Martha Telugu

Blog

  • పవన్ కళ్యాణ్ OG సినిమా అప్డేట్: రిలీజ్ ఎప్పుడంటే?

    పవన్ కళ్యాణ్ OG సినిమా అప్డేట్: రిలీజ్ ఎప్పుడంటే?

    Pawan Kalyan OG Shooting: పవర్ స్టార్ పవన్ కళ్యాణ్.. రాజకీయాల్లోకి వచ్చాక సినిమాల్లో నటించడం బాగా తగ్గించేసాడు. ఆ తరువాత ఆంధ్రప్రదేశ్ డిప్యూటీ సీఎంగా బాధ్యతలు చేపట్టిన తరువాత అప్పటికే ఒప్పుకున్న సినిమాలకు సైతం దూరమయ్యాడు. కానీ తన మీద నమ్మకం పెట్టుకున్న ప్రొడ్యూసర్లు, డైరెక్టర్లను బాధపెట్టడం ఇష్టం లేకపోవడంతో.. ఆగిపోయిన సినిమాలను పూర్తి చేయడానికి ముందడుగు వేసాడు. ఇటీవలే హరిహర వీరమల్లు సినిమా షూటింగ్ పూర్తి చేసుకున్న పవన్ కళ్యాణ్.. తాజాగా ఓజీ (OG) షూటింగులోకి అడుగుపెట్టాడు. దీనికి సంబంధించిన వీడియోలు సోషల్ మీడియాలో వైరల్ అవుతున్నాయి.

    పవన్ కళ్యాణ్ ఓజీ సెట్స్‌లో సందడి: అభిమానుల ఆనందోత్సాహాలు

    పవన్ కళ్యాణ్ ఓజీ సెట్‌లో అడుగుపెట్టడంతో.. అభిమానులు పండుగ చేసుకుంటున్నారు. మూవీ మేకర్స్ కూడా ”అలాంటోడు మళ్ళీ తిరిగి వస్తున్నాడంటే” అని ఒక ట్వీట్ చేశారు. దీనికి సంబంధించిన ఒక వీడియో కూడా నెట్టింట్లో వైరల్ అవుతున్నాయి. ఓజీ సినిమాకు సంబంధించిన కీలకమైన సన్నివేశాల షూటింగ్ కూడా జరుగుతోంది. ఇది కూడా త్వరలోనే పూర్తయ్యే అవకాశం ఉందని సమాచారం. ఈ సినిమా తరువాత వెయిటింగ్ లిస్టులో ఉన్న ‘ఉస్తాద్ భగత్‌సింగ్’ సినిమాలో నటించనున్నట్లు సమాచారం.

    ఓజీ సినిమా విశేషాలు: తారాగణం

    ఓజీ సినిమాలో పవన్ కళ్యాణ్ కథానాయకుడుగా నటిస్తున్న సంగతి తెలిసిందే. ఈయన సరసన ప్రియాంక మోహన్ కథానాయకిగా నటించనుంది. ఇమ్రాన్ హష్మీ విలన్ క్యారెక్టర్ చేస్తున్నారు. శ్రియా రెడ్డి, అర్జున్ దాస్, అభిమన్యు సింగ్, హరీష్ ఉత్తమన్, అజయ్ ఘోష్ వంటివారు కీలక పాత్రలలో నటిస్తున్నారు. అనుకున్న విధంగా అన్నీ జరిగితే.. ఈ ఏడాది చివరి నాటికి థియేటర్లలో విడుదలయ్యే అవకాశం ఉందని సమాచారం.

    ఓజీ సినిమాకు సంగీతం & పాన్-ఇండియా విడుదల ప్రణాళికలు

    పవన్ కళ్యాణ్ నటిస్తున్న ఓజీ సినిమాకు ఎస్ ఎస్ థమన్ మ్యూజిక్ కంపోజ్ చేస్తున్నారు. వకీలు సాబ్, బీమ్లా నాయక్ మరియు బ్రో వంటి సినిమాలకు మ్యూజిక్ కంపోజ్ చేసిన ఈయన ఇప్పుడు నాలుగో సినిమాకు కూడా కంపోజ్ చేయనున్నారు. ఈ సినిమా కేవలం తెలుగులో మాత్రమే కాకుండా కన్నడ, తమిళం, మలయాళం మరియు హిందీ భాషల్లో రిలీజ్ అయ్యే అవకాశం ఉందని సమాచారం. అయితే దీనిపై స్పష్టమైన ప్రకటన వెలువడాల్సి ఉంది.

