రోజంతా పని చేసి ఇంటికి చేరుకున్న తర్వాత చాలా మంది విశ్రాంతి తీసుకోవడానికే ప్రాధాన్యత ఇస్తారు. సంగీతం వినడం, టీవీ సీరీస్ చూడడం లేదా భోజనం చేయడం వంటి పనులతో రోజు ముగుస్తుంది. కానీ మనం ఎంత పని చేస్తామో, అంతే పని మన చర్మం కూడా చేస్తుంది. వేడి వాతావరణం, కాలుష్యం, చెమట, ధూళి వంటి అంశాలు చర్మాన్ని రోజంతా ప్రభావితం చేస్తాయి.
ఇలాంటి పరిస్థితుల్లో నైట్ స్కిన్కేర్ రొటీన్ చాలా కీలకమని చర్మ నిపుణులు చెబుతున్నారు. ముఖ్యంగా భారతదేశం వంటి ఉష్ణమండల వాతావరణంలో చర్మంపై కాలుష్యం ప్రభావం ఎక్కువగా ఉంటుంది. అందుకే రాత్రి సమయంలో సరైన సంరక్షణ తీసుకుంటే చర్మం పునరుత్తేజం పొందుతుందని నిపుణులు పేర్కొంటున్నారు.
డెర్మటాలజిస్ట్ డాక్టర్ గుర్వీన్ వరైచ్ తెలిపిన ప్రకారం.. ఉదయం స్కిన్కేర్ ప్రధానంగా రక్షణ కోసం ఉంటే, రాత్రి స్కిన్కేర్ మాత్రం చర్మ సమస్యలను సరిచేసే ముఖ్యమైన సమయం. అందుకే సరైన నైట్ స్కిన్కేర్ రొటీన్ పాటించడం ద్వారా మచ్చలు, పొడిబారడం, మసకబారడం వంటి సమస్యలను తగ్గించుకోవచ్చు.
రాత్రి స్కిన్కేర్ ఎందుకు ముఖ్యమంటే?
చర్మం రాత్రి సమయంలోనే ఎక్కువగా పునరుద్ధరణ ప్రక్రియను ప్రారంభిస్తుంది. ఈ సమయంలో బయట నుంచి కాలుష్యం లేదా సూర్యరశ్మి ప్రభావం ఉండదు. అందువల్ల చర్మానికి ఉపయోగించే ఉత్పత్తులు లోతుగా పనిచేసే అవకాశం ఉంటుంది.
భారతదేశంలో ఎక్కువ మంది రాత్రి స్కిన్కేర్ను నిర్లక్ష్యం చేస్తారని నిపుణులు చెబుతున్నారు. అలసట కారణంగా చాలామంది ముఖం శుభ్రం చేయకుండానే నిద్రపోతారు. దీని వల్ల చర్మంలో మురికి పేరుకుపోయి మొటిమలు, మచ్చలు రావచ్చు. అందుకే సరళమైన మూడు స్టెప్స్తో కూడిన నైట్ స్కిన్కేర్ రొటీన్ను పాటిస్తే చర్మ ఆరోగ్యం మెరుగుపడుతుందని డాక్టర్ గుర్వీన్ వరైచ్ తెలిపారు.
View this post on Instagram
స్టెప్ 1: క్లెన్సింగ్ – చర్మ శుభ్రతకు తొలి అడుగు
ఏ స్కిన్కేర్ రొటీన్లోనైనా మొదటి దశ క్లెన్సింగ్. ముఖ్యంగా రాత్రి సమయంలో ఇది అత్యంత అవసరం. రోజంతా చర్మంపై పేరుకుపోయే ధూళి, కాలుష్యం, చెమట, సన్స్క్రీన్, మేకప్ వంటి వాటిని తొలగించడానికి క్లెన్సింగ్ అవసరం. డాక్టర్ వరైచ్ సూచన ప్రకారం, రోజంతా మేకప్ వేసుకున్నవారు ముఖాన్ని రెండు సార్లు శుభ్రం చేయాలి. ఇలా చేయడం వల్ల చర్మంపై ఎలాంటి అవశేషాలు మిగలకుండా పూర్తిగా శుభ్రం అవుతుంది. తద్వారా తరువాత ఉపయోగించే స్కిన్కేర్ ఉత్పత్తులు లోతుగా పనిచేయగలవు.
