ప్రముఖ సూపర్ కార్ల తయారీ సంస్థ ఫెరారీ భారతదేశంలో సరికొత్త మోడల్ లాంచ్ చేయడానికి సన్నాహాలు సిద్ధం చేస్తోంది. ఫెరారీ 849 టెస్టారోస్సా పేరుతో విడుదల కానున్న ఈ కారు 2026 మార్చి నాటికి అమ్మకానికి రానున్నట్లు సమాచారం. అయితే ఈ కథనంలో దీని రేటు ఎంత?, డిజైన్, ఫీచర్స్, ఇంజిన్ వంటి చాలా వివరాలు వివరంగా తెలుసుకుందాం.
ధర ఎంతంటే?
ఫెరారీ లాంచ్ చేయనున్న 849 టెస్టారోస్సా కారు ధర రూ. 10.37 కోట్లు నుంచి ప్రారంభమవుతుంది. దీన్నిబట్టి చూస్తే ఇది కంపెనీకి చెందిన అత్యంత ఖరీదైన కార్లలో ఒకటని తెలుస్తోంది. ఇది ఎస్ఎఫ్90 స్ట్రాడేల్ స్థానంలో అమ్మకానికి వస్తుంది. కాగా ఇప్పటికే అమ్మకానికి ఉన్న లంబోర్ఘిని రెవెల్టోకు ప్రత్యక్ష ప్రత్యర్థిగాఉంటుంది .
డిజైన్ ఇలా..
సూపర్ కార్లు చూడటానికి చాలా అద్భుతంగా ఉంటాయి. కాబట్టి డిజైన్ విషయంలో ఏ మాత్రం రాజీపడకుండా.. కంపెనీ దీనిని అద్భుతంగా రూపొందించింది. 1950ల నుంచి కంపెనీ చరిత్రలో భాగమైన ఐకానిక్ టెస్టరోస్సా బ్యాడ్జ్ కూడా లేటెస్ట్ కారులో కనిపిస్తుంది. ముందు భాగంలో ఎల్ షేప్ ఎల్ఈడీ హెడ్ల్యాంప్స్.. బ్లాక్ ట్రిమ్ స్ట్రిప్ ద్వారా అనుసంధానించబడి ఉండటం చూడవచ్చు. పెద్ద సైడ్ ఇన్టేక్లు దీనిని మరింత అద్భుతంగా చూపించడంలో సహాయపడతాయి. వెనుక భాగంలో ట్విన్ టెయిల్ డిజైన్, స్లిమ్ హారిజాంటల్ టెయిల్ ల్యాంప్స్, హై మౌంటెడ్ ఎగ్జాస్ట్ లేఅవుట్.. పెద్ద డిఫ్యూజర్ వంటివి ఇందులో ప్రధానంగా కనిపిస్తాయి.
ఫీచర్స్ ఇలా..
కొత్త ఫెరారీ 849 టెస్టారోస్సా ఫీచర్స్ విషయానికి వస్తే.. ఇందులో సాధారణ సెంట్రల్ టచ్స్క్రీన్ లేదు. కారును నడిపే డ్రైవర్ దృష్టిని ఏ మాత్రం మరల్చకుండా ఉంచడానికి.. స్టీరింగ్ వీల్ వెనుక 16 ఇంచెస్ డిజిటల్ ఇన్స్ట్రుమెంట్ క్లస్టర్ ఇవ్వడం జరిగింది. ఇందులోనే కారుకు సంబంధించిన మొత్తం సమాచారం కనిపిస్తుంది.
స్టీరింగ్ వీల్ సెన్సిటివ్ కంట్రోల్స్ కాకుండా.. ఫిజికల్ బటన్స్ పొందుతుంది. అంతే కాకుండా కంపెనీ దీని క్లాసిక్ గేటెడ్ మాన్యువల్లను దృశ్యమానంగా సూచించే గేర్ సెలెక్టర్తో నోస్టాల్జియాకు మొగ్గు చూపుతుంది. ఇందులో హార్డ్కోర్ ఫోకస్ ఉన్నప్పటికీ.. ప్రీమియం సౌండ్ సిస్టం, వైర్లెస్ యాపిల్ కార్ప్లే, ఆండ్రాయిడ్ ఆటో వంటి అనేక ఫీచర్స్ ఉంటాయి.
