ్యక్తమవుతోంది.

స్పెషల్ సాంగ్ కోసం శృతిహాసన్

‘పెద్ది’ సినిమాలో స్పెషల్ సాంగ్ కోసం మేకర్స్ పలువురు స్టార్ హీరోయిన్ల పేర్లను పరిశీలించినట్లు సమాచారం. చివరకు కోలీవుడ్ స్టార్ హీరోయిన్ శృతిహాసన్‌ను ఎంపిక చేశారు. ఇప్పటికే గ్లామర్, డ్యాన్స్ పరంగా మంచి గుర్తింపు తెచ్చుకున్న శృతిహాసన్ ఈ పాటలో రామ్ చరణ్‌తో కలిసి కనిపించనుంది.

రామ్ చరణ్, శృతిహాసన్ కాంబినేషన్‌పై ప్రేక్షకుల్లో మంచి ఆసక్తి నెలకొంది. ఇద్దరి స్క్రీన్ ప్రెజెన్స్, డ్యాన్స్ స్టైల్ ఈ పాటను మరో స్థాయికి తీసుకెళ్తాయని అభిమానులు భావిస్తున్నారు. ముఖ్యంగా ఫోక్ మాస్ బీట్‌కు శృతిహాసన్ స్టెప్పులు ప్రత్యేక ఆకర్షణగా నిలవనున్నాయని సినీ వర్గాలు చెబుతున్నాయి.

బుచ్చిబాబు దర్శకత్వంపై అంచనాలు

దర్శకుడు బుచ్చిబాబు గతంలో తీసిన సినిమాలతో ప్రత్యేక గుర్తింపు తెచ్చుకున్నారు. భావోద్వేగాలు, గ్రామీణ నేపథ్య కథలను బలంగా చూపించడంలో ఆయనకు ప్రత్యేక శైలి ఉంది. అదే తరహాలో ‘పెద్ది’ సినిమాను కూడా భావోద్వేగాలు, యాక్షన్, స్పోర్ట్స్ అంశాల మేళవింపుతో తెరకెక్కిస్తున్నట్లు సమాచారం. ట్రైలర్‌లో కనిపించిన గ్రామీణ వాతావరణం, స్పోర్ట్స్ బ్యాక్‌డ్రాప్, రామ్ చరణ్ పాత్ర డిజైన్ ప్రేక్షకులను ఆకట్టుకున్నాయి. దీంతో ఈ సినిమాను బుచ్చిబాబు కెరీర్‌లో మరో పెద్ద హిట్‌గా అభిమానులు భావిస్తున్నారు.

జాన్వీ కపూర్ పాత్రపై ఆసక్తి

ఈ చిత్రంలో బాలీవుడ్ నటి జాన్వీ కపూర్ హీరోయిన్‌గా నటిస్తోంది. గ్రామీణ నేపథ్య కథలో జాన్వీ కనిపించనున్న తీరు కొత్తగా ఉంటుందని సినీ వర్గాలు చెబుతున్నాయి. రామ్ చరణ్ – జాన్వీ కపూర్ జోడీ కూడా ప్రేక్షకుల్లో మంచి క్రేజ్ తెచ్చుకుంది. ట్రైలర్‌లో ఇద్దరి మధ్య కెమిస్ట్రీ ఆకట్టుకోవడంతో సినిమాలో వారి పాత్రలకు ప్రాధాన్యం ఎక్కువగా ఉంటుందని అంచనా వేస్తున్నారు.

పెద్ది – జూన్ 4 విడుదల

‘పెద్ది’ సినిమా జూన్ 4న థియేటర్లలో విడుదల కానుండటంతో అభిమానులు ఆసక్తిగా ఎదురుచూస్తున్నారు. ఇప్పటికే ట్రైలర్, పోస్టర్లు, పాటల ప్రోమోలు మంచి స్పందన తెచ్చుకోవడంతో సినిమాపై అంచనాలు భారీగా పెరిగాయి. ముఖ్యంగా గ్రామీణ నేపథ్యంలో భారీ యాక్షన్ సన్నివేశాలు, స్పోర్ట్స్ డ్రామా, మాస్ ఎంటర్‌టైన్‌మెంట్ అంశాలు ఈ సినిమాను ప్రేక్షకులకు దగ్గర చేస్తాయని సినీ విశ్లేషకులు భావిస్తున్నారు. విడుదలకు ముందే సోషల్ మీడియాలో భారీ బజ్ సృష్టించిన ‘పెద్ది’ బాక్సాఫీస్ వద్ద ఎలా రాణిస్తుందో చూడాలి.

Also read: Jr. NTR డ్రాగన్ గ్లింప్స్ చూశారా?.. సినిమా రిలీజ్ ఎప్పుడంటే?

కొత్త జీవరాశుల.. వీటి గురించి తెలిస్తే ఆశ్చర్యపోతారు!

Giribabu
-
0

సముద్ర గర్భంలో జరుగుతున్న పరిశోధనల్లో శాస్త్రవేత్తలు మరోసారి అరుదైన జీవరాశులను గుర్తించారు. గత ఏడాది నిర్వహించిన సముద్ర పరిశోధనల్లో మొత్తం 1,121 కొత్త జీవరాశులను కనుగొన్నట్లు అంతర్జాతీయ పరిశోధక బృందం వెల్లడించింది. జపాన్‌, ఆస్ట్రేలియా, దక్షిణ అట్లాంటిక్‌, తైమూర్ లెస్ట్ ప్రాంతాల సముద్ర గర్భాల్లో ఈ జీవులను గుర్తించారు. 85 దేశాలకు చెందిన సుమారు 1,000 మంది పరిశోధకులు ఈ అధ్యయనంలో పాల్గొన్నారు.

నిప్పన్ ఫౌండేషన్‌, నెక్టాన్ ఓషియన్ సెన్సస్ సంయుక్తంగా నిర్వహించిన ఈ పరిశోధన ఫలితాలను తాజాగా విడుదల చేశారు. గత పరిశోధనలతో పోలిస్తే ఈసారి 54 శాతం ఎక్కువగా కొత్త జీవరాశులు గుర్తించబడినట్లు వెల్లడించారు. సముద్ర గర్భంలోని జీవ వైవిధ్యం ఎంత విస్తృతంగా ఉందో ఈ పరిశోధన మరోసారి స్పష్టం చేసింది.

