భారతదేశంలో గత కొన్ని రోజులుగా బంగారం ధరల్లో ఊహించని మార్పులు కనిపిస్తున్నాయి. ఈ వారం ప్రారంభంలో గోల్డ్ ధరలు పెరిగినట్లు కనిపించినా, కేవలం రెండు రోజుల్లోనే పరిస్థితి మారింది. తాజాగా మార్కెట్లో బంగారం ధరలు వరుసగా రెండు రోజులుగా తగ్గుతున్నాయి.
మార్చి 13న.. 24 క్యారట్ బంగారం ధర 10 గ్రాములకు రూ.980 తగ్గి రూ.1,62,220 నుంచి రూ.1,61,240కి చేరింది. గత రెండు రోజుల్లో మొత్తం చూస్తే సుమారు రూ.2 వేల వరకు ధరలు పడిపోయాయి. అదే విధంగా.. ఆభరణాల తయారీలో ఎక్కువగా ఉపయోగించే 22 క్యారట్ బంగారం ధర కూడా తగ్గింది. దీంతో 10 గ్రాముల రేటు రూ.900 తగ్గి రూ.1,48,700 నుంచి రూ.1,47,800కి చేరింది. 18 క్యారట్ బంగారం ధర రూ.740 తగ్గి రూ.1,21,670 నుంచి రూ.1,20,930కి పడిపోయింది.
వెండి ధరలు ఇలా..
బంగారం మాత్రమే కాకుండా వెండి ధరల్లో కూడా తగ్గుదల కనిపిస్తోంది. ఇటీవల కేజీ వెండి ధర మళ్లీ రూ.3,00,000 చేరుకున్నప్పటికీ.. ప్రస్తుతం ఈ రేటు కూడా తగ్గి సుమారు రూ.2,90,000 వద్ద ట్రేడ్ అవుతోంది. ప్రస్తుతం తులం వెండి ధర సుమారు రూ.2,900గా ఉంది.
మార్కెట్ ట్రేడింగ్లో కూడా ఇదే ధోరణి కనిపిస్తోంది. మల్టీ కమోడిటీ ఎక్స్ఛేంజ్లో గోల్డ్ ఏప్రిల్ ఫ్యూచర్స్ 0.11 శాతం అంటే రూ.171 తగ్గి రూ.1,60,100 వద్ద ట్రేడ్ అవుతోంది. అదే సమయంలో సిల్వర్ మే ఫ్యూచర్స్ 0.23 శాతం అంటే రూ.609 తగ్గి రూ.2,67,353 వద్ద కొనసాగుతున్నాయి.
గ్లోబల్ మార్కెట్ ప్రభావం
బంగారం ధరలు ప్రధానంగా అంతర్జాతీయ మార్కెట్ పరిస్థితులపై ఆధారపడి ఉంటాయి. ప్రస్తుతం గ్లోబల్ మార్కెట్లో కూడా గోల్డ్, సిల్వర్ ధరలు ఒకే రేంజ్లో కొనసాగుతున్నాయి. అంతర్జాతీయ మార్కెట్లో ప్రస్తుతం ఒక ఔన్స్ బంగారం ధర సుమారు 5,106.99 డాలర్ల వద్ద ట్రేడ్ అవుతోంది. అలాగే ఒక ఔన్స్ వెండి ధర 84.45 డాలర్ల వద్ద కొనసాగుతోంది. మార్కెట్ విశ్లేషకుల ప్రకారం ఇటీవల అమెరికా డాలర్ విలువ కొంత తగ్గింది. దీంతో ఇతర కరెన్సీలలో పెట్టుబడులు పెట్టే వారికి బంగారం కొంత చౌకగా కనిపిస్తోంది.
మార్కెట్పై ప్రభావం చూపుతున్న అంశాలు
మార్కెట్ నిపుణుల ప్రకారం ప్రపంచ ఆర్థిక పరిస్థితులు బంగారం ధరలపై ప్రభావం చూపుతున్నాయి. ముఖ్యంగా ద్రవ్యోల్బణం పెరుగుతుందనే భయం మార్కెట్లో ఉంది. అలాగే అంతర్జాతీయ మార్కెట్లో ఆయిల్ ధరలు ఎక్కువగా కొనసాగుతున్నాయి. ఈ పరిస్థితుల్లో వడ్డీ రేట్లపై అనిశ్చితి కొనసాగుతోంది. అమెరికా కేంద్ర బ్యాంక్ అయిన ఫెడరల్ రిజర్వ్ వడ్డీ రేట్లు తగ్గిస్తుందా లేదా అన్న సందేహం కూడా మార్కెట్లో ఉంది. ఈ అంశాలు బంగారం ఆకర్షణను కొంత వరకు తగ్గిస్తున్నాయని నిపుణులు చెబుతున్నారు.
భారతదేశంలో బంగారానికి ప్రత్యేక స్థానం
భారతదేశంలో బంగారం కేవలం పెట్టుబడి మాత్రమే కాదు. పెళ్లిళ్లు, పండుగలు వంటి వేడుకల్లో కూడా బంగారం ముఖ్యమైన భాగంగా ఉంటుంది. అందుకే దేశంలో బంగారం డిమాండ్ ఎప్పుడూ ఎక్కువగానే ఉంటుంది.
అయితే మార్కెట్ పరిస్థితులు తరచుగా మారుతూ ఉండటంతో బంగారం ధరలు కూడా రోజువారీగా మారుతుంటాయి. అంతర్జాతీయ మార్కెట్ ధరలు, దిగుమతి సుంకాలు, పన్నులు మరియు రూపాయి-డాలర్ మార్పిడి రేట్లు బంగారం ధరలపై ప్రభావం చూపుతాయి. నిపుణుల అభిప్రాయం ప్రకారం.. పెట్టుబడిదారులు బంగారం ధరల మార్పులను గమనిస్తూ మార్కెట్ పరిస్థితులను అర్థం చేసుకోవడం చాలా ముఖ్యమని సూచిస్తున్నారు.
Also Read: గ్యాస్ సిలిండర్స్ కొరత: వీటికి ఫుల్ డిమాండ్.. ఎగబడి కొనేస్తున్న జనం!
డిజిటల్ కంటెంట్ రైటర్గా పనిచేస్తున్నారు. ప్రముఖ విశ్వ విద్యాలయం శ్రీ వెంకటేశ్వర యూనివర్సిటీలో MA తెలుగు చేశారు. తాజా సినిమా, పాలిటిక్స్, నేషనల్, స్పోర్ట్స్కు సంబంధించిన వార్తలతో పాటు ప్రత్యేకమైన కథనాలు రాస్తారు. డిజిటల్ కంటెంట్ రైటర్గా సంవత్సరం అనుభవం కలిగి ఉన్నారు. ఈయనకు పాటలు, కవితలు, షార్ట్ ఫిలిమ్స్ వంటివాటికి మాటలు రాసే అలవాటు ఉంది. సహజంగా జానపద, సినిమా పాటలు గాయకుడు.