ఆరోగ్యంగా ఉండాలంటే.. ప్రతిరోజూ తప్పకుండా వాకింగ్ (నడక) అవసరం అని ఆరోగ్య నిపుణులు చెబుతున్నారు. వాకింగ్ అనేది ఏ వయసు వారు ఎంతవరకు చేయాలనేది వేరువేరుగా ఉంటుంది. సరైన సమయం వెచ్చించి నడక చేయడం వల్ల గుండె ఆరోగ్యం, శరీర దృఢత్వం, మెదడు పనితీరు మెరుగుపడుతాయని నిపుణులు చెబుతున్నారు. ప్రతిరోజూ నడక చేయడం ఆరోగ్యానికి అత్యంత సులభమైన మరియు సురక్షితమైన వ్యాయామాల్లో ఒకటిగా భావిస్తారు. అయితే వయసునుబట్టి శరీరం ఎలా స్పందిస్తుందనే విషయాన్ని బట్టి నడిచే సమయం కూడా మారుతూ ఉంటుంది.
సమయం తప్పనిసరి!
ప్రతి ఒక్కరికీ ఒకే విధమైన వ్యాయామం సరిపోదు. వయస్సు పెరుగుతున్న కొద్దీ కండరాలు, గుండె, ఊపిరితిత్తులు & శక్తి స్థాయి మారుతాయి. అందుకే వయస్సుకు తగిన వాకింగ్ సమయం పాటించడం అవసరం అని నిపుణులు చెబుతున్నారు.
పిల్లలు, టీనేజర్లకు ఎంత నడక అవసరం?
5 నుంచి 12 సంవత్సరాల పిల్లల శారీరక అభివృద్ధి కోసం ఎక్కువ శారీరక కదలిక అవసరం. నిపుణుల సూచనల ప్రకారం ఈ వయస్సు పిల్లలు రోజుకు కనీసం 60 నిమిషాలు నడవాలి. ఇది ఒకేసారి కాకుండా చిన్న చిన్న విరామాల్లో చేసినా సరిపోతుంది. పార్క్లో ఆడుకోవడం, సైక్లింగ్ చేయడం లేదా కుటుంబ సభ్యులతో కలిసి నడవడం వంటి కార్యకలాపాలు పిల్లలకు ఆసక్తికరంగా ఉంటాయి. ఇలా రోజూ నడవడం వల్ల ఎముకలు బలపడతాయి, గుండె ఆరోగ్యం మెరుగుపడుతుంది.
13 నుంచి 19 సంవత్సరాల టీనేజర్లకు చదువు, పరీక్షలు, మానసిక ఒత్తిడి ఎక్కువగా ఉంటుంది. కాబట్టి వీరు రోజుకు 45 నుంచి 60 నిమిషాలు నడవడం మంచిదని నిపుణులు చెబుతున్నారు. నడక వల్ల ఒత్తిడి తగ్గుతుంది, శక్తి స్థాయి పెరుగుతుంది. అలాగే బరువు నియంత్రణలో ఉండటానికి ఇది సహాయపడుతుంది. సంగీతం వింటూ లేదా స్నేహితులతో కలిసి నడిస్తే ఈ అలవాటు సులభంగా కొనసాగుతుంది.
యువకులు & మధ్య వయస్సు వారికి నడక సమయం
20 నుంచి 40 సంవత్సరాల వయస్సులో ఉద్యోగం, కుటుంబ బాధ్యతల వల్ల చాలామందికి వ్యాయామం చేయడానికి సమయం దొరకదు. కానీ నిపుణుల ప్రకారం వీరు కూడా రోజుకు 30 నుంచి 45 నిమిషాలు వాకింగ్ చేయడం చాలా అవసరం. ఇలా నడవడం వల్ల శరీరంలో కండరాల బలం పెరుగుతుంది, శక్తి స్థాయి మెరుగుపడుతుంది. డయాబెటిస్, గుండె జబ్బులు వంటి దీర్ఘకాలిక వ్యాధుల ప్రమాదం తగ్గుతుంది. మరో విషయం ఏమిటంటే.. వేగంగా నడిస్తే ఎక్కువ కాలరీలు ఖర్చవుతాయి.
40 నుంచి 60 సంవత్సరాల మధ్య వయస్సు దశలో ఆరోగ్య సంరక్షణ చాలా ముఖ్యమవుతుంది. కాబట్టి వీరు రోజుకు 30 నుంచి 40 నిమిషాలు మోస్తరు వేగంతో నడవడం మంచిదని నిపుణులు సూచిస్తున్నారు. ఇలా నడవడం వల్ల బరువు నియంత్రణలో ఉంటుంది. అలాగే రక్తపోటు నియంత్రణ, కీళ్ల ఆరోగ్యం మెరుగుదల వంటి ప్రయోజనాలు లభిస్తాయి. దీర్ఘకాలంలో జ్ఞాపకశక్తి తగ్గే ప్రమాదాన్ని కూడా తగ్గించడంలో ఇది సహాయపడుతుంది.
60 సంవత్సరాల పైబడిన వారికి కూడా తప్పకుండా సరైన నడక సమయం. ఎందుకంటే వృద్ధాప్యంలో శరీర శక్తి తగ్గడం సహజం. అందుకే పెద్దవారు రోజుకు 20 నుంచి 30 నిమిషాలు నడిస్తే సరిపోతుందని నిపుణులు చెబుతున్నారు. మెల్లగా నడిచినా సరిపోతుంది. అవసరమైతే మధ్యలో విరామం తీసుకోవచ్చు. ఇలా చేయడం వల్ల సమతుల్యత, కదలిక సామర్థ్యం మెరుగుపడతాయి. అలాగే పడిపోవడం వంటి ప్రమాదాలు కూడా తగ్గుతాయి. వృద్దులు ఒంటరిగా కాకుండా.. సన్నిహితులతో నడవడం మంచిది.
ఆరోగ్యకర జీవితం కోసం..
ఆరోగ్యంగా ఉండటానికి పెద్దగా ఖర్చు లేదా కఠినమైన వ్యాయామాలు అవసరం లేదు. నిపుణుల అభిప్రాయం ప్రకారం.. దీర్ఘకాల ఆరోగ్యానికి రహస్యం పెద్దగా దూరం నడవడంలో కాదు, కానీ ప్రతిరోజూ నిరంతరం నడవడంలోనే ఉంది. వయస్సుకు తగిన విధంగా నడక అలవాటు చేసుకుంటే ఆరోగ్యకర జీవితం సాధ్యమవుతుంది.
Also Read: రాజులు మెచ్చిన నగరం: ఒక్కసారైన చూడాల్సిన ప్రదేశం!
హిమాన్షు కన్సల్టెంట్గా పని చేస్తున్నారు. ఆంధ్రప్రదేశ్, సినీ రంగాలకు సంబంధించిన తాజా వార్తలు, కథనాలను అందిస్తున్నారు. గతంలో ఆయన ఏపీ, తెలంగాణకు సంబంధించిన ఆసక్తికర వార్తలు, రాజకీయాలు, క్రికెట్ వార్తలు రాశారు. హైపర్ లోకల్ న్యూస్ రైటింగ్లో అనుభవం కలిగిన ఆయన వీడియో టీమ్తో కూడా పని చేసిన అనుభవం కలిగి ఉన్నారు. జర్నలిజం రంగంలో 14 సంవత్సరాలకు పైగా అనుభవం ఉన్న ఆయన ప్రముఖ మీడియా సంస్థల్లో రాజకీయాలు, క్రీడలు, సినిమా రంగాలకు సంబంధించిన ఆర్టికల్స్ రాశారు.