ఉరుకులు, పరుగులతో కూడిన నేటి వేగవంతమైన జీవనశైలిలో చాలా మందికి నిద్ర సమస్యలు పెరుగుతున్నాయి. పని ఒత్తిడి, మొబైల్ వినియోగం, లేట్ నైట్ తినడం వంటి కారణాల వల్ల రాత్రి సరిగ్గా నిద్రపట్టకపోవడం సాధారణంగా మారింది. సరైన నిద్ర లేకపోతే అలసట, దృష్టి లోపం, మానసిక ఒత్తిడి వంటి సమస్యలు ఏర్పడే అవకాశం ఉంది.
స్లీప్ హైజీన్ గురించి
వైద్య నిపుణుల ప్రకారం. మంచి నిద్ర ఆరోగ్యానికి ఎంతో అవసరం. సాధారణంగా పెద్దవారికి రోజుకు 7–8 గంటల నిద్ర అవసరమని వారు సూచిస్తున్నారు. మంచి నిద్ర కోసం పాటించాల్సిన అలవాట్లను “స్లీప్ హైజీన్” అని అంటారు. సరైన జీవనశైలి, ఆరోగ్యకరమైన అలవాట్లు మరియు ప్రశాంతమైన వాతావరణం ఉంటే నిద్ర నాణ్యత మెరుగుపడుతుంది. ఈ నేపథ్యంలో నిపుణులు సూచిస్తున్న కొన్ని ముఖ్యమైన మార్గాలు ఇవి.
మంచి నిద్రకోసం – కొన్ని అలవాట్లు
సమయానికి నిద్రపోవడం: రోజూ ఒకే సమయానికి నిద్రపోవడం, ఉదయం కూడా ఒకే సమయానికి లేవడం మంచిది. ఇలా చేయడం వల్ల శరీరంలో నిద్ర చక్రం సరిగ్గా పనిచేస్తుంది. దీంతో నిద్ర త్వరగా వస్తుంది.
ప్రశాంతమైన బెడ్రూమ్: నిద్రపోయే గది ప్రశాంతంగా ఉండాలి. ఎక్కువ శబ్దం లేకుండా చూసుకోవాలి. గది చాలా చల్లగా లేదా ఎక్కువ వేడిగా ఉండకూడదు. ఇలాంటి వాతావరణం నిద్రకు అనుకూలంగా ఉంటుంది.
వెలుతురు నియంత్రణ: రాత్రి నిద్ర సమయంలో గదిలో ఎక్కువ వెలుతురు ఉండకూడదు. మసక చీకటి వాతావరణంలో శరీరంలో Melatonin అనే హార్మోన్ విడుదల అవుతుంది. ఇది నిద్రలోకి వెళ్లడానికి సహాయపడుతుంది. అయితే గదిలో ఎక్కువ వెలుతురు ఉంటే ఈ హార్మోన్ విడుదల తగ్గిపోతుంది. అందుకే కొందరు నిద్రపోయేటప్పుడు కళ్లపై మాస్క్ లేదా గుడ్డ కప్పుకుంటారు.
ఆహారం & పానీయాలు: నిద్రకు ముందు తీసుకునే ఆహారం కూడా నిద్రపై ప్రభావం చూపుతుంది. సాయంత్రం 6 తర్వాత కాఫీ, టీ, కెఫిన్ ఉన్న కూల్డ్రింక్స్ తాగకపోవడం మంచిది. ఆల్కహాల్ & పొగతాగడం అలవాట్లకు దూరంగా ఉండాలి. రాత్రి భోజనం త్వరగా ముగించాలి. కడుపు నిండా తినకపోవడం మంచిది. అంతే కాకుండా నిద్రకు ముందు గోరువెచ్చని పాలు తాగితే మంచి నిద్రకు సహాయపడుతుంది. పాలలో ఉండే Tryptophan అనే అమైనో ఆమ్లం నిద్రకు ఉపకరిస్తుంది.
వ్యాయామం: మంచి నిద్ర కోసం వ్యాయామం చేయడం కూడా అవసరం. రోజుకు కనీసం అరగంట సేపు పగటి వెలుగులో గడపడం మంచిది. వాకింగ్ వంటి వ్యాయామాలు చేయడం ఆరోగ్యానికి ఉపయోగకరం. అయితే ఇక్కడ గుర్తుంచుకోవాల్సిన విషయం ఏమిటంటే.. రాత్రి నిద్రకు ముందు కఠిన వ్యాయామాలు చేయడం మంచిది కాదు. అవి శరీరాన్ని ఉత్సాహపరచి నిద్రను ఆలస్యం చేయవచ్చు.
నిద్రకు ముందు చేయాల్సిన పనులు
- గోరువెచ్చని నీటితో స్నానం చేయడం
- ప్రశాంతమైన లైట్ మ్యూజిక్ వినడం
- ఆసక్తికరమైన కానీ ఉత్కంఠ కలిగించని పుస్తకాలు చదవడం
మంచి నిద్రకు ‘స్లీప్ హైజీన్’
వైద్య నిపుణులు మంచి నిద్ర కోసం పాటించాల్సిన ఈ ఆరోగ్యకరమైన అలవాట్లను స్లీప్ హైజీన్ అని పేర్కొంటారు. సరైన జీవనశైలి, నియమిత నిద్ర సమయం, ఆరోగ్యకరమైన ఆహారం మరియు ప్రశాంతమైన వాతావరణం ఉంటే మంచి నిద్ర పొందవచ్చు. మంచి నిద్ర మన శరీరానికి విశ్రాంతి ఇవ్వడమే కాకుండా, మెదడు పనితీరును మెరుగుపరచి రోజువారీ జీవితాన్ని ఆరోగ్యంగా కొనసాగించడానికి సహాయపడుతుంది.
Also Read: ప్రతిరోజూ ఉదయం కొబ్బరినీళ్లు తాగితే.. 30 రోజుల్లో జరిగే మార్పులు ఇవే!
ఉమశ్రీ చీఫ్ ఎడిటర్గా పనిచేస్తున్నారు. ట్రెండింగ్ అంశాలు, వివిధ విభాగాలపై ప్రత్యేక కథనాలను రాస్తారు. ఆయన తెలంగాణ, ఆంధ్రప్రదేశ్, జాతీయ, అంతర్జాతీయ వార్తలు, సైన్స్ & టెక్నాలజీ, కేంద్ర ప్రభుత్వ పథకాలు, మౌలిక సదుపాయాల కల్పన, పాలిటిక్స్ తదితర రంగాలకు సంబంధించిన విశ్లేషణాత్మక కథనాలు అందిస్తున్నారు. జర్నలిజం రంగంలో ఆయనకు 8 సంవత్సరాలకు పైగా అనుభవం ఉంది.