సముద్రం ప్రపంచంలోనే అతిపెద్ద జీవ వ్యవస్థగా భావిస్తారు. ఇంకా మనుషులకు తెలియని లక్షలాది జీవులు సముద్ర గర్భంలో ఉన్నాయని శాస్త్రవేత్తలు అంచనా వేస్తున్నారు. ఈ తాజా పరిశోధన వాటిలో కొన్ని అరుదైన జీవులను ప్రపంచానికి పరిచయం చేసింది.

జపాన్ సముద్రంలో ‘గాజు కోట పురుగు’

జపాన్ తీర ప్రాంత సముద్ర గర్భంలో 2,600 అడుగుల లోతున ఒక విచిత్ర జీవిని శాస్త్రవేత్తలు గుర్తించారు. ఇది బ్రిజిల్ పాలికేట్ జాతికి చెందిన పురుగు. దీనికి వెంట్రుకల మాదిరి నిర్మాణాలు ఉండటం ప్రత్యేకత.

ఈ జీవి గాజు స్పాంజ్‌లో నివసిస్తుంది. దీని శరీరంలో గాజు తయారీలో ఉపయోగించే సిలికా పదార్థంతో రూపొందిన వలలాంటి అస్థిపంజరం ఉంటుంది. అందుకే దీనిని “గాజు కోట పురుగు”గా పరిశోధకులు పిలుస్తున్నారు. ఈ జీవి నిర్మాణం శాస్త్రవేత్తలను ఆశ్చర్యానికి గురి చేసింది. సముద్ర గర్భంలోని తీవ్రమైన ఒత్తిడి పరిస్థితుల్లో కూడా ఇది ఎలా జీవిస్తుందో తెలుసుకునేందుకు మరిన్ని అధ్యయనాలు జరుగుతున్నాయి.

ఆస్ట్రేలియాలో ఘోస్ట్ షార్క్ గుర్తింపు

ఆస్ట్రేలియా సముద్ర పరిధిలోని కోరల్ సీ మెరీన్ పార్క్‌లో మరో అరుదైన జీవిని గుర్తించారు. దీనిని “ఘోస్ట్ షార్క్ ఖిమేరా”గా పిలుస్తున్నారు.

ఇది సుమారు 2,700 అడుగుల లోతున కనిపించింది. రూపంలో సొరచేపలతో పోలికలు ఉన్నప్పటికీ, ఇది సుమారు 40 కోట్ల సంవత్సరాల క్రితమే వాటి నుంచి వేరుపడిన జాతిగా శాస్త్రవేత్తలు భావిస్తున్నారు. ఈ జీవి పరిణామ క్రమాన్ని అధ్యయనం చేయడం ద్వారా సముద్ర జీవుల అభివృద్ధిపై మరిన్ని విషయాలు తెలుసుకునే అవకాశం ఉందని పరిశోధకులు చెబుతున్నారు.

వైద్య రంగానికి ఉపయోగపడే రిబ్బన్ పురుగు

తైమూర్ లెస్ట్ సముద్ర ప్రాంతంలో పరిశోధకులు రిబ్బన్ పురుగును గుర్తించారు. ఇది కేవలం ఒక అంగుళం పొడవు మాత్రమే ఉంటుంది. దీని శరీరంపై నారింజ రంగు చారలు ప్రత్యేక ఆకర్షణగా కనిపిస్తున్నాయి.

ఈ రిబ్బన్ పురుగులు విడుదల చేసే విష పదార్థాలపై ప్రస్తుతం వైద్య పరిశోధనలు జరుగుతున్నాయి. ముఖ్యంగా అల్జీమర్స్‌, స్కిజోఫ్రినియా వంటి మానసిక వ్యాధుల చికిత్సలో ఇవి ఉపయోగపడే అవకాశాలపై శాస్త్రవేత్తలు అధ్యయనం చేస్తున్నారు. భవిష్యత్తులో సముద్ర జీవుల నుంచి లభించే రసాయనాలు కొత్త ఔషధాల అభివృద్ధికి దోహదపడవచ్చని నిపుణులు భావిస్తున్నారు.

దక్షిణ అట్లాంటిక్‌లో ‘డెత్ బాల్’ జీవులు

దక్షిణ శాండ్‌విచ్ దీవులు ఉత్తర ప్రాంత సముద్ర గర్భంలో 12,000 అడుగుల లోతున గోళాకార జీవులను గుర్తించారు. వీటిని పరిశోధకులు “డెత్ బాల్” జీవులుగా పేర్కొన్నారు.

ఈ జీవుల శరీరంపై వెల్క్రో మాదిరి కొక్కేలు ఉండటం విశేషం. ఇవి సముద్ర గర్భంలోని ఇతర ఉపరితలాలకు అతుక్కునేలా సహాయపడతాయని భావిస్తున్నారు. ఇదే ప్రాంతాల్లో కలం మాదిరిగా కనిపించే మరొక విచిత్రమైన జీవిని కూడా.. పరిశోధకులు గుర్తించారు. ప్రస్తుతం దీని జన్యు విశ్లేషణ కొనసాగుతోంది.

ఇవన్నీ నిజంగా కొత్త జీవులేనా?

శాస్త్రవేత్తలు గుర్తించిన ప్రతి జీవి పూర్తిగా కొత్తదేనా అన్నది వెంటనే తేల్చడం సాధ్యం కాదని నిపుణులు చెబుతున్నారు. ఒక జీవిని అధికారికంగా కొత్త జాతిగా గుర్తించడానికి సంవత్సరాల సమయం పడుతుంది. సగటున ఒక కొత్త జీవిని శాస్త్రీయంగా నిర్ధారించి పేరు పెట్టేందుకు దాదాపు 13.5 సంవత్సరాలు పట్టవచ్చని పరిశోధకులు వెల్లడించారు. జీవుల నిర్మాణం, జన్యు లక్షణాలు, పూర్వ జాతులతో పోలికలు వంటి అంశాలను విశ్లేషించిన తర్వాతే అధికారిక గుర్తింపు ఇస్తారు.

సముద్ర పరిశోధనల ప్రాధాన్యం పెరుగుతోంది

ప్రపంచవ్యాప్తంగా సముద్ర గర్భ పరిశోధనలకు ప్రాధాన్యం పెరుగుతోంది. భూమిపై ఉన్న జీవ వైవిధ్యంలో పెద్ద భాగం ఇంకా సముద్రాల్లోనే దాగి ఉందని శాస్త్రవేత్తలు భావిస్తున్నారు.

