ధృవ్ విక్రమ్, అనుపమ పరమేశ్వరన్ జంటగా నటించిన బైసన్ మూవీ ట్రైలర్ తమిళ్, తెలుగు రెండు బాషలలో ఒకేసారి విడుదల అయింది. అక్టోబర్ 17న ప్రపంచవ్యాప్తంగా ఈ సినిమా అట్టహాసంగా రిలీజ్ కానుంది. తెలుగులో మాత్రం అక్టోబర్ 24న థియేటర్లలో విడుదల అవుతుంది. మారీ సెల్వరాజ్ దర్శకత్వంలో తెరకెక్కిన ఈ చిత్రాన్ని.. నీలం స్టూడియోస్ మరియు అప్లాజ్ ఎంటర్టైన్మెంట్ బ్యానర్పైన పా. రంజిత్, అదితి ఆనంద్, సమీర్ నాయర్, దీపక్ సంయుక్తంగా నిర్మించారు. నివాస్ కే ప్రసన్న సంగీతం అందించారు. పశుపతి, లాల్, అమీర్, రజిషా విజయన్ ప్రధాన పాత్రల్లో నటించారు.
రొటీన్కు భిన్నంగా ధృవ్ విక్రమ్
బైసన్ ట్రైలర్ ఫస్ట్ ఇంట్రడక్షన్ సీన్స్ బ్లాక్ అండ్ వైట్లో రొటీన్కు భిన్నంగా కనిపిస్తోంది. మారీ సెల్వరాజ్ తన ప్రతి సినిమాలో ఏదో ఒక జంతువుని సింబాలిక్ చూపిస్తుంటాడు. అదే విధంగా ఇందులో కూడా దున్నపోతుని హీరో క్యారెక్టర్కు ప్రతిబింబంగా చూపించినట్టు అనిపిస్తోంది. అంటే ఆ జంతువుకున్న బలం, పౌరుషం మెండుగా ఉన్నాయని చెప్పకనే చెప్పాడు డైరెక్టర్. బాగా కొమ్ములు తిరిగిన పొట్టేలు అరుపు, కసితో పడగేత్తి బుసకోట్టే నాగుపాము.. ఆ తరువాత హీరో ధృవ్ విక్రమ్ ముఖాన్ని చూపించడం ఏదో సాధించి తీరాలనే ఒక ఆవేశం ఆ కల్లల్లో స్పష్టంగా కనిపించడం మనం గమనించవచ్చు.
ధృవ్ విక్రమ్ ఈ సినిమా కోసం కఠోర శ్రమ చేసాడనే తెలుస్తోంది. పాత్ర కోసం తనను తాను పూర్తిగా మార్చుకున్నాడు. ధ్రువ్కి ఇదే డెబ్యూ మూవీ అన్నట్టుగా వర్క్ పట్ల ఎంతో కసితో పనిచేసాడు. కబడ్డీ క్రీడాకారుడిగా క్యారెక్టర్లో బాగా ఒదిగిపోయాడు. అంతే కాకుండా ఒక సాధారణ పల్లెటూరు వ్యవసాయ కుటుంబ నేపథ్యం కలిగిన యువకుడి పాత్రలో జీవించాడు అని ట్రైలర్ చూస్తేనే అర్థమవుతోంది.
ముందు సినిమాల కంటే.. బైసన్ ప్రత్యేకం!
ముందు రెండు చిత్రాల కంటే బైసన్ సినిమా.. ప్రత్యేకంగా నిలుస్తుంది అనడంలో ఎటువంటి సందేహం లేదని పబ్లిక్ అభిప్రాయపడుతున్నారు. హీరో కెరియర్లో బైసన్ ఒక మైలురాయి అవుతుంది అని చెప్పొచ్చు. తన ఉన్న సామాజిక, రాజకీయ పరిస్థితులు ఒకపక్క.. తన కుటుంబం ఇంకోపక్క, తను ప్రేమించిన అమ్మాయి, వీటి మధ్యలో తను నమ్ముకున్న కబడ్డీ ఆట కోసం హీరో పడే ఆరాటం కనిపిస్తుంది. జీవితంలో ఎలాగైనా గెలవాలనే తపన ట్రైలర్లో కనిపిస్తోంది.
తండ్రిగా పశుపతి.. మొదట కొడుకు ఆటని ఒప్పుకోకుండా.. ఒట్టు వేయించుకోవడం, తరువాత ట్రైలర్ చివరలో తానే తన కొడుక్కి అండగా నిలబడి వెన్నుతట్టినట్టుగా అనిపిస్తోంది. బ్యాగ్రౌండ్ మ్యూజిక్ నివాస్ కే ప్రసన్న అత్యద్భుతంగా అందించారు. ట్రైలర్కి మ్యూజిక్ ప్లస్ పాయింట్ అని స్పష్టంగా తెలుస్తోంది.
ఇన్స్పిరేషన్ ఇచ్చే డైలాగ్స్
“రేయ్ కిట్టయ్య ఇది సరిపోదు రా, ఇది సరిపోదు. నీ కాళ్ళు విరగ్గొట్టిన, చేతులు విర్గగొట్టినా పరిగెడుతూనే ఉండు, పైకి ఎదుగుతూనే ఉండాలి, టాప్కి చేరుకోవాలి, శిఖరాన్ని అందుకోవాలి అప్పుడే మనకు ఒక గౌరవం ఉంటుంది. రేయ్ నువ్వు బయలుదేరరా…” ట్రైలర్ చివరిలో హీరో (ధృవ్ విక్రమ్) తండ్రి (పశుపతి ) చెప్పే మాటలు అందరికి ఇన్స్పిరేషన్ ఇచ్చేవిగా ఉన్నాయి. తను ఏ పరిస్థితుల మధ్య నుంచి వచ్చాడు, ఆ వాతావరణంలో మనగలగాలి అంటే ఎలా బతకాలి అనే కసిని నూరిపోయడం ఈ మాటల ద్వారా మనకు అర్థమవుతుంది.
ఏదైనా సాధిస్తేనే తప్పా ఆ మనుషుల మనసుల్లో మనకంటూ ఒక గుర్తింపు ఉండదు అని డైరెక్టర్ చాలా బలంగా ఆ పాత్రతో సొసైటీకి సందేశం చెప్పినట్టే అనిపిస్తుంది. డైలాగ్స్ ఆ వీడియోకు చాలా పవర్ జనరేట్ చేసాయి అని చెప్పొచ్చు. ట్రైలర్ సూపర్గా ఉందని పబ్లిక్లో రెస్పాన్స్ వచ్చింది. వరల్డ్ వైడ్ బైసన్ సినిమా కోసం అభిమానులు అందరూ ఆసక్తిగా ఎదురు చూస్తున్నట్టు చెప్పుకొచ్చారు. మారీ సెల్వరాజ్ ఖాతాలో మరో హిట్ మూవీగా నిలిచేలా ఉందని అర్థమవుతోంది.