Most Affordable Car in India Ligier Myli Mini EV: లక్ష రూపాయలు పెట్టినా.. ఓ మంచి బైక్ / స్కూటర్ కొనలేము. అలాంటిది కేవలం రూ.1 లక్షకే ఎలక్ట్రిక్ కారు వస్తుందంటే నమ్ముతారా?. బహుశా ఎవరూ నమ్మరు. కానీ ఇప్పుడు నమ్మాల్సిన సమయం వచ్చేసింది. ఎందుకంటే లక్షకే కారు అందిస్తామంటూ.. ఓ కంపెనీ ముందుకు వచ్చింది. దీనికి సంబందించిన మరిన్ని వివరాలు ఇక్కడ వివరంగా తెలుసుకుందాం.
రూ.1 లక్షకే ఎలక్ట్రిక్ కారు
లిజియర్ (Ligier) అనే కంపెనీ కేవలం లక్ష రూపాయలకే మినీ ఎలక్ట్రిక్ కారును అందించడానికి సిద్ధమైంది. ప్రస్తుతం కంపెనీ ఈ కారును టెస్టింగ్ దశలో ఉంచినట్లు సమాచారం. అనుకున్న విధంగా అన్నీ సవ్యంగా జరిగితే.. ఒక్క భారతదేశంలో మాత్రమే కాదు, ప్రపంచ మార్కెట్లోనే ఇదే సరసమైన కారుగా రికార్డ్ క్రియేట్ చేసే అవకాశం ఉంది.
రెండు సీట్లు కలిగిన ఈ కారు.. చూటడానికి చాలా ఆకర్షణీయంగా ఉంది. ఇది యూరోపియన్ డిజైన్‌తో ప్రేరణ పొందినట్లు సమాచారం. ఈ కారు మల్టిపుల్ బ్యాటరీ ప్యాక్ ఆప్షన్లతో లభిస్తుంది. అయితే ఇది ఒక సింగిల్ ఛార్జ్‌పై 63 కిమీ నుంచి 192 కిమీ రేంజ్ అందిస్తుందని సమాచారం. రోజువారీ ప్రయాణానికి.. నగర ప్రయాణానికి ఇది చాలా అనుకూలంగా ఉంటుంది. పరిమాణంలో చిన్నదిగా ఉండటం వల్ల రద్దీగా ఉండే ప్రదేశాల్లో కూడా ఇది సజావుగా ముందుకు సాగుతుంది.
బ్యాటరీ ఫ్యాక్స్ & రేంజ్
లిజియర్ మినీ ఈవీ ఎలక్ట్రిక్ కారు.. మల్టిపుల్ వేరియంట్లలో లభిస్తుంది. అవి G.OOD, I.DEAL, E.PIC మరియు R.EBEL వేరియంట్లు. ఇవి 4.14 కిలోవాట్ బ్యాటరీ, 8.2 కిలోవాట్ బ్యాటరీ మరియు 12.42 కిలోవాట్ బ్యాటరీ ఫ్యాక్స్ పొందుతాయి. కాబట్టి రేంజ్ కూడా 63 కిమీ, 123 కిమీ మరియు 192 కిమీ వరకు ఉంటుంది.
ఫీచర్స్ మరియు స్పెసిఫికేషన్స్
విడుదలకు సిద్దమవుతున్న కొత్త లిజియర్ మినీ ఈవీ ఎలక్ట్రిక్ కారు మోపెడ్ మాదిరిగా ఉంటుంది. దీని పొడవు 2958 మిమీ, వెడల్పు 1499 మిమీ మరియు ఎత్తు 1541 మిమీ వరకు ఉంటుంది. కాబట్టి ఇది ఇద్దరు ప్రయాణించడానికి అనుకూలంగా ఉంటుందని తెలుస్తోంది. రెండు డోర్లను మాత్రమే కలిగి ఉన్న ఈ కారు 12 ఇంచెస్ మరియు 13 ఇంచెస్ వీల్స్ పొందుతుందని తెలుస్తోంది.
Also Read: ఆటో ఎక్స్‌పో 2025: టికెట్స్ ఎలా పొందాలి? టైమింగ్స్ ఏంటి? – ఇదిగో పూర్తి వివరాలు
ఫీచర్స్ విషయానికి వస్తే.. లిజియర్ మినీ ఈవీ ఎలక్ట్రిక్ కారు లేటెస్ట్ అండ్ స్పోర్టీ డిజైన్ పొందుతుందని తెలుస్తోంది. ఇందులో 10 ఇంచెస్ టచ్‌స్క్రీన్ ఇన్ఫోటైన్‌మెంట్ సిస్టం, ఆపిల్ కార్‌ప్లే మరియు ఆండ్రాయిడ్ ఆటో వంటివి పొందుతుంది. ఇవి కాకుండా ఈ కారులో పవర్డ్ స్టీరింగ్ వీల్, హీటెడ్ డ్రైవర్ సీట్, ఆటోమాటిక్ క్లైమేట్ కంట్రోల్ మరియు కార్నర్ ఏసీ వెంట్స్ వంటివి కూడా ఇందులో ఉన్నాయి. ఇవన్నీ వాహన వినియోగదారులకు మంచి డ్రైవింగ్ అనుభూతిని అందిస్తాయి. కాగా.. ఇంకా లిజియర్ మినీ ఈవీకి సంబంధించిన చాలా వివరాలు తెలియాల్సి ఉంది. ఇవన్నీ కూడా త్వరలోనే వెల్లడయ్యే అవకాశం ఉంది.
అతి చిన్న కారు
భారతీయ మార్కెట్లో రూ. 5 లక్షల నుంచి రూ. కోట్ల విలువ చేసే కార్ల వరకు వినియోగంలో ఉన్నాయి. అయితే లక్ష రూపాయలకే కారు అంటే.. చాలామంది తప్పకుండా దీనిని కొనుగోలు చేసే అవకాశం ఉంటుందని భావిస్తున్నాము. గతంలో ‘రతన్ టాటా’ తక్కువ ధరలో ఫ్యామిలీ కారు అందించాలనే ఉద్దేశ్యంతో ‘టాటా నానో’ కారును ప్రవేశపెట్టారు. ఇప్పుడు ఆ కారు ఉత్పత్తి దశలో లేదు. కానీ ఎలక్ట్రిక్ కారుగా మార్కెట్లో అడుగుపెట్టడానికి సిద్దమవుతున్నట్లు సమాచారం. అయితే నానో కారు కంటే చిన్నదైన కారు ఇప్పటి వరకు మార్కెట్లో అందుబాటులోకి రాలేదనే చెప్పాలి. కాబట్టి లిజియర్ కంపెనీ లాంచ్ చేయనున్న కారు.. మార్కెట్లోకి అడుగుపెట్టనున్న అతి చిన్న కారు అని స్పష్టమవుతోంది. డిజైన్ మరియు ఫీచర్స్ అన్నీ కూడా దీని ధర వద్ద ఉత్తమాంగానే ఉన్నాయని తెలుస్తోంది. కానీ ఈ కారులో ఎలాంటి సేఫ్టీ ఫీచర్స్ ఉంటాయనేది తెలియాల్సి ఉంది.