ఈ పరిశోధనలు కొత్త జీవరాశులను మాత్రమే కాకుండా, వైద్యరంగం, బయోటెక్నాలజీ, పర్యావరణ పరిరక్షణ వంటి రంగాలకు కూడా ఉపయోగపడే అవకాశాలు కల్పిస్తున్నాయి. సముద్ర జీవ వైవిధ్యాన్ని అర్థం చేసుకోవడం ద్వారా భూమిపై జీవ వ్యవస్థల పరిణామ క్రమంపై మరింత స్పష్టత వచ్చే అవకాశం ఉందని పరిశోధకులు చెబుతున్నారు.

Also Read: ఉద్యోగులకు మార్క్ జుకర్‌బర్గ్ భరోసా!

‘దృశ్యం 3’ రివ్యూ: సినిమా ఎలా ఉందంటే?

Shaurya Vardhan
-
0

మలయాళ స్టార్ హీరో మోహన్‌లాల్‌, దర్శకుడు జీతూ జోసెఫ్‌ కాంబినేషన్‌లో వచ్చిన సక్సెస్‌ఫుల్ ఫ్రాంచైజీ ‘దృశ్యం’ నుంచి మూడో భాగం ‘దృశ్యం 3’ తాజాగా ప్రేక్షకుల ముందుకు వచ్చింది. ఇప్పటికే విడుదలైన ‘దృశ్యం’, ‘దృశ్యం 2’ చిత్రాలు భారీ విజయాలు సాధించగా, ఇప్పుడు మూడో భాగంపై కూడా ప్రేక్షకుల్లో భారీ అంచనాలు నెలకొన్నాయి. ఈసారి తెలుగులో రీమేక్ చేయకుండా నేరుగా తెలుగు డబ్బింగ్ వెర్షన్‌ను మే 21న విడుదల చేశారు.

గత రెండు భాగాల్లో కుటుంబాన్ని కాపాడుకునేందుకు జార్జ్‌కుట్టి వేసిన తెలివైన ప్లాన్స్ ప్రేక్షకులను ఆకట్టుకున్నాయి. అదే ఉత్కంఠను కొనసాగిస్తూ ‘దృశ్యం 3’ కథ ప్రారంభమవుతుంది. అయితే ఈసారి కథనం, ట్విస్టులు, సస్పెన్స్ అంశాలు ఉన్నప్పటికీ, గత భాగాల స్థాయిలో కొత్తదనం కనిపించలేదనే అభిప్రాయాలు వినిపిస్తున్నాయి.

దృశ్యం ఫ్రాంచైజీకి ప్రేక్షకుల్లో ఉన్న క్రేజ్ కారణంగా ‘దృశ్యం 3’ విడుదలపై తెలుగు రాష్ట్రాల్లో కూడా మంచి ఆసక్తి నెలకొంది. ముఖ్యంగా ఫ్యామిలీ థ్రిల్లర్ జానర్‌ను ఇష్టపడే ప్రేక్షకులు ఈ సినిమాపై భారీ అంచనాలతో థియేటర్లకు వెళ్లారు.

కథలో ఏముంది?

‘దృశ్యం 2’ ముగిసిన దగ్గర నుంచే ‘దృశ్యం 3’ కథ ప్రారంభమవుతుంది. వరుణ్ హత్య కేసు నుంచి తన కుటుంబాన్ని కాపాడేందుకు జార్జ్‌కుట్టి వేసిన ప్లాన్ విజయవంతమవుతుంది. కోర్టు ఆదేశాలతో కేసు నుంచి పూర్తిగా బయటపడిన జార్జ్‌కుట్టి, తన జీవితంలో జరిగిన సంఘటనల ఆధారంగా ఓ సినిమాను నిర్మిస్తాడు. ఆ సినిమా బాక్సాఫీస్ వద్ద సూపర్ హిట్ అవుతుంది.

ఇక కుటుంబం కూడా మామూలు జీవితంలోకి రావడానికి ప్రయత్నిస్తుంది. పెద్ద కుమార్తె అంజు మానసిక సమస్యల నుంచి బయటపడడంతో ఆమెకు పెళ్లి చేయాలని కుటుంబం నిర్ణయిస్తుంది. అయితే వచ్చిన ప్రతి సంబంధం చివరి నిమిషంలో రద్దవుతుండటంతో జార్జ్‌కుట్టి అనుమానపడతాడు.

తర్వాత తన కుమార్తె పెళ్లి సంబంధాలను ఇద్దరు వ్యక్తులు కావాలనే చెడగొడుతున్నారని తెలుసుకుంటాడు. వారు ఎవరు? ఎందుకు ఇలా చేస్తున్నారు? వరుణ్ తల్లిదండ్రులు గీతా ప్రభాకర్, ప్రభాకర్ మళ్లీ జార్జ్‌కుట్టి జీవితంలోకి ఎందుకు వచ్చారు? సస్పెండ్ అయిన పోలీస్ అధికారి సహదేవన్ ఏ కుట్ర పన్నాడు? చివరకు తన కుటుంబాన్ని రక్షించేందుకు జార్జ్‌కుట్టి ఈసారి ఎలాంటి మాస్టర్ ప్లాన్ వేశాడు? అనే అంశాల చుట్టూ సినిమా సాగుతుంది.

‘దృశ్యం 3’లో మెప్పించిన అంశాలు

‘దృశ్యం’ సిరీస్ అంటే ప్రధానంగా గుర్తొచ్చేది ఉత్కంఠభరితమైన స్క్రీన్‌ప్లే. అదే అంశాన్ని దర్శకుడు జీతూ జోసెఫ్ ఈ చిత్రంలో కూడా కొనసాగించే ప్రయత్నం చేశాడు. ముఖ్యంగా చివరి అరగంటలో వచ్చే ట్విస్టులు, కథ మలుపులు ప్రేక్షకులను ఆకట్టుకుంటాయి.

