Royal Enfield Record Sales in India 2024: భారతదేశంలో అత్యంత ప్రజాదరణపొందిన బైక్ బ్రాండ్లలో ఒకటి రాయల్ ఎన్‌ఫీల్డ్ (Royal Enfield). ఈ కంపెనీ ఎప్పటికప్పుడు కొత్త బైక్స్ లాంచ్ చేస్తూ.. ఎంతోమంది వాహన ప్రేమికులను ఆకర్శించడంలో విజయం సాధిస్తోంది. 2024లో సంస్థ ఏకంగా 8.5 లక్షల బైకులను విక్రయించి, అమ్మకాల్లో సరికొత్త రికార్డ్ క్రియేట్ చేసింది.
350సీసీ బైకులే ఎక్కువ
రాయల్ ఎన్‌ఫీల్డ్ సేల్స్ 2023 కంటే కూడా 2024లో 4 శాతం వృద్ధి చెందాయి. 2023లో కంపెనీ సేల్స్ 8.2 లక్షల యూనిట్లు. గత ఏడాది కంపెనీ విక్రయించిన మొత్తం బైకులలో 350సీసీ మోడల్స్ ఎక్కువగా ఉన్నట్లు తెలుస్తోంది. 350 సీసీ నుంచి 500 సీసీ మధ్య కేటగిరిలో ఉన్న బైకులలో గెరిల్లా 450 మరియు హిమాలయన్ అడ్వెంచర్ బైకులు మంచి సేల్స్ సాధించాయి. అదే సమయంలో 500 సీసీ మరియు 800 సీసీ మధ్య కేటగైరిలో ఇంటర్‌సెప్టర్ 650, కాంటినెంటల జీటీ 650 ఉన్నాయి. ఇవి మాత్రమే కాకుండా.. సూపర్ మీటియోర్ 650, బేర్ 650 మరియు షాట్‌గన్ 650 వంటివి కూడా ఈ కేటగిరిలో ఉత్తమ అమ్మకాలను పొందాయి.
మూడోసారి 8 లక్షలు దాటిన సేల్స్
2024లో రాయల్ ఎన్‌ఫీల్డ్ కంపెనీ 8 లక్షల యూనిట్ల అమ్మకాలను దాటేసింది. సంస్థ ఈ సంఖ్యను అధిగమించడం ఇదే మొదటిసారి కాదు. 2018 మరియు 2023లో కూడా కంపెనీ 8 లక్షల యూనిట్ల అమ్మకాలను అధిగమించింది. దీన్నిబట్టి చూస్తే మార్కెట్లో ఈ బైకులకు ఎంత డిమాండ్ ఉందో స్పష్టంగా అర్థం చేసుకోవచ్చు.
2025లో ఇదే టార్గెట్
2024లో మాత్రమే కాకుండా ఈ ఏడాది (2025) కూడా కంపెనీ 8 లక్షల యూనిట్ల సేల్స్ మైలురాయిని అధిగమించడమే లక్ష్యంగా పెట్టుకుంది. ఈ లక్ష్యాన్ని సాధించడానికి కంపెనీ సరికొత్త బైకులను కూడా మార్కెట్లో లాంచ్ చేయడానికి సిద్ధమైంది. కాబట్టి.. ఈ ఏడాది తప్పకుండా తన లక్ష్యాన్ని సాధింస్తుందని భావిస్తున్నాము.
భారత్‌లోని రాయల్ ఎన్‌ఫీల్డ్ బైకులు
ప్రస్తుతం రాయల్ ఎన్‌ఫీల్డ్ కంపెనీ బైకులు దేశీయ విఫణిలో 13 ఉన్నాయి. అవి హంటర్ 350, క్లాసిక్ 350, బుల్లెట్ 350, మీటియోర్ 350, హిమాలయన్ 450, గెరిల్లా 450, సూపర్ మీటియోర్ 650, షాట్‌గన్ 650, బేర్650, స్క్రామ్ 411, కాంటినెంటల్ జీటీ 650 మరియు ఇంటర్‌సెప్టర్ 650 వంటివి ఉన్నాయి. ఇవన్నీ కూడా మార్కెట్లో మంచి అమ్మకాలు పొందుతున్నాయి.
ఎలక్ట్రిక్ విభాగంలోకి రాయల్ ఎన్‌ఫీల్డ్
ఇప్పటి వరకు పలు విభాగాల్లో బైకులను లాంచ్ చేసిన రాయల్ ఎన్‌ఫీల్డ్.. ఎలక్ట్రిక్ విభాగంలోకి కూడా అడుగుపెట్టడానికి సన్నద్ధమైంది. ఈ విభాగంలో లాంచ్ చేయనున్న బైకును కూడా ఇప్పటికే పరిచయం చేసింది. ఇది చూడటానికి కొత్తగా.. చూపరులను ఎంతగానో ఆకట్టుకుంది. ఇది 2026లో మార్కెట్లో లాంచ్ అయ్యే అవకాశం ఉంది.
ఫ్లైయింగ్ ఫ్లీ పేరుతో మార్కట్లో లాంచ్ కానున్న.. రాయల్ ఎన్‌ఫీల్డ్ ఎలక్ట్రిక్ బైక్, దశాబ్దాల క్రితం నాటి లేదా రెండో ప్రపంచ యుద్ధ సమయం నాటి బైక్ నుంచి ప్రేరణ పొందింది. ఈ కారణంగానే ఇది చూడటానికి ఆ బైక్ మాదిరిగానే ఉంటుంది. సింపుల్ డిజైన్ కలిగిన ఈ బైక్ ఒక ఫుల్ ఛార్జ్‌తో 200 కిమీ నుంచి 250 కిమీ రేంజ్ అందిస్తుందని సమాచారం. అయితే రేంజ్ వివరాలు లాంచ్ సమయంలో అధికారికంగా వెల్లడవుతాయి. ధరలకు సంబంధించిన విషయాలను కూడా కంపెనీ ఎక్కడా ప్రస్తావించలేదు. కానీ దీని ధర రూ. 2.50 లక్షల కంటే ఎక్కువ ఉండొచ్చని అంచనా.
Also Read: భారత్‌లో అడుగెట్టిన కొత్త జపనీస్ బైక్: దీని ధర ఎంతో తెలిస్తే షాకవుతారు!
మార్కెట్లో ఇప్పటి వరకు గొప్ప అమ్మకాలను చవి చూసిన రాయల్ ఎన్‌ఫీల్డ్ ఇప్పటి వరకు ఎలక్ట్రిక్ బైకులను లాంచ్ చేయలేదు. మొదటిసారి ఫ్లైయింగ్ ఫ్లీ పేరుతో లాంచ్ చేయనుంది. అయితే ఇది ఎలాంటి అమ్మకాలను పొందుతుందో తెలుసుకోవాలంటే.. ఇంకా ఓ ఏడాది కంటే ఎక్కువ సమయం వేచి చూడాల్సిందే. ఎందుకంటే ఎలక్ట్రిక్ బైక్ అంటే సౌండ్ చేయకుండా నడుస్తుంది. కానీ రాయల్ ఎన్‌ఫీల్డ్ అంటేనే డుగ్.. డుగ్ సౌండ్. అదే లేకుండా రాయల్ ఎన్‌ఫీల్డ్ బైక్ లాంచ్ చేస్తే? ఎలా ఉంటుందో మీరే ఊహించుకోవచ్చు. కానీ ఇది కొత్తదనాన్ని కోరుకునే వారిని తప్పకుండా ఆకర్షిస్తుందని మాత్రం చెప్పవచ్చు.
