Two Wheeler Companies To Be Seen at Auto Expo 2025: ఎప్పుడెప్పుడా అని ఎదురు చూస్తున్న ఆటో ఎక్స్‌పో (Auto Expo) లేదా ‘భారత్ మొబిలిటీ గ్లోబల్ ఎక్స్‌పో 2025’ (Bharat Mobility Global Expo 2025) జనవరి 17 నుంచి 22 వరకు జరగనుంది. ఢిల్లీ వేదికగా ప్రారంభం కానున్న ఈ కార్యక్రమానికి దేశీయ వాహన తయారీ సంస్థలు మాత్రమే కాకుండా.. విదేశీ వాహన తయారీ సంస్థలు కూడా హాజరు కానున్నాయి. తమ కొత్త వాహనాలను ఆవిక్షరించనున్నాయి లేదా ప్రదర్శించనున్నాయి. అయితే ఈ కథనంలో ఆటో ఎక్స్‌పో 2025లో కనిపించనున్న టూ వీలర్ బ్రాండ్స్ ఏవి? అవి ప్రదర్శించనున్న వెహికల్స్ ఏవి అనే వివరాలను ఇక్కడ తెలుసుకుందాం.
2025 ఆటో ఎక్స్‌పోలో కనిపించే టూ వీలర్ బ్రాండ్స్
ఏథర్ ఎనర్జీ (Ather Energy): బెంగళూరు బేస్డ్ కంపెనీ అయిన ‘ఏథర్ ఎనర్జీ’ ఇప్పటికే 450, 450 ఎక్స్ వంటి ఎలక్ట్రిక్ స్కూటర్లను లాంచ్ చేసి మంచి అమ్మకాలతో ముందుకు సాగుతోంది. అయితే త్వరలో జరగనున్న ఆటో ఎక్స్‌పోలో మరిన్ని కొత్త లేదా అప్డేటెడ్ మోడల్స్ ఆవిష్కరించే అవకాశం ఉంది. ఇందులో ఏథర్ 450ఎక్స్ అప్డేటెడ్ మోడల్, ఇతర కాన్సెప్ట్ మోడల్స్ ఉండనున్నాయి.
బజాజ్ ఆటో (Bajaj Auto): ప్రముఖ వాహన తయారీ సంస్థ బజాజ్ ఆటో కూడా 2025 ఆటో ఎక్స్‌పోలో తన కొత్త మోడల్స్ పరిచయం చేయనుంది. ఇందులో పల్సర్ ఆర్ఎస్200 లేటెస్ట్ మోడల్ ఉన్నట్లు సమాచారం. అంతే కాకుండా కేటీఎమ్ 390 అడ్వెంచర్ మరియు కొన్ని కొత్త ట్రయంఫ్ మోడల్స్ కూడా ప్రదర్శించనుంది.
బీఎండబ్ల్యూ ఇండియా (BMW India): లగ్జరీ వాహన తయారీ సంస్థ బీఎండబ్ల్యూ ఇండియా.. దేశీయ విఫణిలో బీఎండబ్ల్యూ మోటోరాడ్ ఆర్ 1300 జీఎస్ అడ్వెంచర్, ఎఫ్ 450 జీఎస్ వంటి వాటితో పాటు ఎస్ 1000 ఆర్ఆర్, ఎమ్ 1000 ఆర్ఆర్ వంటి అప్డేటెడ్ మోడళ్లను ఆటో ఎక్స్‌పో వేదికపై ప్రదర్శించనుంది. వీటితో పాటు ఈ కంపెనీ సీఈ 02, సీఈ 04 వంటి ఖరీదైన ఎలక్ట్రిక్ స్కూటర్లను కూడా ప్రదర్శించే అవకాశం ఉంది.
హీరో మోటోకార్ప్ (Hero MotoCorp): అతిపెద్ద ద్విచక్ర వాహన తయారీ సంస్థ హీరో మోటోకార్ప్ భారతదేశంలో అధిక ప్రజాదరణ పొందిన విషయం తెలిసిందే. ఈ కంపెనీ ఎప్పటికప్పుడు కొత్త బైకులు, స్కూటర్లను లాంచ్ చేస్తోంది. కాగా త్వరలో జరగనున్న ఇండియన్ ఆటో ఎక్స్‌పో వేదికపై ఎక్స్‌ట్రీమ్ 250ఆర్, ఎక్స్ఎమ్ఆర్ 250 వంటి వాటితో పాటు ఎక్స్‌పల్స్ 210ను కూడా ఆవిష్కరించే అవకాశం ఉంది. ఇవి మాత్రమే కాకుండా కంపెనీ విడా ఎలక్ట్రిక్ స్కూటర్, ఎక్స్‌పల్స్ 421 యొక్క కాన్సెప్ట్ మోడల్‌ను కూడా ప్రదర్శించే అవకాశం ఉంది. కంపెనీ హార్లే డేవిడ్‌సన్ సంస్థతో భాగస్వామ్యం ఏర్పరచుకుంది.. కాబట్టి హార్లే డేవిడ్‌సన్ బైకులను కూడా కంపెనీ ఆటో ఎక్స్‌పోలో ప్రదర్శించనుంది.