ఇంటర్వెల్ సీన్ తర్వాత కథపై ఆసక్తి పెరుగుతుంది. రెండో భాగంలో ఒక్కో పాత్ర ఎంట్రీతో కథ వేగం అందుకుంటుంది. అంజు అరెస్ట్ కోసం జరుగుతున్న కుట్రలు, వాటిని అడ్డుకునేందుకు జార్జ్‌కుట్టి వేసే ప్లాన్స్ థ్రిల్లింగ్‌గా అనిపిస్తాయి. చివరి అరగంట మాత్రం పాత ‘దృశ్యం’ సినిమాలను గుర్తు చేస్తుంది. తర్వాత ఏం జరుగుతుందో అనే ఉత్కంఠను దర్శకుడు బాగా మేనేజ్ చేశాడు. క్లైమాక్స్‌లో వచ్చే ట్విస్టులు అభిమానులను ఆకట్టుకునే అవకాశం ఉంది.

కథనంలో కనిపించిన బలహీనతలు

అయితే ‘దృశ్యం 3’ మొత్తం సినిమా మాత్రం అదే స్థాయిలో మెప్పించలేకపోయింది. మొదటి భాగం చాలా నెమ్మదిగా సాగుతుంది. కొన్ని సన్నివేశాలు అవసరానికి మించి లాగినట్టు అనిపిస్తాయి. ముఖ్యంగా ఫస్టాఫ్‌లో ఉత్కంఠ తగ్గిపోవడం ప్రేక్షకుల సహనానికి పరీక్షలా మారుతుంది.

గత రెండు భాగాల్లో కనిపించిన కొత్తదనం ఈసారి తక్కువగా అనిపిస్తుంది. కథలో ట్విస్టులు ఉన్నప్పటికీ, అవి పెద్దగా ఆశ్చర్యపరచవు. ఫ్యామిలీ డ్రామా, సస్పెన్స్ అంశాలు ఉన్నప్పటికీ స్క్రీన్‌ప్లే మరింత కట్టిపడేసేలా ఉండాల్సిందనే అభిప్రాయం వ్యక్తమవుతోంది. తెలుగు డబ్బింగ్ కూడా సినిమాకు మైనస్‌గా మారింది. కొన్ని చోట్ల డబ్బింగ్ సరైన భావోద్వేగాన్ని అందించలేకపోయింది. ముఖ్యంగా భావోద్వేగ సన్నివేశాల్లో డబ్బింగ్ ప్రభావం తగ్గింది.

నటీనటుల ప్రదర్శన ఎలా ఉంది?

జార్జ్‌కుట్టి పాత్రలో మోహన్‌లాల్‌ మరోసారి అద్భుత నటన కనబరిచారు. సాధారణ కుటుంబ పెద్దగా, తెలివైన వ్యక్తిగా ఆయన నటన సినిమాకు ప్రధాన బలం. ముఖ్యంగా క్లైమాక్స్ సన్నివేశాల్లో ఆయన ఎక్స్‌ప్రెషన్స్ ఆకట్టుకుంటాయి. భార్య రాణి పాత్రలో మీనా తన పాత్రకు పూర్తి న్యాయం చేశారు. ఇద్దరు కుమార్తెల పాత్రల్లో నటించిన వారు కూడా సహజ నటనతో మెప్పించారు. సహదేవన్, ప్రభాకర్ పాత్రధారులు తమ పాత్రల పరిధిలో బాగా నటించారు.

సాంకేతికంగా సినిమా ఎలా ఉంది?

సాంకేతికంగా సినిమా మంచి స్థాయిలో ఉంది. బ్యాక్‌గ్రౌండ్ స్కోర్ సినిమాకు ప్రధాన బలం. ముఖ్యమైన సన్నివేశాల్లో సంగీతం ఉత్కంఠను పెంచింది. సినిమాటోగ్రఫీ కూడా కథ మూడ్‌కు తగ్గట్టు ఉంది. ఎడిటింగ్ పరంగా సినిమా బాగానే ఉన్నప్పటికీ, ఫస్టాఫ్‌లో కొన్ని సన్నివేశాలను ట్రిమ్ చేసి ఉంటే బాగుండేది. నిర్మాణ విలువలు మంచి స్థాయిలో ఉన్నాయి.

చివరగా ఒక్క మాట

‘దృశ్యం 3’ గత రెండు భాగాల స్థాయిలో పూర్తిగా మెప్పించకపోయినా, క్లైమాక్స్ ట్విస్టులు మరియు మోహన్‌లాల్ నటన కోసం ఒకసారి చూడదగిన థ్రిల్లర్‌గా నిలుస్తుంది. ఫ్యామిలీ సస్పెన్స్ డ్రామాలను ఇష్టపడే ప్రేక్షకులకు ఈ సినిమా కొంతవరకు నచ్చే అవకాశం ఉంది.

Also Read: Jr. NTR డ్రాగన్ గ్లింప్స్ చూశారా?.. సినిమా రిలీజ్ ఎప్పుడంటే?

రూ.16 వేలకు చేరుతున్న బంగారం ధర.. నేటి ధరలు ఇవే!

Giribabu
-
0

బులియన్ మార్కెట్లో బంగారం ధరలు వరుసగా మూడో రోజు పెరిగాయి. గురువారం (మే 21) 24 క్యారెట్ల 10 గ్రాముల బంగారం ధర 490 రూపాయలు పెరిగి రూ.1,59,930కి చేరగా, 22 క్యారెట్ల గోల్డ్ ధర 450 రూపాయలు పెరిగి రూ.1,46,600గా నమోదైంది. మరోవైపు నిన్న భారీగా పడిపోయిన వెండి ధరలు ఇవాళ మళ్లీ పెరిగాయి. కిలో వెండి ధర రూ.5,000 ఎగబాకి రూ.2,90,000కు చేరడంతో కొనుగోలుదారుల్లో మళ్లీ చర్చ మొదలైంది.

అంతర్జాతీయ మార్కెట్లలో బంగారం డిమాండ్ పెరగడం, డాలర్ మారకం విలువల్లో మార్పులు, అమెరికా ఫెడరల్ రిజర్వ్ వడ్డీ రేట్లపై ఉన్న అనిశ్చితి వంటి అంశాలు ధరల పెరుగుదలకు ప్రధాన కారణాలుగా భావిస్తున్నారు. దేశీయ మార్కెట్లో వివాహాల సీజన్ కొనసాగుతుండటంతో నగల కొనుగోళ్లు కూడా పెరిగాయి.

