Nitin Gadkari In High Speed Car Ferrari Roma: ఆటోమొబైల్ రంగం వృద్ధికి, దేశంలో నేషనల్ హైవేలు వేగంగా అభివృద్ధి చెందటానికి ప్రధాన కారకులలో ఒకరు కేంద్ర మంత్రి నితిన్ గడ్కరీ” (Nitin Gadkari). దేశంలో ఫ్యూయెల్ (పెట్రోల్, డీజిల్) కార్లను ప్రత్యామ్నాయ వాహనాలు అందుబాటులోకి తీసుకురావాలని ఎప్పుడూ సంస్థలను ప్రోత్సహిస్తూ ఉండే ఈయన.. ఇటీవల ఓ హై స్పీడ్ సూపర్ కారులో కనిపించారు. దీనికి సంబంధించిన ఓ వీడియో కూడా సోషల్ మీడియాలో వైరల్ అవుతోంది.
వీడియోలో గమనించినట్లయితే.. మధ్యప్రదేశ్‌లోని నాట్రక్స్ (Natrax) హై-స్పీడ్ టెస్ట్ ట్రాక్‌కు ఖరీదైన సూపర్ కార్లు చేరుకోవడం చూడవద్దు. ఆ సమయంలో నితిన్ గడ్కరీ.. సూపర్ కార్ల యజమానులతో సంభాషించారు. తరువాత ఫెరారీ రోమా (Ferrari Roma) కారులో ఆయన కూర్చున్నారు.
నితిన్ గడ్కరీ కూర్చున్న ఫెరారీ కారు నీలి రంగులో చాలా ఆకర్షణీయంగా ఉంది. ఈ కారుతో పాటు పోర్స్చే 911, లంబోర్ఘిని హురాకాన్ వంటి కార్లు రావడం కూడా చూడవచ్చు. మంత్రి ప్రయాణిస్తున్న ఫెరారీ కారును అవి అధిగమించడం కూడా వీడియోలో చూడవచ్చు. అయితే ఇక్కడ గమనించవలసిన విషయం ఏమిటంటే.. కారును నితిన్ గడ్కరీ డ్రైవ్ చేయడం లేదు. ఆయన కేవలం రైడ్‌ను ఆస్వాదిస్తున్నట్లు చూడవచ్చు.
NATRAX (నాట్రక్స్)
నాట్రక్స్ (NATRAX) అనేది నేషనల్ ఆటోమోటివ్ టెస్ట్ ట్రాక్. ఇది మధ్యప్రదేశ్‌లోని ధార్ జిల్లా పితంపూర్‌లో ఉంది. ఇది భారతదేశంలో అత్యంత అధునాతమైన హై-స్పీడ్ ట్రాక్‌లలో ఒకరి మరియు ప్రపంచంలోనే ఐదవ అతిపెద్ద ట్రాక్. దీనిని ఆటోమోటివ్ టెస్టింగ్ మరియు సర్టిఫికేషన్ కోసం ఉపయోగిస్తారు. సూపర్ కార్లను చాలా వేగంగా డ్రైవ్ చేయడానికి ఈ ట్రాక్ చాలా ఉపయోగకరంగా ఉంటుంది.
హైవేల నిర్మాణంపై గడ్కరీ శ్రద్ద
భారతదేశంలోని హైవేలను.. ప్రపంచ స్థాయి హైవేల మాదిరిగా తీర్చి దిద్దటానికి మరియు ఎక్స్‌ప్రెస్‌వేల నిర్మాణానికి కంకణం కట్టుకున్న నితిన్ గడ్కరీ.. ఇప్పటికే అనేక ఎక్స్‌ప్రెస్‌వేలు, విశాలమైన రహదారుల నిర్మాణానికి కారణమయ్యారు. ఈ రహదారులకు సంబంధించిన అభివృద్ధి పనులను కూడా ఆయన తరచూ పర్యవేక్షిస్తుంటారు. అంతే కాకుండా హైవే పనులను సక్రమంగా నిర్వహించని కాంట్రాక్టర్లపైన గడ్కరీ చర్యలు తీసుకున్న సందర్భాలు కూడా కోకొల్లలుగా ఉన్నాయి.