ఇంజిన్ వివిరాలు
సూపర్ కార్ల పనితీరు అద్భుతంగా ఉండటానికి కంపెనీలు అత్యాధునిక ఇంజిన్ సెట్ చేస్తాయి. ఇందులో భాగంగానే ఫెరారీ కూడా తన 849 టెస్టరోస్సా కారులో ప్లగ్ ఇన్ హైబ్రిడ్ సెటప్ కూడా అందిస్తుంది. ఇందులోని 4.0 లీటర్ ట్విన్ టర్బో వీ8 ఇంజిన్.. మూడు ఎలక్ట్రిక్ మోటార్లతో జతచేయబడి ఉంటుంది. ఇందులో రెండు మోటార్లు ఫ్రంట్ ఆక్సిల్పై ఉంటాయి. ఇంకొకటి ఇంజిన్ & గేర్బాక్స్ మధ్య ఉంటుంది. ఇంజిన్ 800 బీహెచ్పీ పవర్ అందిస్తుంది. కానీ ఎలక్ట్రిక్ మోటార్లతో కలిపి ఇది 1050 బీహెచ్పీకు చేరుతుంది. 8 స్పీడ్ డ్యూయల్ క్లచ్ ట్రాన్స్మిషన్ ద్వారా నాలుగు చక్రాలకు పవర్ డెలివరీ జరుగుతుంది.
ఫెరారీ 849 టెస్టరోస్సా కారు కేవలం రెండు సెకన్లలో 0 నుంచి 100 కిమీ/గం వరకు వేగవంతం అవుతుంది. 200 కిమీ/గం వేగాన్ని చేరుకోవడానికి దీనికి పట్టే సమయం ఆరు సెకన్లు మాత్రమే. ఈ సూపర్ కారు టాప్ స్పీడ్ 330 కిమీ/గం కంటే ఎక్కువే. ఇందులోని 7.45 కిలోవాట్ బ్యాటరీ 25 కిమీ రేంజ్ అందిస్తుంది. ఇది లిమిటెడ్ ఆల్ ఎలక్ట్రిక్ డ్రైవింగ్కు సపోర్ట్ చేస్తుంది.
లాంచ్ ఎప్పుడంటే..
ఫెరారీ కంపెనీ 849 టెస్టరోస్సా కారును 2026 మార్చిలో లాంచ్ చేయనుంది. లాంచ్ అయిన తరువాత డెలివరీలు కూడా వెంటనే ప్రారంభమవుతాయని సంస్థ వెల్లడించింది. ఈ కారు ఎక్స్ షోరూమ్ బేస్ వేరియంట్ ధర రూ. 10.97 కోట్లు. కాబట్టి ఆన్ రోడ్ ధర.. ఇంకా ఎక్కువ ఉంటుంది.
హిమాన్షు కన్సల్టెంట్గా పని చేస్తున్నారు. ఆంధ్రప్రదేశ్, సినీ రంగాలకు సంబంధించిన తాజా వార్తలు, కథనాలను అందిస్తున్నారు. గతంలో ఆయన ఏపీ, తెలంగాణకు సంబంధించిన ఆసక్తికర వార్తలు, రాజకీయాలు, క్రికెట్ వార్తలు రాశారు. హైపర్ లోకల్ న్యూస్ రైటింగ్లో అనుభవం కలిగిన ఆయన వీడియో టీమ్తో కూడా పని చేసిన అనుభవం కలిగి ఉన్నారు. జర్నలిజం రంగంలో 14 సంవత్సరాలకు పైగా అనుభవం ఉన్న ఆయన ప్రముఖ మీడియా సంస్థల్లో రాజకీయాలు, క్రీడలు, సినిమా రంగాలకు సంబంధించిన ఆర్టికల్స్ రాశారు.