ప్రస్తుతం బంగారం ధరలు పెరగడం సాధారణ వినియోగదారులపై ప్రభావం చూపుతోంది. ముఖ్యంగా పెళ్లిళ్లు, శుభకార్యాల కోసం బంగారం కొనుగోలు చేయాల్సిన కుటుంబాలకు ఇది అదనపు భారం అవుతోంది. అదే సమయంలో పెట్టుబడిదారులు మాత్రం బంగారాన్ని సురక్షిత పెట్టుబడిగా చూస్తున్నారు. దీంతో బంగారం మార్కెట్‌పై ప్రజల్లో ఆసక్తి మరింత పెరిగింది.

హైదరాబాద్‌లో 24 క్యారెట్ల బంగారం ధర ప్రస్తుతం 10 గ్రాములకు రూ.1,59,930గా ఉంది. ఇదే సమయంలో 22 క్యారెట్ల బంగారం రూ.1,46,600 పలుకుతోంది. కేవలం మూడు రోజుల వ్యవధిలోనే బంగారం ధరలు గణనీయంగా పెరగడం మార్కెట్ వర్గాలను ఆశ్చర్యానికి గురిచేస్తోంది.

గత వారంతో పోలిస్తే.. ప్రస్తుతం బంగారం ధరలు మరింత ఎగబాకాయి. అంతర్జాతీయంగా ఔన్స్ గోల్డ్ ధరలు పెరగడం దేశీయ మార్కెట్‌పై ప్రత్యక్ష ప్రభావం చూపుతోంది. రూపాయి విలువ తగ్గడం కూడా దిగుమతి అయ్యే బంగారం ధరలను పెంచుతోంది. దీంతో హైదరాబాద్ బులియన్ మార్కెట్లో ధరలు కొత్త రికార్డుల దిశగా కదులుతున్నాయనే అభిప్రాయం వ్యక్తమవుతోంది.

ప్రస్తుతం చాలా మంది పెట్టుబడిదారులు.. స్టాక్ మార్కెట్‌లోని ఒడిదుడుకుల ఏర్పడినప్పుడు బంగారంలో ఇన్వెస్ట్ చేయడానికి మొగ్గు చూపుతున్నారు. ప్రపంచ ఆర్థిక పరిస్థితుల్లో అస్థిరత పెరగడం వల్ల గోల్డ్‌ను సేఫ్ హేవెన్ ఇన్వెస్ట్‌మెంట్‌గా భావిస్తున్నారు. ఈ ధోరణి కూడా బంగారం ధరల పెరుగుదలకు కారణమవుతోంది.

నిన్న కిలో వెండి ధరపై భారీగా రూ.15,000 తగ్గుదల నమోదైంది. అయితే ఇవాళ మార్కెట్‌లో పరిస్థితి మారింది. కిలో వెండి ధర రూ.5,000 పెరిగి రూ.2,90,000కు చేరింది. దీంతో వెండి మార్కెట్‌లో కూడా చలనం కనిపిస్తోంది.

పరిశ్రమల వినియోగం పెరగడం, అంతర్జాతీయ మార్కెట్‌లో డిమాండ్ అధికంగా ఉండటం వల్ల వెండి ధరల్లో హెచ్చుతగ్గులు ఎక్కువగా కనిపిస్తున్నాయి. ముఖ్యంగా ఎలక్ట్రానిక్స్, సోలార్ ప్యానెల్స్ తయారీలో వెండి వినియోగం పెరుగుతుండటంతో దీని డిమాండ్ కూడా స్థిరంగా పెరుగుతోంది. హైదరాబాద్ మార్కెట్లో వెండి ఆభరణాల కొనుగోళ్లు కూడా ఇటీవల పెరిగినట్లు వ్యాపారులు చెబుతున్నారు. ధరలు పెరిగినా శుభకార్యాల కోసం కొనుగోళ్లు ఆగడం లేదని పేర్కొంటున్నారు.

బంగారం ధరల పెరుగుదల వెనుక అనేక అంతర్జాతీయ, దేశీయ కారణాలు ఉన్నాయి. ముఖ్యంగా అమెరికా ఫెడరల్ రిజర్వ్ వడ్డీ రేట్లపై స్పష్టత లేకపోవడం వల్ల పెట్టుబడిదారులు గోల్డ్‌లో పెట్టుబడులు పెడుతున్నారు. ప్రపంచవ్యాప్తంగా జియోపాలిటికల్ టెన్షన్స్ కూడా బంగారం డిమాండ్‌ను పెంచుతున్నాయి.

డాలర్ బలపడటం, రూపాయి విలువలో మార్పులు, దిగుమతి సుంకాలు వంటి అంశాలు భారత మార్కెట్‌లో బంగారం ధరలపై ప్రత్యక్ష ప్రభావం చూపుతున్నాయి. భారత్‌లో ఎక్కువగా బంగారం దిగుమతులపైనే ఆధారపడటం వల్ల అంతర్జాతీయ ధరల మార్పు వెంటనే దేశీయ మార్కెట్లో ప్రతిబింబిస్తుంది. ఇక పెళ్లిళ్ల సీజన్ కారణంగా నగల షాపుల్లో కొనుగోళ్లు పెరగడం కూడా ధరల పెరుగుదలకు కారణమైంది. హైదరాబాద్ వంటి ప్రధాన నగరాల్లో గోల్డ్ డిమాండ్ ఎప్పుడూ ఎక్కువగానే ఉంటుంది. ప్రస్తుతం అదే పరిస్థితి కొనసాగుతోంది.

బంగారం ధరలు పెరగడంతో మధ్యతరగతి కుటుంబాలు ఆందోళన చెందుతున్నాయి. ముఖ్యంగా పెళ్లిళ్ల కోసం ముందుగానే బంగారం కొనాలని భావించిన వారు ఇప్పుడు మరింత ఖర్చు చేయాల్సి వస్తోంది. కొందరు వినియోగదారులు ధరలు తగ్గే వరకు వేచి చూడాలని నిర్ణయించుకుంటున్నారు.

మరోవైపు పెట్టుబడిదారులు మాత్రం ఈ పెరుగుదలను సానుకూలంగా చూస్తున్నారు. దీర్ఘకాలిక పెట్టుబడిగా బంగారం ఎప్పటికీ విలువైనదేనని మార్కెట్ నిపుణులు చెబుతున్నారు. ధరలు తాత్కాలికంగా మారినా భవిష్యత్తులో బంగారం విలువ మరింత పెరిగే అవకాశాలు ఉన్నాయని విశ్లేషిస్తున్నారు.

