స్టైలిష్ కారు ‘ఎంజీ సైబర్‌స్టర్’ బుకింగ్స్ షూరూ: డెలివరీలు ఎప్పుడంటే?

MG Cyberster At Auto Expo 2025: ఎంతో అట్టహాసంగా ప్రారంభమైన 2025 ఆటో ఎక్స్‌పోలో ‘జేఎస్‌డబ్ల్యు – ఎంజీ మోటార్ ఇండియా’ (JSW-MG Motor) తన స్టైలిష్ సైబర్‌స్టర్ (Cyberster) కారును ప్రదర్శించింది. అంతే కాకుండా దీని కోసం ఫ్రీ బుకింగ్స్ స్వీకరించడం కూడా ప్రారంభించింది. కాగా డెలివరీలు ఏప్రిల్‌లో ప్రారంభమయ్యే అవకాశం ఉంది.

ఎంజీ సైబర్‌స్టర్ అనేది భారతదేశంలో బ్రాండ్ యొక్క మొట్టమొదటి ఎలక్ట్రిక్ స్పోర్ట్స్ కారు. ఇది కంప్లీట్ బిల్డ్ యూనిట్‌గా అమ్ముడవుతుంది. కాబట్టి దీని ధర కొంత ఎక్కువగానే ఉండొచ్చని తెలుస్తోంది. అయితే కంపెనీ ఈ కారు ధరలను అధికారికంగా వెల్లడించలేదు. కానీ దీని ధర రూ. 60 లక్షల నుంచి రూ. 70 లక్షల మధ్య ఉండే అవకాశం ఉంటుందని భావిస్తున్నాము.

బ్యాటరీ & రేంజ్

కొత్త ఎంజీ సైబర్‌స్టర్ టాప్ స్పెక్ వేరియంట్ 77 కిలోవాట్ బ్యాటరీ ప్యాక్ పొందుతుంది. ఈ కారు ఆల్ వీల్ డ్రైవ్ సిస్టం కలిగి ఉండటం వల్ల ప్రతి యాక్సిల్‌పై ఒక మోటారు ఉంటుంది. కాబట్టి పవర్‌ట్రెయిన్ గరిష్టంగా 510 హార్స్ మరియు 725 న్యూటన్ మీటర్ టార్క్ ఉంటుంది. ఈ ఎలక్ట్రిక్ స్పోర్ట్స్ కారు గంటకు 0 నుంచి 100 కిమీ వరకు వేగవంతం కావడానికి పట్టే సమయం కేవలం 3.2 సెకన్లు మాత్రమే. కాగా ఇది ఒక ఫుల్ ఛార్జ్ మీద గరిష్టంగా 580 కిమీ రేంజ్ అందిస్తుందని సమాచారం. అంతే కాకుండా కంపెనీ ఈ కారును 64 కిలోవాట్ బ్యాటరీ ప్యాక్‌తో కూడా ప్రారంభించే అవకాశం ఉందని తెలుస్తోంది.

కలర్ ఆప్షన్స్ & డిజైన్

ఎంజీ సైబర్‌స్టర్ చూడటానికి కొంత లంబోర్ఘిని కారు మాదిరిగా అనిపిస్తుంది. ఇది మొత్తం నాలు కలర్ (ఎరుపు, బూడిద, తెలుగు మరియు పసుపు) ఆప్షన్లలో లభించే అవకాశం ఉంటుంది. కాగా ప్రపంచ మార్కెట్లో ఈ కారు ఆరు కలర్ ఆప్షన్లలో లభిస్తోంది.

ఇక డిజైన్ విషయానికి వాశి.. ఎంజీ సైబర్‌స్టర్ అనేది బ్రాండ్ యొక్క అన్ని ఇతర మోడల్స్ కంటే కూడా భిన్నంగా ఉంటుంది. ఇది డ్రాప్ టాప్ టూ సీటర్ ఎలక్ట్రిక్ వెహికల్ ఎంజీ బీ రోడ్‌స్టర్ నుంచి ప్రేరణ పొందినట్లు సమాచారం. ఇందులో ఆక్టాగోన్ ఎంజీ బ్యాడ్జ్ మరియు పొడవైన బోనెట్ వంటివి ఉన్నాయి. కారులో 20 ఇంచెస్ అల్లాయ్ వీల్స్ ఉన్నాయి. వెనుక భాగంలో బాణం ఆకారంలో ఉండే టెయిల్ లైట్స్ ఉన్నాయి. అంతే కాకుండా వెనుక వెడల్పు అంతటా ఎల్ఈడీ లైట్ బార్ ఉంటుంది. మొత్తం మీద దీని డిజైన్ చాలా అద్భుతంగా ఉందని తెలుస్తోంది.

ఇంటీరియర్ డిజైన్ మరియు ఫీచర్స్

కొత్త ఎంజీ సైబర్‌స్టర్ గొప్ప ఇంటీరియర్ డిజైన్ పొందుతుంది. ఇందులోని ప్లాట్ బాటమ్ స్టీరింగ్ వీల్.. ఆక్టాగోనల్ ఎంజీ లోగో పొందుతుంది. దీని వెనుక 10.25 ఇంచెస్ డ్రైవర్ డిస్‌ప్లే ఉంటుంది. దీనికి ఇరువైపులా 7 ఇంచెస్ స్క్రీన్స్ ఉంటాయి. అంతే కాకుండా సెంటర్ కన్సోల్ డ్రైవ్ సెలక్టర్ పక్కన నిలువగా అమర్చబడిన 7 ఇంచెస్ టచ్‌స్క్రీన్ కూడా ఉంది. దీనికి కింద భాగంలో కంట్రోల్స్ ఉంటాయి.

ఫీచర్స్ విషయానికి వస్తే.. ఎంజీ సైబర్‌స్టర్ కారులో అడాప్టివ్ క్రూయిజ్ కంట్రోల్, ఆపిల్ కార్‌ప్లే, ఆండ్రాయిడ్ ఆటో, 360 డిగ్రీ కెమెరా, బ్లైండ్ స్పాట్ మానిటరింగ్, లేన్ కీప్ అసిస్ట్, రియర్ క్రాస్ ట్రాఫిక్ అలర్ట్, ఫ్రంట్ కొలిషన్ వార్ణింగ్ వంటి అడ్వాన్స్డ్ డ్రైవర్ అసిస్ట్ సిస్టమ్ ఫీచర్స్ అన్నీ ఉన్నాయి. ఇవన్నీ ప్రత్యేకించి వాహన వినియోగదారులకు మంచి డ్రైవింగ్ అనుభూతిని అందిస్తాయి.

Also Read: లక్షలమంది మెచ్చిన ‘హ్యుందాయ్ క్రెటా ఈవీ’ వచ్చేసింది: ధర ఎంతో తెలుసా?

భారతదేశంలో రోజువారీ వినియోగానికి, వ్యాపార ప్రయోజనాలకు ఎలక్ట్రిక్ కార్లు విరివిగా అందుబాటులో ఉన్నాయి. కానీ స్పోర్ట్ కార్ల విభాగంలో ఎలక్ట్రిక్ కార్లు చాలా తక్కువ. కానీ ఈ విభాగంలో కూడా తన ఉనికిని చాటుకోవడానికి ఎంజీ మోటార్ తన సైబర్‌స్టర్ కారును ప్రవేశపెట్టింది. కాబట్టిన ఇది మార్కెట్లో వాహన ప్రియులను ఆకర్షిస్తుందా?.. ఎలాంటి అమ్మకాలను పొందుతుంది.. అనే విషయాలు తెలియాల్సి ఉంది.