దేశంలో గృహ అవసరాలకు అత్యంత కీలకమైన LPG సరఫరాలో.. ముఖ్యమైన భాగం అయిన ఇండేన్ గ్యాస్ బుకింగ్ సిస్టమ్ అకస్మాత్తుగా పనిచేయకపోవడం వినియోగదారుల్లో ఆందోళనకు కారణమైంది. సాధారణంగా ప్రతిరోజు వచ్చే కాల్స్ కంటే 8 నుంచి 10 రెట్లు ఎక్కువ రావడం వల్ల సర్వర్ల ఒత్తిడిని తట్టుకోలేక సిస్టమ్ క్రాష్ అయినట్లు అధికారులు తెలిపారు.
వేల సంఖ్యలో బుకింగ్స్
భారతదేశంలో ఇండేన్కు దాదాపు 15 కోట్లకుపైగా LPG కనెక్షన్లు ఉన్నాయి. వీరిలో పెద్ద సంఖ్యలో వినియోగదారులు IVRS మిస్డ్ కాల్ సేవల ద్వారా గ్యాస్ సిలిండర్ బుకింగ్ చేస్తుంటారు. అయితే ఇటీవల దేశంలో LPG కొరత ఏర్పడుతుందనే వార్తలు సోషల్ మీడియాలో విస్తృతంగా ప్రచారం కావడంతో ఒకేసారి వేల సంఖ్యలో వినియోగదారులు బుకింగ్ చేయడానికి ప్రయత్నించారు. ఇది గ్యాస్ సరఫరా వ్యవస్థపై తక్షణ ప్రభావం చూపింది. ఇండేన్ గ్యాస్ బుకింగ్ సిస్టమ్ క్రాష్ కావడంతో చాలా మంది వినియోగదారులు ఫోన్ కాల్ లేదా మిస్డ్ కాల్ ద్వారా బుకింగ్ చేయలేకపోయారు.
IVRS కాల్స్ పెరగడానికి కారణం
ఇండేన్ గ్యాస్ బుకింగ్ కోసం వినియోగదారులు ఎక్కువగా IVRS లేదా మిస్డ్ కాల్ విధానాన్ని ఉపయోగిస్తారు. ఒక వినియోగదారు తన నమోదు చేసిన మొబైల్ నంబర్ నుంచి మిస్డ్ కాల్ ఇచ్చినా లేదా IVRS కాల్ చేసినా బుకింగ్ నమోదు అవుతుంది. కానీ ఇటీవల LPG కొరత ఉందనే సమాచారం రావడంతో వినియోగదారులు ముందుగానే సిలిండర్ బుక్ చేసుకోవడానికి ప్రయత్నించారు. దీంతో IVRS సర్వర్లపై భారీ ఒత్తిడి ఏర్పడింది.
వినియోగదారుల్లో అసంతృప్తి!
సిస్టమ్ క్రాష్ కారణంగా.. చాలా మంది వినియోగదారులు గ్యాస్ బుకింగ్ చేయలేకపోతున్నారు. ముఖ్యంగా గ్రామీణ ప్రాంతాల్లో ఇంటర్నెట్ సౌకర్యం తక్కువగా ఉండటంతో వారు పూర్తిగా IVRS సేవలపైనే ఆధారపడుతుంటారు. కొంతమంది వినియోగదారులు ఒకే నంబర్కు పలుమార్లు మిస్డ్ కాల్స్ ఇచ్చినా బుకింగ్ నమోదు కాకపోవడంతో అసంతృప్తి వ్యక్తం చేస్తున్నారు.
కొందరు తమ డిస్ట్రిబ్యూటర్లను నేరుగా సంప్రదిస్తున్నప్పటికీ అక్కడ కూడా భారీగా కాల్స్ రావడం వల్ల స్పందన ఆలస్యమవుతోంది. ఈ పరిస్థితుల్లో వినియోగదారులు ఇండేన్ గ్యాస్ బుకింగ్ సిస్టమ్ పునరుద్ధరించబడే వరకు వేచి చూడాల్సి వస్తోంది.
ప్రత్యామ్నాయ బుకింగ్ మార్గాలు
- అధికారిక మొబైల్ యాప్ ద్వారా బుకింగ్
- అధికారిక వెబ్సైట్ ద్వారా బుకింగ్
- గ్యాస్ ఏజెన్సీకి నేరుగా సంప్రదించడం
- SMS సేవలు ఉపయోగించడం
పదే పదే బుకింగ్ వద్దు!
ఈ సమయంలో వినియోగదారులు అవసరం లేని సమయంలో పదే పదే బుకింగ్ ప్రయత్నాలు చేయకుండా ఉండాలని అధికారులు సూచిస్తున్నారు. అదే విధంగా సోషల్ మీడియాలో వస్తున్న LPG కొరత వార్తలను నమ్మే ముందు అధికారిక సమాచారం కోసం ఎదురుచూడాలని చెప్పారు. సరఫరా వ్యవస్థ సాధారణంగానే కొనసాగుతోందని, అవసరమైన వారికి గ్యాస్ సిలిండర్లు అందుబాటులో ఉంటాయని అధికారులు స్పష్టం చేశారు.
LPG గ్యాస్ కష్టాలకు కారణం
LPG గ్యాస్ కష్టాలకు ప్రధానంగా సరఫరా సమస్యలు, ధరల పెరుగుదల, ప్రభుత్వ విధానాలు, అంతర్జాతీయ పరిస్థితులు కారణం అని తెలుస్తోంది. గ్యాస్ కష్టాలు రావడం ఇదే మొదటిసారి కాదు. 1970–80 ప్రాంతంలో, 1990ల కాలంలో, 2010–2014 సమయంలో, 2020 కోవిడ్ సమయంలో కూడా గ్యాస్ కష్టాలు తలెత్తాయి. అయితే ప్రస్తుతం తలెత్తిన గ్యాస్ కొరత సమస్య.. త్వరలోనే పరిష్కారం అవుతుందని సంబంధిత అధికారులు చెబుతున్నారు.
Also Read: మార్చి 31లోపు పూర్తి చేయాల్సిన పనులు ఇవే!
డిజిటల్ కంటెంట్ రైటర్గా పనిచేస్తున్నారు. ప్రముఖ విశ్వ విద్యాలయం శ్రీ వెంకటేశ్వర యూనివర్సిటీలో MA తెలుగు చేశారు. తాజా సినిమా, పాలిటిక్స్, నేషనల్, స్పోర్ట్స్కు సంబంధించిన వార్తలతో పాటు ప్రత్యేకమైన కథనాలు రాస్తారు. డిజిటల్ కంటెంట్ రైటర్గా సంవత్సరం అనుభవం కలిగి ఉన్నారు. ఈయనకు పాటలు, కవితలు, షార్ట్ ఫిలిమ్స్ వంటివాటికి మాటలు రాసే అలవాటు ఉంది. సహజంగా జానపద, సినిమా పాటలు గాయకుడు.