మార్కెట్ విశ్లేషకుల ప్రకారం అంతర్జాతీయ పరిస్థితులు ఇదే విధంగా కొనసాగితే బంగారం ధరలు మరింత పెరిగే అవకాశం ఉంది. అయితే డాలర్ మారకం విలువలు, అమెరికా ఆర్థిక నిర్ణయాలు, అంతర్జాతీయ మార్కెట్ పరిస్థితులపై ఆధారపడి ధరల్లో మార్పులు చోటుచేసుకునే అవకాశం ఉంది.

భారతదేశంలో పండుగలు, వివాహాల సీజన్ సమయంలో బంగారం డిమాండ్ మరింత పెరుగుతుంది. దీంతో హైదరాబాద్ సహా దేశంలోని ప్రధాన నగరాల్లో బంగారం ధరలు ఇంకా పెరిగే అవకాశాలను వ్యాపారులు కొట్టిపారేయడం లేదు. అయితే.. వినియోగదారులు కొనుగోలు చేసే ముందు రోజువారీ ధరలను పరిశీలించడం మంచిదని నిపుణులు సూచిస్తున్నారు. హాల్‌మార్క్ ఆభరణాలు మాత్రమే కొనుగోలు చేయాలని కూడా హెచ్చరిస్తున్నారు.

Also Read: 2025–26 ఐటీఆర్‌ ఫైలింగ్: అర్హులు ఎవరు, లాస్ట్ డేట్ వివరాలు

అగార్కర్ వ్యాఖ్యలు.. వైభవ్‌కు ఇంకా సమయం ఉంది!

Himansh
-
0

Ajit Agarkar టీమిండియా ఎంపికలపై కీలక వ్యాఖ్యలు చేశారు. అఫ్గానిస్తాన్‌తో జరిగే సిరీస్ కోసం భారత జట్టును ప్రకటించిన అనంతరం మీడియాతో మాట్లాడిన అగార్కర్‌, Vaibhav Suryavanshi ఎంపికపై స్పష్టత ఇచ్చారు. యువ ఓపెనర్ వైభవ్ అద్భుతంగా ఆడుతున్నప్పటికీ, ప్రస్తుతం ఓపెనింగ్ స్థానానికి Yashasvi Jaiswalకు అధిక ప్రాధాన్యం ఇస్తున్నట్లు తెలిపారు.

మంగళవారం జరిగిన మీడియా సమావేశంలో ఒక విలేకరి వైభవ్ సూర్యవంశీని టీమిండియా ఓపెనింగ్ స్లాట్‌కు పరిగణలోకి తీసుకున్నారా అని ప్రశ్నించారు. దీనికి స్పందించిన అగార్కర్‌, వైభవ్ చిన్న వయసులోనే అసాధారణ ప్రతిభ కనబరుస్తున్నాడని ప్రశంసించారు. అయితే ఇప్పటికే అంతర్జాతీయ స్థాయిలో రాణిస్తున్న జైస్వాల్‌ను విస్మరించలేమని పేర్కొన్నారు. ప్రస్తుతం వైభవ్‌కు ఇంకా సమయం ఉందని, ముందు ఇండియా-ఏ జట్టులో స్థిరంగా రాణించాలని అగార్కర్ సూచించారు. దీంతో సోషల్ మీడియాలో జరుగుతున్న “త్వరలోనే టీమిండియా ఎంట్రీ” ప్రచారాలపై బీసీసీఐ నుంచి స్పష్టత వచ్చినట్టైంది.

వైభవ్‌పై అగార్కర్ ప్రశంసలు

మీడియా సమావేశంలో అగార్కర్ వైభవ్ సూర్యవంశీ బ్యాటింగ్‌ను ప్రశంసించారు. తక్కువ వయసులోనే అతడు చూపిస్తున్న దూకుడు ప్రత్యేకమని అన్నారు.

“వైభవ్ అద్భుతంగా ఆడుతున్నాడు. అతడి టాలెంట్‌పై ఎలాంటి సందేహం లేదు. కానీ ఇప్పటికే టీమిండియాలో స్థానం సంపాదించుకున్న జైస్వాల్ కూడా అత్యుత్తమంగా రాణిస్తున్నాడు” అని అగార్కర్ వ్యాఖ్యానించారు. యువ ఆటగాళ్లకు సరైన సమయంలో అవకాశాలు ఇవ్వడం అవసరమని, తొందరపాటు నిర్ణయాలు తీసుకోకూడదని ఆయన అభిప్రాయపడ్డారు. ఇండియా-ఏ జట్టులో మంచి ప్రదర్శన కొనసాగిస్తే భవిష్యత్తులో టీమిండియా అవకాశాలు తప్పకుండా వస్తాయని తెలిపారు.

జైస్వాల్‌కు ప్రాధాన్యం ఎందుకు?

టీమిండియా ఓపెనింగ్ విభాగంలో ప్రస్తుతం యశస్వి జైస్వాల్ కీలక ఆటగాడిగా మారాడు. గత కొంతకాలంగా టెస్టులు, టీ20ల్లో అతడు నిలకడగా రాణిస్తున్నాడు.

అంతర్జాతీయ స్థాయిలో అనుభవం పెరుగుతున్న సమయంలో సెలెక్షన్ కమిటీ అతడిపై నమ్మకం ఉంచినట్లు అగార్కర్ వ్యాఖ్యల ద్వారా స్పష్టమైంది. యువ ఆటగాళ్ల మధ్య పోటీ పెరుగుతున్నప్పటికీ, ప్రస్తుతం జైస్వాల్ జట్టులో కీలక స్థానంలో ఉన్నాడని తెలుస్తోంది. అదే సమయంలో వైభవ్ వంటి యువ ఆటగాళ్లను కూడా భవిష్యత్తు కోసం సిద్ధం చేస్తున్నామని సెలెక్టర్లు సంకేతాలు ఇచ్చారు.

ఇండియా-ఏ జట్టులో వైభవ్‌కు అవకాశం

అగార్కర్ తెలిపిన ప్రకారం వైభవ్ ఇప్పటికే ఇండియా-ఏ జట్టుకు ఎంపికయ్యాడు. ఇది అతడి కెరీర్‌లో కీలక దశగా భావిస్తున్నారు.