స్టెప్ 2: ట్రీట్ – చర్మ సమస్యలకు పరిష్కారం
రాత్రి స్కిన్కేర్లో రెండో దశ చికిత్సకు సంబంధించినది. అంటే చర్మ సమస్యలను సరిచేసే ఉత్పత్తులను ఈ దశలో ఉపయోగించాలి. డర్మటాలజిస్ట్ సూచనల ప్రకారం..రెటినాయిడ్స్ (Retinoids), లాక్టిక్ లేదా గ్లైకోలిక్ యాసిడ్ వంటి AHAలు, హైల్యూరోనిక్ యాసిడ్ వంటివి ఉపయోగించవచ్చు. అయితే ప్రతి చర్మానికి అవసరాలు వేరుగా ఉండటంతో వారంలో ఒక్కో రోజుకు ఒక్కో యాక్టివ్ ఇంగ్రిడియెంట్ ఉపయోగించడం మంచిదని నిపుణులు సూచిస్తున్నారు. ఇలా చేస్తే చర్మం దెబ్బతినకుండా సరైన చికిత్స పొందుతుంది.
స్టెప్ 3: మాయిశ్చరైజర్ – తేమను నిలుపుకునే దశ
మూడోది లేదా చివరి దశ మాయిశ్చరైజర్ ఉపయోగించడం. మంచి మాయిశ్చరైజర్ చర్మంలో తేమను నిలుపుకోవడమే కాకుండా ముందుగా ఉపయోగించిన ఉత్పత్తులను కూడా సీల్ చేస్తుంది. డాక్టర్ వరైచ్ ప్రకారం.. సెరమైడ్స్, పాంథెనాల్, స్క్వాలేన్ వంటివి ఉపయోగిస్తే.. చర్మాన్ని మృదువుగా ఉంచి రాత్రంతా రక్షణ కల్పిస్తాయి.
కేవలం ఐదు నిమిషాల్లో మెరిసే చర్మం!
చాలా మంది స్కిన్కేర్ అంటే ఎక్కువ సమయం పడుతుందని భావిస్తారు. కానీ ఈ మూడు స్టెప్స్తో కూడిన నైట్ స్కిన్కేర్ రొటీన్ కేవలం ఐదు నిమిషాల్లో పూర్తవుతుంది. నిపుణుల ప్రకారం ఈ రొటీన్ను ప్రతిరోజూ పాటిస్తే చర్మం ఆరోగ్యంగా మారి సహజ కాంతిని పొందుతుంది. భారతదేశంలో పెరుగుతున్న కాలుష్య పరిస్థితుల్లో చర్మ సంరక్షణకు ఇది చాలా ఉపయోగకరమైన మార్గమని వారు చెబుతున్నారు.
Also Read: కొబ్బరి నీళ్లు vs మజ్జిగ: ఎండాకాలం ఏది బెస్ట్?, ఎప్పుడు తీసుకోవాలి?
ఉమశ్రీ చీఫ్ ఎడిటర్గా పనిచేస్తున్నారు. ట్రెండింగ్ అంశాలు, వివిధ విభాగాలపై ప్రత్యేక కథనాలను రాస్తారు. ఆయన తెలంగాణ, ఆంధ్రప్రదేశ్, జాతీయ, అంతర్జాతీయ వార్తలు, సైన్స్ & టెక్నాలజీ, కేంద్ర ప్రభుత్వ పథకాలు, మౌలిక సదుపాయాల కల్పన, పాలిటిక్స్ తదితర రంగాలకు సంబంధించిన విశ్లేషణాత్మక కథనాలు అందిస్తున్నారు. జర్నలిజం రంగంలో ఆయనకు 8 సంవత్సరాలకు పైగా అనుభవం ఉంది.