మెగాస్టార్ చిరంజీవి, నయనతార జంటగా నటించిన చిత్రం మన శంకర వర ప్రసాద్ గారు.. ఈ రోజు (జనవరి 12) విడుదలైంది. సాహు గారపాటి, కొణిదెల సుష్మిత సంయుక్తంగా షైన్ స్క్రీన్స్ అండ్ గోల్డ్ బాక్స్ ఎంటర్టైన్మెంట్ పతాకంపై ఈ మూవీని నిర్మించారు. ఫేమస్ తెలుగు ఫిలిం డైరెక్టర్ అనిల్ రావిపూడి ఈ సినిమాకు దర్శకత్వం వహించారు. భీమ్స్ సిసిరోలియో సంగీతం అందించారు. చిరంజీవితో పాటు విక్టరీ వెంకటేష్ అతిధి పాత్రలో నటించారు.
చిరంజీవి ఖాతాలో మరో విజయం
ఫన్ అండ్ యాక్షన్ ప్రధానంగా తెరకెక్కిన మన శంకర వర ప్రసాద్ గారు సినిమా ఆద్యంతం అదే వినోదంతో కొనసాగినట్టుగా సోషల్ మీడియాలో జోరుగా ప్రచారం జరుగుతోంది. మళ్లీ తిరిగి పాత చిరంజీవిని చూపించారని, వయసుతో సంబంధం లేకుండా పోటీపడి నటించారని ఆయన అభిమానులే కాకుండా.. మిగిలినటువంటి సినిమా ప్రేక్షకులు సైతం కొనియాడుతున్నారు. మొదటి రోజే ఓవర్సీస్లో దాదాపు 1. 20 మిలియన్ డాలర్స్ దాక రాబట్టి గత గణాంకాల చరిత్రను తిరగరాసినట్టు తెలుస్తోంది.
రిలీజ్కు ముందే దగ్గరదగ్గర రూ.100 కోట్లు పైనే వసూళ్లు జరిగినట్టు వార్తలు వచ్చాయి. రివ్యూ వెబ్సైట్స్ అయితే 3.5 వరకు రేటింగ్ ఇచ్చి పాజిటివ్ వైబ్ క్రియేట్ చేశాయి. సంక్రాతికి మంచి కుటుంబ కథా చిత్రాన్ని అందించారని సినిమా ప్రేమికులు భావిస్తున్నారు. చిరంజీవి తన శైలిలో హాస్యాన్ని, డ్యాన్స్ మరియు నటనను అద్భుతంగా పండించినట్టు చెబుతున్నారు.
డైరెక్టర్ ఫార్ములా
అనిల్ రావిపూడి తన మొదటి చిత్రం పటాస్ నుంచి.. నేటి మన శంకరవరప్రసాద్ గారు సినిమా వరకు కూడా అన్ని మాస్, కామెడీ, యాక్షన్ ప్రాముఖ్యతను ఇస్తూ వస్తున్నాడు. ఆయన ఎంచుకున్న ఫార్ములా ఏదైతే ఉందో.. అది అతనిని ప్రతిసారి విజయాల బాట పట్టిస్తూనే ఉంది. అయితే చిరంజీవి రాజకీయాలు వదిలి సినిమాల్లోకి వచ్చాక చేసిన ఆరు చిత్రాల్లో కేవలం ఖైదీ నెం 150, వాల్తేరు వీరయ్య రెండు మాత్రమే బ్లాక్బస్టర్ హిట్స్ అందుకున్నాయి. సైరా నరసింహారెడ్డి, గాడ్ పాదర్ (మలయాళం రీమేక్) చిత్రాలు యావరేజ్గా నడిచాయి. తక్కిన రెండు చిత్రాలు ఆచార్య, భోళా శంకర్ అత్యంత దారుణంగా పరాజయం పాలైనట్టు సమాచారం. కాబట్టి ఇప్పుడు చిరంజీవికి ఒక మంచి హిట్ అవసరం అయింది.