ఇండియా-ఏ జట్టు ద్వారా యువ ఆటగాళ్లు అంతర్జాతీయ స్థాయికి సిద్ధమవుతుంటారు. అక్కడ మంచి ప్రదర్శన చేస్తే సీనియర్ జట్టులోకి ప్రవేశించే అవకాశాలు పెరుగుతాయి. వైభవ్ విషయంలో కూడా అదే ప్రక్రియ కొనసాగుతోందని తెలుస్తోంది. “ఇంకా సమయం ఉంది. ఈలోగా ఇండియా-ఏ తరఫున అతడు బాగా రాణించాలని కోరుకుంటున్నా” అని అగార్కర్ పేర్కొన్నారు.

ఐపీఎల్‌లో వైభవ్ విధ్వంసం

Rajasthan Royals తరఫున ఐపీఎల్ 2026 సీజన్‌లో వైభవ్ సూర్యవంశీ తన దూకుడు బ్యాటింగ్‌తో అందరి దృష్టిని ఆకర్షిస్తున్నాడు. ఓపెనర్‌గా బరిలోకి దిగుతున్న అతడు మొదటి బంతి నుంచే దాడి చేయడం ప్రత్యేకతగా మారింది. భారీ స్కోర్లు నమోదు చేయకపోయినా, తక్కువ బంతుల్లోనే బౌండరీలు, సిక్సర్ల వర్షం కురిపిస్తూ ప్రత్యర్థి బౌలర్లపై ఒత్తిడి తీసుకొస్తున్నాడు. ఈ సీజన్‌లో 12 మ్యాచ్‌లు ఆడిన వైభవ్ సూర్యవంశీ.. ఏకంగా 486 పరుగులు సాధించాడు. అతడి స్ట్రైక్‌రేట్‌, దూకుడు బ్యాటింగ్‌ కారణంగా సోషల్ మీడియాలో అతడిపై భారీ చర్చ జరిగింది.

సోషల్ మీడియాలో పెరిగిన హైప్

ఐపీఎల్‌లో వైభవ్ ప్రదర్శన తర్వాత “తదుపరి టీమిండియా స్టార్”గా సోషల్ మీడియాలో అభిమానులు ప్రచారం చేస్తున్నారు. ముఖ్యంగా యువ క్రికెటర్‌గా అతడు చూపిస్తున్న నిర్భయ ఆట తీరు అభిమానులను ఆకట్టుకుంది. అతడిని వెంటనే జాతీయ జట్టులోకి తీసుకోవాలంటూ పలువురు మాజీ క్రికెటర్లు, అభిమానులు కూడా అభిప్రాయాలు వ్యక్తం చేశారు. అయితే అగార్కర్ వ్యాఖ్యలతో సెలెక్షన్ కమిటీ మాత్రం దీర్ఘకాలిక ప్రణాళికతో ముందుకు వెళ్తోందని అర్థమవుతోంది.

భవిష్యత్తులో టీమిండియా అవకాశాలు

వైభవ్ సూర్యవంశీ ప్రతిభపై సెలెక్టర్లకు నమ్మకం ఉన్నప్పటికీ, అతడిని క్రమంగా అంతర్జాతీయ స్థాయికి తీసుకురావాలనే ఆలోచనలో ఉన్నట్లు తెలుస్తోంది.

ఇండియా-ఏ జట్టులో రాణిస్తే త్వరలోనే సీనియర్ జట్టుకు అవకాశం రావొచ్చని క్రికెట్ విశ్లేషకులు భావిస్తున్నారు. ముఖ్యంగా టీ20 ఫార్మాట్‌లో అతడి దూకుడు బ్యాటింగ్‌ భారత జట్టుకు ఉపయోగపడే అవకాశం ఉందని చెబుతున్నారు. ప్రస్తుతం మాత్రం జైస్వాల్‌కు ప్రాధాన్యం కొనసాగుతుందని అగార్కర్ స్పష్టం చేయడంతో ఓపెనింగ్ స్థానంపై చర్చకు తాత్కాలికంగా తెరపడింది.

Also Read: ధోని రిటైర్మెంట్‌.. అదే లాస్ట్ మ్యాచా?

Medical Store Strike: అందుకే.. దేశవ్యాప్తంగా మెడికల్ షాపుల బంద్!

Giribabu
-
0

దేశవ్యాప్తంగా కెమిస్టులు, డ్రగ్గిస్టులు రేపు (మే 20న) సమ్మెకు పిలుపునిచ్చిన నేపథ్యంలో.. తెలంగాణలో కూడా మందుల దుకాణాలు మూతపడనున్నాయి. Telangana Chamber of Chemists and Druggists ప్రతినిధులు హైదరాబాద్‌లోని బషీర్‌బాగ్ దేశోద్ధారక భవన్‌లో నిర్వహించిన సమావేశంలో ఈ విషయాన్ని వెల్లడించారు. ఆన్‌లైన్ మందుల విక్రయాలను నిలిపివేయడం, కార్పొరేట్ సంస్థల అధిక డిస్కౌంట్ల నియంత్రణ, నకిలీ మందుల విక్రయాల నివారణ వంటి డిమాండ్లతో ఈ బంద్ నిర్వహిస్తున్నట్లు తెలిపారు.

ఈ సమ్మెకు All India Organisation of Chemists and Druggists పిలుపునిచ్చింది. దేశవ్యాప్తంగా రిటైల్ మెడికల్ షాపులు మూతపడనున్నప్పటికీ, ప్రజలకు అత్యవసర పరిస్థితుల్లో ఇబ్బందులు తలెత్తకుండా ప్రత్యామ్నాయ ఏర్పాట్లు చేస్తున్నట్లు ఫార్మసీ సంఘాలు వెల్లడించాయి. హైదరాబాద్‌తో.. పాటు తెలంగాణ వ్యాప్తంగా ఈ సమ్మె ప్రభావం కనిపించే అవకాశం ఉంది. ముఖ్యంగా సాధారణ మెడికల్ స్టోర్లు మూతపడనున్నప్పటికీ, ఆస్పత్రులకు అనుబంధంగా పనిచేసే ఫార్మసీలు మాత్రం అందుబాటులో ఉంటాయని అధికారులు స్పష్టం చేశారు.