    పవన్ కళ్యాణ్ వరుస చిత్రాలు: అభిమానులకు పండుగే

    చాన్నాళ్లుగా సినిమాలకు దూరంగా ఉన్న పవన్ కళ్యాణ్.. వరుస సినిమాల్లో నటిస్తూ బిజీగా ఉన్నారు. ఈ సినిమాలు కూడా వెంట వెంటనే రిలీజ్ అయ్యే సూచనలు ఉన్నాయి. ఎందుకంటే ఇప్పటికే ఈ సినిమాల విడుదల విషయంలో చాలా ఆలస్యమైంది. ఈ ఆలస్యాన్ని మరింత ఆలస్యం చేయడం ఏ మాత్రం సరైనది కాదని అటు నిర్మాతలు, చిత్ర బృందం భావిస్తున్నారు. దీనికి పవన్ కళ్యాణ్ కూడా సహకరిస్తున్నారు. మొత్తం మీద పవన్ కళ్యాణ్ అభిమానులకు ఇక పండగే అని తెలుస్తోంది. త్వరలోనే హరిహర వీరమల్లు సినిమా రిలీజ్ కానుంది.

  • హైదరాబాద్ మెట్రో ఛార్జీల పెంపు ఖరారు: కొత్త చార్జీలు ఇవే..

    హైదరాబాద్ మెట్రో ఛార్జీల పెంపు ఖరారు: కొత్త చార్జీలు ఇవే..

    Hyderabad Metro Rail to Hike Ticket Fares: ఎట్టకేలకు హైదరాబద్ మెట్రో చార్జీలు పెరిగాయి. పెరిగిన ధరలు రేపటి (మే 17, శనివారం) నుంచే అమలులోకి రానున్నాయి. ఈ నిర్ణయంతో ఛార్జీలు కనిష్టంగా 10 రూపాయల నుంచి 12 రూపాయలకు పెరుగగా, గరిష్ట ఛార్జీలు రూ. 60 నుంచి రూ. 75కు చేరాయి. దీని ప్రకారం, మెట్రో ప్రయాణ ధరలు సుమారు 25 శాతం పెరిగాయని స్పష్టమవుతోంది. ఈ ఛార్జీల పెరుగుదల రోజూ మెట్రోలో ప్రయాణించే సుమారు ఐదు లక్షల మంది ప్రయాణికులపై ప్రభావం చూపనుంది.

    కొత్త మెట్రో ఛార్జీల పూర్తి వివరాలు (రూపాయలలో)

    ప్రస్తుతం అమలులో ఉన్న మెట్రో ఛార్జీలు రూ. 10 నుంచి రూ. 60 మధ్య ఉన్నాయి. సవరించిన ఛార్జీల ప్రకారం వివిధ దూరాలకు ధరలు క్రింది విధంగా ఉన్నాయి:

    • 2 కిలోమీటర్ల వరకు: రూ. 12
    • 4 కిలోమీటర్ల నుంచి 6 కిలోమీటర్ల వరకు: రూ. 30
    • 6 కిమీ నుంచి 9 కిమీ వరకు: రూ. 40
    • 9 కిమీ నుంచి 12 కిమీ వరకు: రూ. 50
    • 12 కిమీ నుంచి 15 కిమీ వరకు: రూ. 55
    • 18 కిమీ నుంచి 21 కిమీ వరకు: రూ. 66
    • 21 కిమీ నుంచి 24 కిమీ వరకు: రూ. 70
    • 24 కిమీ కంటే ఎక్కువ దూరం: రూ. 75

    ఈ నూతన ఛార్జీల పట్టికను ఎల్ & టీ మెట్రో రైల్ (హైదరాబాద్) లిమిటెడ్ అధికారికంగా ప్రకటించింది.

