Auto Expo 2025 Venues Timings Tickets and How to Go: ఎప్పుడెప్పుడా అని ఎదురు చూస్తున్న ‘భారత్ మొబిలిటీ గ్లోబల్ ఎక్స్‌పో 2025’ మరి కొన్ని గంటల్లో ప్రారంభం కానుంది. రెండేళ్లకు ఒకసారి జరిగే ఈ కార్యక్రమంలో జపాన్, చైనా, కొరియా మొదలైన దేశాలకు చెందిన వాహనాలు కనిపించనున్నాయి. ఈ ఆటో ఎక్స్‌పో 2025 ఈవెంట్ మూడు ప్రదేశాల్లో (భారత్ మండపం (ప్రగతి మైదాన్), ద్వారకా వద్ద ఉన్న యశోభూమి మరియు గ్రేటర్ నోయిడా) జరగనుంది. అయితే ఈ కార్యక్రమానికి ఎలా వెళ్ళాలి? టికెట్స్ ఎలా పొందాలి? టికెట్ కోసం డబ్బు చెల్లించాలా అనే విషయాలను ఇక్కడ వివరంగా తెలుసుకుందాం.
టికెట్స్ ఎలా పొందాలి? డబ్బు ఎంత చెల్లించాలి
నిజానికి రేపు (జనవరి 17) జరగనున్న భారత్ మొబిలిటీ గ్లోబల్ ఎక్స్‌పో 2025 కార్యక్రమంలో పాల్గొనటానికి టికెట్స్ తప్పనిసరి. అయితే ఈ టికెట్స్ క్యూఆర్ కోడ్ రూపంలో పొందాల్సి ఉంటుంది. దీని కోసం డబ్బు చెల్లించాల్సిన అవసరం లేదు.
ఆటో ఎక్స్‌పో సందర్శించాలనుకునే వ్యక్తి ముందుగా అధికారిక వెబ్‌సైట్‌లో లాగిన్ అయిన తరువాత.. విజిటర్ రిజిస్టర్ సెక్షన్ మీద క్లిక్ చేయాలి. ఆ తరువాత మీకు సంబంధించిన సమాచారం లేదా ప్రాథమిక సమాచారం ఫిల్ చేసిన తరువాత.. రిజిస్టర్ ఈ మెయిల్ ఐడీకీ క్యూఆర్ కోడ్ వస్తుంది. ఇదే ఎంట్రీ పాస్ మాదిరిగా పనిచేస్తుంది.
సందర్శకులు ఎప్పుడు హాజరవ్వాలి? సమయం వివరాలు
జనవరి 17న ప్రారంభం కానున్న ఆటో ఎక్స్‌పో కార్యక్రమానికి.. మొదటి రోజు (శుక్రవారం) మీడియా సిబ్బందిని మాత్రం అనుమతిస్తారు. జనవరి 18 (శనివారం) ప్రత్యేక ఆహ్వానితులకు మరియు డీలర్లకు మాత్రమే అనుమతి ఉంటుంది. ఆ తరువాత జనవరి 19 (ఆదివారం) నుంచి జనవరి 22 (బుధవారం) వరకు ప్రజలు సందర్శించవచ్చు. అయితే సందర్శలు ఆ రోజుల్లో ఉదయం 10 గంటల నుంచి సాయంత్రం 6 గంటల లోపు మాత్రమే సందర్శించాల్సి ఉంటుంది.
ఆటో ఎక్స్‌పోలో కనిపించే బ్రాండ్స్
2025 ఆటో ఎక్స్‌పో కార్యక్రమంలో టాటా మోటార్స్, మహీంద్రా అండ్ మహీంద్రా, మారుతి సుజుకి, హ్యుందాయ్, ఎంజీ మోటార్స్, మెర్సిడెస్ బెంజ్, బీఎండబ్ల్యూ, స్కోడా, ఇసుజు, కియా మోటార్స్, టయోటా మోటార్స్ వంటి దిగ్గజ కార్ల తయారీదారులతో పాటు.. ఓలా ఎలక్ట్రిక్, రాయల్ ఎన్ఫీల్డ్, హోండా మోటార్‌సైకిల్, హీరో మోటోకార్ప్ వంటి టూ వీలర్స్ బ్రాండ్స్ కనిపించనున్నాయి. అంతే కాకుండా టైర్ షో, బ్యాటరీ షో, మొబిలిటీ టెక్, స్టీల్ ఇన్నోవేషన్ మరియు ఇండియా సైకిల్ షో కూడా ఇక్కడ జరగనున్నాయి.
ముఖ్య అతిధులు ఎవరంటే?
రేపు జరగనున్న 2025 ఆటో ఎక్స్‌పో కార్యక్రమానికి ముఖ్య అతిధిగా.. భారత ప్రధాని నరేంద్ర మోదీ హాజరయ్యే అవకాశం ఉంది. ఈయనే ఈ కార్యక్రమాన్ని ప్రారంభించనున్నట్లు చెబుతున్నారు. మోదీ మాత్రమే కాకుండా.. కేంద్ర మంత్రి నితిన్ గడ్కరీ మొదలైనవారు కూడా హాజరయ్యే అవకాశం ఉందని సమాచారం. కానీ వీరు ఎప్పుడు హాజరవుతారు అనే విషయాలు తెలియాల్సి ఉంది.
ఆటో ఎక్స్‌పో 2025 వేదికకు ఎలా చేరుకోవాలి
దేశ రాజధాని నగరంలో జరగనున్న ఈ 2025 ఆటో ఎక్స్‌పో ప్రగతి మైదాన్‌లోని భారత్ మండపంలో జరుగుతుంది. ఢిల్లీ చేరుకున్న వారు ఈ వేదిక సమీపానికి మెట్రో ద్వారా చేరుకోవచ్చు. సందర్శకులు బ్లూ లైన్ మెట్రోలో సుప్రీంకోర్టు స్టేషన్‌కు చేరుకోవచ్చు. అక్కడి నుంచి సులభంగా వేదికను చేరుకోవచ్చు. కారులో వెళ్లాలనుకునే వారికి ప్రత్యేకంగా పార్కింగ్ సౌకర్యాలు కూడా ఉన్నాయి.
Also Read: 2025 Auto Expo: డేట్స్, బ్రాండ్స్ & పూర్తి వివరాలు ఇవే
రేపు ప్రారంభం కానున్న 2025 ఆటో ఎక్స్‌పో కార్యక్రమంలో దేశీయ వాహనాలు మాత్రమే కాకుండా.. అన్యదేశ్య వాహనాలు కనిపించనున్నాయి. ఇప్పటికే ఏ వాహనాలు ఆటో ఎక్స్‌పోలో కనిపించనున్నాయి అనే దానికి సంబంధించిన కొంత సమాచారం వెల్లడైంది. అయితే ఏ కంపెనీలు ఈ కార్యక్రమంలో కనిపించలేదని వివరాలు త్వరలోనే అధికారికంగా తెలుస్తుంది. ఈ ఏడాది ఎలక్ట్రిక్ వాహనాలు పెద్ద ఎత్తున కనిపించే అవకాశం ఉందని తెలుస్తోంది. ఇందులో టూ వీలర్, ఫోర్ వీలర్స్ మాత్రమే కాకుండా.. త్రీ వీలర్ వాహనాలు కూడా ఉండే అవకాశం ఉందని సమాచారం.