సమ్మెకు కారణాలు

ఫార్మసీ సంఘాలు ఈ సమ్మెకు పలు ప్రధాన డిమాండ్లను ప్రస్తావించాయి. ముఖ్యంగా ఆన్‌లైన్‌లో మందుల విక్రయాలు పెరగడం వల్ల చిన్న, మధ్య తరహా మెడికల్ షాపులు తీవ్రంగా నష్టపోతున్నాయని పేర్కొన్నాయి.

కార్పొరేట్ ఫార్మసీలు భారీ డిస్కౌంట్లతో మందులు విక్రయించడం వల్ల స్థానిక మెడికల్ దుకాణాలపై ప్రభావం పడుతోందని తెలిపారు. అదేవిధంగా నకిలీ మందుల విక్రయాలు కూడా పెరుగుతున్నాయని, వాటిని అరికట్టేందుకు కేంద్ర, రాష్ట్ర ప్రభుత్వాలు కఠిన చర్యలు తీసుకోవాలని డిమాండ్ చేశారు. ఫార్మసీ రంగాన్ని రక్షించేందుకు సరైన విధానాలు తీసుకురావాలని, చిన్న వ్యాపారులకు రక్షణ కల్పించాలని సంఘాలు కోరుతున్నాయి.

ఏ మెడికల్ స్టోర్లు పనిచేస్తాయి?

దేశవ్యాప్తంగా సమ్మె జరుగుతున్నప్పటికీ కొన్ని కీలక మెడికల్ సేవలు అందుబాటులో ఉండనున్నాయి. ప్రధాన ఫార్మసీ చైన్ అవుట్‌లెట్లు, Pradhan Mantri Bhartiya Janaushadhi Pariyojana కేంద్రాలు, ఆస్పత్రులకు అనుబంధంగా ఉన్న మెడికల్ షాపులు, అమృత్ ఫార్మసీ అవుట్‌లెట్లు పనిచేస్తాయని అధికార వర్గాలు తెలిపాయి.

అత్యవసర వైద్య అవసరాలను దృష్టిలో ఉంచుకుని ఈ నిర్ణయం తీసుకున్నట్లు పేర్కొన్నారు. ముఖ్యంగా ఆస్పత్రుల్లో చికిత్స పొందుతున్న రోగులకు ఎలాంటి ఇబ్బంది కలగకుండా ప్రత్యేక చర్యలు తీసుకుంటున్నట్లు తెలిపారు. హైదరాబాద్‌లోని ప్రధాన ప్రభుత్వ, ప్రైవేట్ ఆస్పత్రులకు అనుబంధంగా ఉన్న ఫార్మసీలు సాధారణంగా సేవలు కొనసాగిస్తాయని సమాచారం.

కొన్ని రాష్ట్రాలు సమ్మె నుంచి వైదొలగింపు

దేశవ్యాప్తంగా సమ్మెకు పిలుపునిచ్చినా, కొన్ని రాష్ట్రాల ఫార్మసీ సంఘాలు ఇప్పటికే ఈ బంద్ నుంచి తప్పుకున్నాయి. పశ్చిమ బెంగాల్‌, కేరళ, పంజాబ్‌, మహారాష్ట్ర, కర్ణాటక, హరియాణా, ఉత్తర్‌ప్రదేశ్‌, లద్దాక్‌, గుజరాత్‌, ఛత్తీస్‌గఢ్‌, సిక్కిం, ఉత్తరాఖండ్‌కు చెందిన రిటైల్ ఫార్మసీ అసోసియేషన్లు సమ్మెలో పాల్గొనబోమని లిఖితపూర్వకంగా తెలిపాయి. అయితే.. తెలంగాణతో పాటు మరికొన్ని రాష్ట్రాల్లో సమ్మె ప్రభావం స్పష్టంగా కనిపించే అవకాశముందని ఫార్మసీ సంఘాలు చెబుతున్నాయి.

అత్యవసర మందుల కోసం టోల్‌ఫ్రీ సేవలు

మెడికల్ షాపుల బంద్ నేపథ్యంలో ప్రజలకు ఇబ్బందులు తలెత్తకుండా Telangana Drugs Control Administration కీలక సూచనలు జారీ చేసింది.

అత్యవసర మందులు దొరకని పరిస్థితుల్లో ప్రజలు స్థానిక డ్రగ్ కంట్రోల్ అధికారులను సంప్రదించాలని సూచించింది. సంబంధిత అధికారుల ఫోన్ నంబర్లు, చిరునామాలు డీసీఏ అధికారిక వెబ్‌సైట్‌లోని “Key Contacts” విభాగంలో అందుబాటులో ఉంటాయని తెలిపింది. ప్రజలు సహాయం కోసం టోల్ ఫ్రీ నంబర్ 1800 599 6969కు కాల్ చేయవచ్చని వెల్లడించింది. ముఖ్యంగా ప్రాణాపాయ పరిస్థితుల్లో అవసరమైన మందులు అందించేందుకు ప్రత్యేక వ్యవస్థను సిద్ధం చేసినట్లు పేర్కొంది.

ప్రజలకు ఇబ్బంది లేకుండా చర్యలు

సమ్మె కారణంగా రోగులకు ఎలాంటి ఇబ్బందులు కలగకుండా ప్రభుత్వం, డ్రగ్ కంట్రోల్ అధికారులు పలు చర్యలు తీసుకుంటున్నారు. ఆస్పత్రుల్లో అవసరమైన మందుల నిల్వలను ముందుగానే సిద్ధం చేసినట్లు సమాచారం.

ప్రభుత్వ ఆస్పత్రులతో పాటు ప్రధాన ప్రైవేట్ ఆస్పత్రుల్లో కూడా అత్యవసర ఫార్మసీలు అందుబాటులో ఉండనున్నాయి. ముఖ్యంగా డయాబెటిస్‌, గుండె జబ్బులు, రక్తపోటు వంటి దీర్ఘకాలిక వ్యాధులతో బాధపడుతున్న వారు ముందుగానే మందులు కొనుగోలు చేసుకోవాలని వైద్యులు సూచిస్తున్నారు. హైదరాబాద్‌తో పాటు తెలంగాణ వ్యాప్తంగా ప్రజలకు అవగాహన కల్పించేందు…

123...89Page 1 of 89