    ఛార్జీల పెంపునకు కారణాలు మరియు నేపథ్యం

    రెండేళ్ల నిరీక్షణ తరువాత ధరల సవరణ

    మెట్రో రైల్వేస్ చట్టం 2002 ప్రకారం, ఛార్జీలను సవరించడానికి లేదా కొత్త ధరలను అమలు చేయడానికి 2022లో హైకోర్టు మాజీ న్యాయమూర్తి నేతృత్వంలో ఛార్జీల స్థిరీకరణ కమిటీ (FFC) ఏర్పాటైంది. ఈ కమిటీ 2023 జనవరి 25న సవరించిన ఛార్జీలకు ఆమోదం తెలుపుతూ ఉత్తర్వులు జారీ చేసింది. అయినప్పటికీ, కొన్ని అనివార్య కారణాల వల్ల ఛార్జీల పెరుగుదల గత రెండేళ్లుగా వాయిదా పడుతూ వచ్చింది. ఎట్టకేలకు ఇప్పుడు ఈ కొత్త ధరలు అమలులోకి రానున్నాయి.

    ఎల్ & టీ మెట్రో రైల్ స్పందన

    హైదరాబాద్ మెట్రో రైలు సేవలను మరింత నాణ్యతతో, మెరుగైన సౌకర్యాలతో అందించడానికి ఛార్జీలను పెంచాల్సి వచ్చిందని ఎల్ & టీ గురువారం ఒక ప్రకటనలో వెల్లడించింది. “ప్రయాణికులు ఈ మార్పునకు సహకరించి, మద్దతు అందించాలని ఆశిస్తున్నాము,” అని ఆ ప్రకటనలో పేర్కొన్నారు.

    ప్రయాణికుల అభిప్రాయాలు

    ఛార్జీల పెరుగుదలపై కొందరు ప్రయాణికులు స్పందిస్తూ, ఏడు సంవత్సరాల సుదీర్ఘ విరామం తరువాత ధరల పెంపు కొంతవరకు సమర్థనీయమేనని, అయితే అదే సమయంలో మెట్రో రైళ్లలో కోచ్‌ల సంఖ్యను కూడా పెంచాలని డిమాండ్ చేశారు.

    ఇతర నగరాల మెట్రో ఛార్జీల పరిస్థితి

    ఇప్పటికే దేశంలోని ఇతర ప్రధాన నగరాలైన ఢిల్లీ మెట్రో రెండుసార్లు ఛార్జీలను పెంచింది. బెంగళూరు మెట్రో కూడా సుమారు 45 శాతం మేర ఛార్జీలను పెంచడం గమనార్హం. ఈ నేపథ్యంలో హైదరాబాద్ మెట్రో కూడా ఇప్పుడు ధరల సవరణను అమలు చేస్తున్నట్లు ప్రకటించింది.

    భవిష్యత్ ప్రణాళికలు

    రోజురోజుకూ హైదరాబాద్ మెట్రోలో ప్రయాణించే వారి సంఖ్య గణనీయంగా పెరుగుతోంది. ఈ పెరుగుతున్న రద్దీని దృష్టిలో ఉంచుకుని, తెలంగాణ రాష్ట్ర ప్రభుత్వం కూడా మెట్రో నెట్‌వర్క్‌ను మరింత విస్తరించడానికి ప్రణాళికలను సిద్ధం చేస్తోంది. ఇది భవిష్యత్తులో మరిన్ని ప్రాంతాలకు మెట్రో సేవలను అందుబాటులోకి తీసుకురానుంది.

  • ఇండియన్ ఆర్మీలో ఉద్యోగాలు.. రూ. లక్ష జీతం!: అర్హతలు & ఇతర వివరాలు

    ఇండియన్ ఆర్మీలో ఉద్యోగాలు.. రూ. లక్ష జీతం!: అర్హతలు & ఇతర వివరాలు

    Indian Army Jobs: ఇంజినీరింగ్ పూర్తి చేసిన లేదా చివరి సంవత్సరం చదువుతున్న యువతకు శుభవార్త. ఇండియన్ ఆర్మీలో చేరాలని వేచిచూస్తున్న యువతకు ఇదో సువర్ణావకాశం. భారత సైన్యం టెక్నికల్ గ్రాడ్యుయేట్ కోర్సు (TGS) కోసం అభ్యర్థుల నుంచి దరఖాస్తులను ఆహ్వానిస్తోంది. ఈ కోర్సు ద్వారా ఎంపికైన వారిని ట్రైనింగ్ తరువాత లెఫ్టినెంట్ హోదాతో సైన్యంలో శాశ్వత అధికారులుగా నియమించడం జరుగుతుంది.

