Renault India 2024 June Discounts: ఎప్పుడెప్పుడు డిస్కౌంట్స్ ప్రకటిస్తారా? ఎప్పుడెప్పుడు కొత్త కారు కొందామా అని ఎదురు చూసేవారికి రెనాల్ట్ ఇండియా (Renault India) ఎట్టకేలకు శుభవార్త చెప్పింది. జూన్ 2024లో కనీవినీ ఎరుగని రీతిలో డిస్కౌంట్స్ ప్రకటించింది. కంపెనీ అందించే ఈ డిస్కౌంట్స్ లభించాలంటే ఈ నెలలో కారు కొనాల్సిందే. అలాంటి వారికే రెనో అందించే డిస్కౌంట్స్ లభిస్తాయి. ఈ నెల 30 (జూన్ 30) తరువాత బహుశా ఈ డిస్కౌంట్స్ లభించకపోవచ్చు. కాబట్టి రెనాల్ట్ కారు కొనాలనుకునే వారి వెంటనే కారు కొనే ప్రయత్నాలు చేయవచ్చు. కొంత తక్కువ ధరకే రెనాల్ట్ కారును సొంతం చేసుకోవచ్చు.
రెనాల్ట్ కంపెనీ ఈ నెలలో ఎంపిక చేసిన కొన్ని కార్ల మీద మాత్రమే తగ్గింపులు (డిస్కౌంట్) అందిస్తోంది. ఇందులో కైగర్ కాంపాక్ట్ ఎస్‌మూవీ, క్విడ్ హ్యాచ్‌బ్యాక్ మరియు ట్రైబర్ సెవెన్ సీటర్ వంటివి ఉన్నాయి. ఈ నెలలో ఈ మూడు కార్ల మీద ఎక్స్చేంజ్ బెనిఫీట్స్, లాయల్టీ బోనస్ మరియు అదనపు రిఫరల్, కార్పొరేట్ మరియు లాయల్టీ ప్రయోజనాలను కూడా పొందవచ్చు.
రెనాల్ట్ కైగర్ (Renault Kiger)
జూన్ 2024లో రెనాల్ట్ కంపెనీ యొక్క కైగర్ కాంపాక్ట్ ఎస్‌మూవీ కొనుగోలు మీద రూ. 40000 వరకు ప్రయోజనాలను పొందవచ్చు. ఇందులో రూ. 15000 క్యాష్ డిస్కౌంట్, రూ. 15000 వరకు ఎక్స్ఛేంజ్ ప్రయోజనాలు మరియు రూ. 10000 లాయల్టీ బోనస్ వంటివి ఉన్నాయి. ఈ ప్రయోజనాల్నీ కూడా ఈ నెల చివరి వరకు మాత్రమే లభిస్తాయి. కాబట్టి ఈ విషయాన్ని కస్టమర్లు తప్పకుండా గుర్తుంచుకోవాలి.
రెనాల్ట్ కైగర్ రెండు ఇంజిన్ ఆప్షన్స్ పొందుతుంది. అవి 1.0 లీటర్ న్యాచురల్లీ ఆస్పిరేటెడ్ పెట్రోల్ మరియు 1.0 లీటర్ టర్బో పెట్రోల్ యూనిట్. ఈ రెండు వరుసగా 72 హార్స్ పవర్ మరియు 100 హార్స్ పవర్ ప్రొడ్యూస్ చేస్తాయి. పెట్రోల్ మరియు టర్బో పెట్రోల్ ఇంజిన్లు రెండూ కూడా మాన్యువల్ మరియు ఆటోమేటిక్ గేర్‌బాక్స్‌లతో జత చేయబడి ఉత్తమ పనితీరును అందిస్తాయి.
రెనాల్ట్ క్విడ్ (Renault Kwid)
భారతదేశంలో అతి తక్కువ ధరలో లభించే కార్ల జాబితాలో ఒకటైన రెనాల్ట్ క్విడ్ మీద కూడా కంపెనీ డిస్కౌంట్స్ అందిస్తోంది. ఈ కారు కొనుగోలుపైన కస్టమర్లు రూ. 40000 వరకు ప్రయోజనాలను పొందవచ్చు. రూ. 4.70 లక్షల నుంచి రూ. 6.45 లక్షల మధ్య ధరతో లభించే ఈ కారు 1.0 లీటర్ పెట్రోల్ ఇంజిన్ కలిగి 68 హార్స్ పవర్ మరియు 91 న్యూటన్ మీటర్ టార్క్ అందిస్తుంది. ఇది 5 స్పీడ్ మాన్యువల్ లేదా ఆప్షనల్ ఆటోమాటిక్ గేర్బాక్స్ ఆప్షన్స్ పొందుతుంది.
రెనాల్ట్ ట్రైబర్ (Renault Triber)
ఈ నెలలో రెనాల్ట్ కంపెనీ యొక్క ట్రైబర్ కొనాలనుకునేవారు రూ. 45000 వరకు తగ్గింపులు పొందవచ్చు. రూ.6 లక్షల నుంచి రూ.8.97 లక్షల మధ్య లభించే ఈ కారు డిజైన్ మరియు ఫీచర్స్ పరంగా కూడా వాహన వినియోగదారులకు చాలా అనుకూలంగా ఉంటాయి. ఇది 72 హార్స్ పవర్ ప్రొడ్యూస్ చేసే 1.0-లీటర్ న్యాచురల్లీ ఆస్పిరేటెడ్ ఇంజిన్ పొందుతుంది. ఇది 5-స్పీడ్ మాన్యువల్ లేదా ఆటోమాటిక్ గేర్బాక్స్ ఆప్షన్స్ పొందుతుంది.
గమనిక: రెనాల్ట్ కంపెనీ అందించే ఈ డిస్కౌంట్స్ కేవలం ఈ నెల చివరి వరకు మాత్రమే అందుబాటులో ఉంటాయి. ఈ డిస్కౌంట్స్ ఒక నగరం నుంచి మరో నగరానికి మారే అవకాశం ఉంటుంది. అంతే కాకుండా.. ఉన్న స్టాక్ మీద కూడా డిస్కౌంట్స్ ఆధారపడి ఉంటాయి. కాబట్టి కంపెనీ అందించే డిస్కౌంట్స్ గురించి ఖచ్చితమైన వివరాలు తెలుసుకోవడానికి సమీపంలో ఉన్న డీలర్ను సంప్రదించడం మంచిది.
Don’t Miss: కేవలం 100మందికి మాత్రమే ‘ధోని స్పెషల్ ఎడిషన్’ – ధర కూడా తక్కువే!
రెనాల్ట్ కంపెనీ మాత్రమే కాకుండా.. దేశీయ విఫణిలో చాలా కంపెనీలు తమ ఉత్పత్తుల మీద అద్భుతమైన డిస్కౌంట్స్ అందిస్తున్నాయి. ఈ జాబితాలో స్కోడా, టాటా మోటార్స్, ఎంజీ మోటార్స్, జీప్ మరియు ఫోక్స్‌వ్యాగన్ మొదలైనవి ఉన్నాయి. ఈ కంపెనీలు అందించే డిస్కౌంట్స్ మరియు ఆఫర్స్ అన్నీ కూడా ఈ నెల చివరి వరకు మాత్రమే అందుబాటులో ఉంటాయి. బహుశా ఈ ఆఫర్స్ జులైలో ఉండవచ్చు లేదా ఉండకపోవచ్చు.