హోండా మోటార్‌సైకిల్ & స్కూటర్ ఇండియా (Honda Motorcycle & Scooter India): హోండా మోటార్‌సైకిల్ కంపెనీ 2025 ఆటో ఎక్స్‌పోలో తన మొట్ట మొదటి ఎలక్ట్రిక్ స్కూటర్ హోండా యాక్టివా ఈ (Honda Activa e) మరియు హోండా క్యూసీ 1 (Honda QC 1) లను ప్రదర్శించనుంది. కంపెనీ ఇప్పటికీ ఈ స్కూటర్లను మార్కెట్లో లాంచ్ చేసింది. ఇవి కాకుండా సంస్థ మరి కొన్ని కొత్త మోడల్స్ కూడా ప్రదర్శించే అవకాశం ఉందని సమాచారం.
యమహా (Yamaha): స్టైలిష్ బైకులకు, స్కూటర్లకు చెందిన యమహా కూడా ఆటో ఎక్స్‌పో 2025లో కొత్త వెహికల్స్ లాంచ్ చేసే అవకాశం ఉంది. అయితే ఈ సంస్థ ఏ బైకులను లాంచ్ చేయనుందనే విషయం అధికారికంగా వెల్లడి కావాల్సి ఉంది.
సుజుకి మోటార్‌సైకిల్ ఇండియా (Suzuki Motorcycle India): సుజుకి మోటార్‌సైకిల్ కంపెనీ 2025 భారత్ మొబిలిటీ ఎక్స్‌పోలో జీఎస్ఎక్స్-8ఆర్ మరియు వీ-స్ట్రోమ్ 800 డీఈ వంటి వాటిని ప్రదర్శించే అవకాశం ఉంది. అంతే కాకుండా జీఎస్ఎక్స్-8ఎస్ బైకును కూడా ఆవిష్కరించే అవకాశం ఉంది.
టీవీఎస్ మోటార్ (TVS Motor): ఈ ఏడాది భారత్ మొబిలిటీ గ్లోబల్ ఎక్స్‌పోలో టీవీఎస్ మోటార్ కంపెనీ తన ఆర్టీఎక్స్ 310 అడ్వెంచర్ (RTX 310 Adventure) బైకును ప్రదర్శించే అవకాశం ఉంది. దీనితో పాటు ఆర్‌డీఎక్స్‌డీ-4 ఇంజిన్‌తో పాటు ఇతర వస్తువులను కూడా కంపెనీ పరిచయం చేసే అవకాశం ఉందని భావిస్తున్నాము.
Also Read: 2025 Auto Expo: డేట్స్, బ్రాండ్స్ & పూర్తి వివరాలు ఇవే
గ్రీవ్స్ కాటన్ (Greaves Cotton): ఆంపియర్ ఎలక్ట్రిక్ యొక్క మాతృ సంస్థ గ్రీవ్స్ కాటన్.. నెక్సస్ ఎలక్ట్రిక్ స్కూటర్‌తో పాటు, మరికొన్ని కొత్త మోడల్స్ లాంచ్ చేసే అవకాశం ఉంది. అయితే కంపెనీ ఏ మోడల్స్ లాంచ్ చేస్తుందనే వివరాలు త్వరలోనే వెల్లడవుతాయని భావిస్తున్నాము.
ఓలా ఎలక్ట్రిక్ (Ola Electric): దేశీయ టూ వీలర్ తయారీ సంస్థ ఓలా ఎలక్ట్రిక్.. ఇప్పటికే ఎలక్ట్రిక్ స్కూటర్లను మార్కెట్లో లాంచ్ చేసి, గొప్ప అమ్మకాలతో ముందుకు దూసుకెళ్తోంది. కాగా ఈ కంపెనీ 2025 ఆటో ఎక్స్‌పోలో కూడా కొత్త మోడల్స్ పరిచయం చేసే అవకాశం ఉందని భావిస్తున్నాము. అయితే ఈ సంస్థ ఏ వాహనాలను ప్రదర్శిస్తుందనే వివరాలు తెలియాల్సి ఉంది.
రివోల్ట్ మోటార్స్ (Revolt Motors): రేవోల్ట్స్ మోటార్ కంపెనీ 2025 భారత్ మొబిలిటీ ఎక్స్‌పోలో కనిపించనుంది. అయితే ఈ సంస్థ ఏ బైకులను ప్రదర్శిస్తుంది అనే విషయాలు అధికారికంగా తెలియాల్సి ఉంది. మొత్తం మీద దిగ్గజ కంపెనీలు తమ కొత్త మోడల్స్ లాంచ్ చేయడానికి ఇప్పటికీ పూర్తిగా సిద్దమైపోయాయని స్పష్టమవుతోంది.