    ఇండియన్ ఆర్మీ TGS: అర్హతలు ఏమిటి?

    గుర్తింపు పొందిన యూనివర్సిటీ నుంచి ఇంజినీరింగ్ (బ్యాచిలర్ ఆఫ్ ఇంజినీరింగ్ లేదా బ్యాచిలర్ ఆఫ్ టెక్నాలజీ) పూర్తిచేసిన వారు లేదా చివరి ఏడాది చదువుతున్నవారు (అవివాహిత పురుషులు) దీనికి అర్హులు.

    • కంప్యూటర్ సైన్స్ పోస్టుల కోసం: కంప్యూటర్ సైన్స్ లేదా ఇన్ఫర్మషన్ టెక్నాలజీలో మాస్టర్ ఆఫ్ సైన్స్ (MSc) ఉన్నవారు కూడా అర్హులే.

    వయోపరిమితి

    దరఖాస్తుదారుని వయసు 2025 జనవరి 1నాటికి 27 సంవత్సరాల కంటే తక్కువ ఉండాలి. అంటే అభ్యర్థులు 1998 జనవరి 2 మరియు 2005 జనవరి 1 మధ్య జన్మించినవారు మాత్రమే ఈ ఉద్యోగానికి అర్హులు.

    దరఖాస్తు ప్రక్రియ మరియు ముఖ్యమైన తేదీలు

    ఆసక్తికలిగిన అభ్యర్థులు ఇండియన్ ఆర్మీ అధికారిక వెబ్‌సైట్ joinindianarmy.nic.in ద్వారా అప్లై చేసుకోవచ్చు.

    • అప్లై చేసుకోవడానికి చివరి రోజు: 2025 మే 29 (మధ్యాహ్నం 3 గంటలు).
    • దరఖాస్తు ఫీజు: ఎటువంటి ఫీజు చెల్లించాల్సిన అవసరం లేదు.

    ఎంపిక విధానం?

    ఈ ఉద్యోగానికి అప్లై చేసుకున్న అభ్యర్థులను వారి ఇంజినీరింగ్ మెరిట్ ఆధారంగా షార్ట్‌లిస్ట్ చేసి సర్వీసెస్ సెలక్షన్ బోర్డు (SSB) ఇంటర్వ్యూలకు పిలుస్తారు. ఈ ఇంటర్వ్యూ బెంగళూరులోని SSB కేంద్రంలో ఐదు రోజుల పాటు రెండు దశల్లో జరుగుతుంది.

    • మొదటి దశ: ఇంటెలిజెన్స్ అసెస్‌మెంట్స్ వంటి స్క్రీనింగ్ టెస్ట్ ఉంటుంది.
    • రెండో దశ: సైకలాజికల్ ఎవాల్యుయేషన్, గ్రూప్ టాస్క్‌లు మరియు పర్సనల్ ఇంటర్వ్యూలు ఉంటాయి.

    ఈ ఇంటర్వ్యూలకు ఎంపికైన వారికి మెడికల్ టెస్ట్ నిర్వహిస్తారు, ఆ తరువాత ఫైనల్ సెలక్షన్ ఉంటుంది.

    శిక్షణ మరియు స్టైఫండ్ వివరాలు

    ఉద్యోగానికి ఎంపికైన వారికి 2026 జనవరి నుంచి డెహ్రాడూన్‌లోని ఇండియన్ మిలటరీ అకాడమీ (IMA)లో సుమారు ఒక ఏడాదిపాటు ఇంటెన్సివ్ ట్రైనింగ్ ఉంటుంది. ట్రైనింగ్ సమయంలో అభ్యర్థులకు నెలకు రూ. 56,100 స్టైఫండ్ లభిస్తుంది.