మన దేశంలో హైవేలపై జరుగుతున్న ప్రమాదాలను తగ్గించడానికి.. భారీ వాహనాలకు సైతం భద్రతా ఫీచర్స్ ప్రతిపాదించారు. ఇందులో భాగంగానే MORTH డ్రాఫ్ట్ నోటిఫికేషన్ కూడా జారీ చేసే అవకాశం ఉందని ఆయన పేర్కొన్నారు. కాబట్టి భారీ వాహనాల్లో కూడా ఎలక్ట్రానిక్ స్టెబిలిటీ కంట్రోల్, ఎమర్జెన్సీ బ్రేకింగ్ సిస్టం వంటి సేఫ్టీ ఫీచర్స్ ఉండాలి. అంతే కాకుండా డ్రైవింగ్ శిక్షణ కేంద్రాలు మరియు ఆటోమేటెడ్ టెస్టింగ్ క్లస్టర్‌లను ఏర్పాటు చేయడానికి భారీ కమర్షియల్ వాహనాల డ్రైవర్‌లకు ట్రైనింగ్ ఇవ్వడానికి మరియు సురక్షితమైన డ్రైవింగ్ ప్రవేశపెట్టడానికి ఏకంగా 4500 కోట్ల రూపాయలతో కేంద్రం ఓ కొత్త స్కీమ్ కూడా ప్రవేశపెట్టే అవకాశం ఉందని సమాచారం.
ఫెరారీ రోమా
ప్రపంచ మార్కెట్లో అత్యంత ఖరీదైన కార్ల జాబితాలో ఒకటైన ఫెరారీ కంపెనీకి చెందిన ‘రోమా’ కారు ధర రూ. 3.76 కోట్ల కంటే ఎక్కువే. 2019లో ప్రారంభమైన ఈ కారు 3.9 లీటర్ ట్విన్ టర్బోచార్జ్డ్ వీ8 ఇంజిన్ పొందుతుంది. ఇది 690 పీఎస్ పవర్, 760 ఎన్ఎమ్ టార్క్ అందిస్తుంది. ఇంజిన్ 8 స్పీడ్ డ్యూయెల్ క్లచ్ ఆటోమాటిక్ ట్రాన్స్‌మిషన్‌తో జతచేయబడి ఉంటుంది. కాబట్టి ఇది అత్యుత్తమ పనితీరును అందిస్తుంది.
Also Read: నితిన్ గడ్కరీ కార్ కలెక్షన్.. ఇలాంటి కార్లు మరెవ్వరి దగ్గరా లేదు!
ఇండియన్ మార్కెట్లో ఫెరారీ కార్లకు మంచి ఆదరణ ఉంది. అయితే వీటి ధర కోట్ల రూపాయలలో ఉండటం వల్ల.. సెలబ్రిటీలు, క్రీడాకారులు లేదా పారిశ్రామికవేత్తల వంటి ధనవంతులు మాత్రమే కొనుగోలు చేస్తుంటారు. అయితే ఈ కార్లు సాధారణ రోజువారీ ప్రయాణానికంటే కూడా రేసింగ్ లేదా లాంగ్ డ్రైవ్ వంటి వాటికోసం చాలా అనుకూలంగా ఉంటాయి. మంచి డ్రైవింగ్ అనుభూతిని కూడా అందిస్తాయి. ఈ కారణంగానే చాలామంది వీటిని ఇష్టపడి కొనుగోలు చేస్తుంటారు. అయితే ఇక్కడ తెలుసుకోవలసిన విషయం ఏమిటంటే.. కేంద్రమంత్రి నితిన్ గడ్కరీకి ఫెరారీ కారు లేదు.