చాన్నాళ్ల తరువాత సక్సెస్
ఈ సమయంలో ఓటమి ఎరుగని దర్శకుడు అనిల్ రావిపూడి చిరు కోసం చంటబ్బాయి, శంకర్ దాదా ఎంబీబీఎస్, ఘరానా మొగుడు లాంటి కామెడీ, యాక్షన్ ఎంటర్టైన్మెంట్ కథను సిద్ధం చేసుకొని సినిమా చేశాడు. అంతకు ముందు దర్శకులు ఎవరు చేయలేనిది అనిల్ చేసింది ఏమిటంటే.. అందరికి నచ్చిన పాతతరం చిరుని మళ్లీ తిరిగి తీసుకురావడమే. అడపాదడప చిన్న చిన్న ప్రయత్నాలు జరిగిన మన శంకరవరప్రసాద్ గారు లాగా అయితే సక్సెస్ కాలేకపోయాయి.
నయనతారతో అంతకు మునుపు ఎప్పుడు చిరు నటించిన దాఖలాలు లేవు. సినిమాల్లోకి రీ-ఎంట్రీ ఇచ్చాక వరుసగా మూడు చిత్రాల్లో కలిసి నటించారు. అనిల్ ఈ సినిమాలో కూడా అదే కాంబినేషన్ కొనసాగించాడు. ఆమె కూడా ఆ పాత్రకు అంతే న్యాయం చేసింది. ఇక మంచి ఫామ్లో ఉన్న మ్యూజిక్ డైరెక్టర్ భీమ్స్ సంగీత దర్శకుడిగా ఎంచుకోవడం కలిసొచ్చిన అంశం. ఆయన చేసిన పాటలన్నీ కూడా చిన్నా..పెద్ద బేధం లేకుండా అందరికీ తెగ నచ్చేసాయి. మీసాల పిల్ల, హుక్ స్టెప్, శశిరేక, చిరు వెంకీ సాంగ్ అన్నీ కూడా పెద్ద హిట్ అయ్యాయి.
ఫన్ అండ్ పాజిటివ్..
చిరంజీవి, నయనతార ఇద్దరి డాన్స్ ఊర మాస్ అనే చెప్పాలి. దీనికి తోడు ఒకప్పుడు చిరంజీవికి పాటలు పాడిన ఉదిత్ నారాయణ్, బాబా సెహెగెల్ లాంటి వింటేజ్ సింగర్లను తీసుకొచ్చి పాటలు పాడించాడు అనిల్ రావిపూడి. విక్టరీ వెంకటేశ్తో తీసిన ఎఫ్-2, ఎఫ్-3, సంక్రాతికి వస్తున్నాం సినిమాలతో అనిల్కు ఉన్న సత్సంబంధాల కారణంగా చిరు, వెంకీ కాంబినేషన్ సెట్ చేశాడు. వారి ఇద్దరి సన్నివేశాలు అభిమానులకు సరైన ఫన్ పాజిటివ్ ఎనర్జీని ఇస్తున్నాయి. ఇక సినిమా ప్రమోషన్స్ కూడా డైరెక్టర్ స్టైల్లో ప్రత్యేకంగా చేయడంతో ప్రేక్షకులకు మన శంకరవరప్రసాద్ గారు చిత్రం బాగా దగ్గరైయింది. ప్రస్తుతం ప్రేక్షకుల దగ్గర నుంచి.. మంచి హిట్ పాజిటివ్ రెస్పాన్స్తో రెండు తెలుగు రాష్ట్రాల్లో సంక్రాతికి అసలైన వినోదాత్మక సినిమాగా థియేటర్లలో నడుస్తోంది.
డిజిటల్ కంటెంట్ రైటర్గా పనిచేస్తున్నారు. ప్రముఖ విశ్వ విద్యాలయం శ్రీ వెంకటేశ్వర యూనివర్సిటీలో MA తెలుగు చేశారు. తాజా సినిమా, పాలిటిక్స్, నేషనల్, స్పోర్ట్స్కు సంబంధించిన వార్తలతో పాటు ప్రత్యేకమైన కథనాలు రాస్తారు. డిజిటల్ కంటెంట్ రైటర్గా సంవత్సరం అనుభవం కలిగి ఉన్నారు. ఈయనకు పాటలు, కవితలు, షార్ట్ ఫిలిమ్స్ వంటివాటికి మాటలు రాసే అలవాటు ఉంది. సహజంగా జానపద, సినిమా పాటలు గాయకుడు.