Parking Certificate Mandatory For New Car Registration: ప్రతి ఒక్కరికీ సొంత కారు ఉండాలనే ఆలోచనతో.. దేశంలో వాహనాల సంఖ్య విపరీతంగా పెరిగిపోతోంది. పెరిగిపోతున్న వాహనాల సంఖ్య భారీ రద్దీకి లేదా ట్రాఫిక్ జామ్‌కు కారణమవుతున్నాయి. అంతే కాకుండా పార్కింగ్ చేసుకోవడానికి కూడా తీవ్ర ఇబ్బందులు ఎదురువవుతున్నాయి. దీనిని దృష్టిలో ఉంచుకుని మహారాష్ట్ర ప్రభుత్వం కొత్త నిబంధనలను ప్రవేశపెట్టనుంది.
ఇకపై మహారాష్ట్రలో వాహనాలు కొనుగోలు చేసేవారు, తప్పకుండా పార్కింగ్ ప్రదేశాలను చూపించాల్సి ఉంటుందని.. దానికి సంబంధించిన సర్టిఫికెట్ కూడా చూపించాలని అక్కడి ప్రభుత్వం పేర్కొంది. దీనికి సంబంధించిన ప్రతిపాదనను రవాణా కమిషనర్ వివేక్ భీమేశ్వర్.. రాష్ట్ర ముఖ్యమంత్రి ‘దేవేంద్ర ఫడ్నవీస్’కు సమర్పించారు. ఈ కొత్త ప్రతిపాదనను ప్రవేశపెట్టడానికి ముందు, సంబంధించిన అధికారులతో చర్చించి.. నివేదికను మరింత చక్కగా తీర్చిదిద్దాలని సీఎం చెప్పారు.
మూడు నెలల్లో చర్చలు
మహారాష్ట్రలో కొత్త నియమాలను ప్రవేశపెట్టడానికి.. రవాణా శాఖ వచ్చే మూడు నెలల్లో వాటాదారులతో చర్చలు జరపడానికి సిద్ధమైంది. ఈ ప్రతిపాదన అమలైతే.. రాష్ట్రంలో కొత్త వాహనాలను కొనుగోలు చేసేవారి సంఖ్య తగ్గే అవకాశం ఉంటుందని సమాచారం. అయితే రాష్ట్రంలో కొంతవరకు ట్రాఫిక్ లేదా వాహనాల రద్దీని తగ్గించవచ్చు.
రాష్ట్రంలో కొత్త కొత్త నియమాలను ప్రవేశపెట్టడానికి ప్రధాన కారణం.. రద్దీని తగ్గించడానికి మాత్రమే కాదు, వాయు కాలుష్యాన్ని తగ్గించడానికి కూడా అని రవాణా శాఖ స్పష్టం చేసింది. కాబట్టి ముంబై, పూణే నగరాల్లో కొత్త చట్టం ఆమోదించబడితే.. వాహనాలను రిజిస్ట్రేషన్ చేసుకునే ముందు పార్కింగ్ సర్టిఫికెట్ కూడా సమర్పించాల్సి ఉంటుంది. ఈ కొత్త ప్రతిపాదనను రూపొందించే సమయంలో.. విదేశాలలోని చట్టాలను కూడా పరిశీలించినట్లు అధికారులు పేర్కొన్నారు. ఈ నియమం ఇప్పటికే జపాన్, లండన్ నగరాల్లో ఉందని తెలుస్తోంది.
పార్కింగ్ ప్లేస్ ఉండాలి
కారు కొనుగోలుచేసే వారికి.. తప్పకుండా పార్కింగ్ ప్లేస్ ఉండాలి అని చెప్పడం మంచి విషయమే. అయితే కొన్ని నగరాల్లో పార్కింగ్ చేసుకోవడానికి కూడా అద్దె చెల్లించాల్సిన పరిస్థితి నెలకొంది. కార్ల వినియోగదారులకు ఇది ఆర్థికంగా కూడా కొంత నష్టమే. కారు మెయింటెనెన్స్ లేదా నిర్వహణకే బోలెడంత డబ్బు ఖర్చు అవుతుంటే.. పార్కింగ్ కోసం కూడా డబ్బు చెల్లించాల్సిన పరిస్థితులను ఎదుర్కోవడం మరో సమస్య అనే చెప్పాలి.
పట్టణాలు రోజు రోజుకీ అభివృద్ధి చెందుతున్న సమయంలో.. ఇంట్లో ఉన్న ప్రతి ఒక్కరికీ కారు ఉండాలనుకోవడం కొంత కష్టమే. కారు కొనుగోలు చేయడం పెద్ద సమస్య కాకపోయినప్పటికీ.. దాని పార్కింగ్, రోడ్డుపై ట్రాఫిక్ రెండూ ఎదుర్కోవాల్సి ఉంటుంది. కాబట్టి వీటి నుంచి బయటపడటానికి ఉత్తమ మార్గం వీలైనంత వరకు ప్రజా రవాణాలో ప్రయాణించడం. ఆలా కాకున్నా.. ఓ ఇంట్లో నాలుగుతున్నారనుకుంటే, వారికి ఒక కారు ఉంటే సరిపోతుంది. నాలుగు కార్లు అవసరం లేదు. ఇవన్నీ దృష్టిలో ఉంచుకుని ప్రజలు కూడా కొంత అవగాహనా పెంచుకోవాలి.
దేశంలో వాహనాల సంఖ్య
సుమారు 145 కోట్ల కంటే ఎక్కువ మంది జనాభా ఉన్న భారతదేశంలో లెక్కకు మించిన కార్లు, బైకులు మాత్రమే కాకుండా.. ప్రజా రవాణా ఉన్నాయి. 3.287 మిలియన్ కిలోమీటర్ల విస్తీర్ణం కలిగిన దేశంలో నివాస, వ్యవసాయ, పారిశ్రామిక రంగాల ఉపయోగాలు పోనూ మిగిలిన ప్రదేశాల్లోనే వాహనాల వినియోగం జరుగుతోంది. ఓ వైపు జనాభా సంఖ్య పెరిగిపోయి, మరోవైపు వాహనాల సంఖ్య పెరిగిపోతూ ఉంటే.. దేశం విస్తీర్ణంలో మార్పు ఉండదు కదా. కాబట్టి ఉన్న విస్తీర్ణం.. జనాభా పెరుగుదల వంటి వాటిని కూడా ప్రతి ఒక్కరూ బేరీజు వేసుకోవాలి.
Also Read: 2024లో రాయల్ ఎన్‌ఫీల్డ్ బైకులు ఎంతమంది కొన్నారో తెలిస్తే.. షాకవవుతారు!
భారీస్థాయిలో పెరుగుతున్న వాహనాలు వాతావరణ సమతుల్యతను దెబ్బ తీస్తాయి. ప్రజలను అనారోగ్యాల పాలు చేస్తున్నాయి. నేడు గాలిలో ఆక్సిజన్ పరిమాణం తెగిపోయి, కార్భన్ వాయువుల స్థాయి పెరిగిపోతోంది. ఇప్పటికే కాలుష్యం కారణంగా కొన్ని చిన్న పక్షి, జంతు జాతులు పూర్తిగా మరుగున పడ్డాయి. వాహనాల సంఖ్య ఇలాగే పెరుగుతూ పోతే.. మనుషు ఆక్సిజన్ సిలిండర్లను భుజాన వేసుకుని తిరగాల్సిన పరిస్తితులు వస్తాయని నిపుణులు చెబుతున్నారు.