    జీతం మరియు ఇతర ప్రయోజనాలు

    ట్రైనింగ్ పూర్తయిన తరువాత, లెఫ్టినెంట్ హోదాలో పే లెవెల్ 10 కింద బేసిక్ శాలరీ రూ. 56,100, మిలటరీ సర్వీస్ పే రూ. 15,500 మరియు డియర్‌నెస్ అలవెన్సులు, ఇతర ప్రయోజనాలు లభిస్తాయి. మొత్తం మీద జీతం రూ. 1 లక్ష కంటే ఎక్కువే ఉంటుంది.

    కెరీర్ పురోగతి మరియు పదవీ విరమణ ప్రయోజనాలు

    కెరీర్ పురోగతి విషయానికి వస్తే, అభ్యర్థులు త్వరితగతిన ఉన్నత పదవులు పొందవచ్చు:

    • రెండేళ్లు సర్వీస్ తరువాత: కెప్టెన్‌గా పదోన్నతి.
    • ఆరేళ్ళ సర్వీస్ తరువాత: మేజర్‌గా పదోన్నతి.
    • 13 సంవత్సరాల తరువాత: లెఫ్టినెంట్ కల్నల్‌గా పదోన్నతి.

    ఉద్యోగ పదవీ విరమణ తరువాత జీవితకాల పెన్షన్ ప్రయోజనాలు పొందవచ్చు. దేశ రక్షణలో పాలుపంచుకోవాలనుకునే ఇంజినీరింగ్ అభ్యర్థులకు ఇదో మంచి అవకాశం.

    విభాగాల వారీగా ఖాళీల వివరాలు

    మొత్తం ఖాళీలు: 30

    • సివిల్ ఇంజినీరింగ్ మరియు సంబంధిత శాఖలు: 8 పోస్టులు
    • కంప్యూటర్ సైన్స్ ఇంజినీరింగ్ / కంప్యూటర్ టెక్నాలజీ / MSc కంప్యూటర్ సైన్స్: 6 పోస్టులు
    • ఎలక్ట్రికల్ / ఎలక్ట్రానిక్ ఇంజినీరింగ్ మరియు సంబంధిత శాఖలు: 2 పోస్టులు
    • ఎలక్ట్రానిక్స్ మరియు సంబంధిత శాఖలు: 6 పోస్టులు
    • మెకానికల్ ఇంజినీరింగ్ మరియు సంబంధిత శాఖలు: 6 పోస్టులు
    • ఇతర ఇంజినీరింగ్ విభాగాలు: 2 పోస్టులు
  • తక్కువ ధరలో ఎక్కువ మైలేజ్ ఇచ్చే కొత్త సీఎన్‌జీ కారు: పూర్తి వివరాలు

    తక్కువ ధరలో ఎక్కువ మైలేజ్ ఇచ్చే కొత్త సీఎన్‌జీ కారు: పూర్తి వివరాలు

    Citroen C3 CNG: ఇండియన్ మార్కెట్లో ఎలక్ట్రిక్ కార్లకు, సీఎన్‌జీ కార్లకు డిమాండ్ భారీగా పెరుగుతోంది. దీనిని దృష్టిలో ఉంచుకునే.. దాదాపు అన్ని కంపెనీలు తమ కార్లను, బైకులను ఈ విభాగాల్లో లాంచ్ చేస్తున్నాయి. ఈ తరుణంలో ఫ్రెంచ్ వాహన తయారీ సంస్థ ‘సిట్రోయెన్’ (Citroen) తన సీ3 కారును సీఎన్‌జీ కిట్‌తో లాంచ్ చేసింది. ఈ కొత్త సీఎన్‌జీ కారు ధరలు, మైలేజ్ వంటి ఆసక్తికరమైన వివరాలు ఇక్కడ చూసేద్దాం..

    సిట్రోయెన్ సీ3 సీఎన్‌జీ: పూర్తి వివరాలు

    దేశీయ మార్కెట్లో ఫ్రెంచ్ కార్ల తయారీ దిగ్గజం సిట్రోయెన్ తన ప్రముఖ C3 మోడల్‌ను CNG వేరియంట్‌లో విడుదల చేసింది. దీనికి సంబంధించిన ముఖ్యమైన సమాచారం క్రింద ఇవ్వబడింది.

    వేరియంట్లు & ధరలు

    కొత్త సిట్రోయెన్ సీ3 సీఎన్‌జీ మొత్తం నాలుగు వేరియంట్లలో అందుబాటులో ఉంటుంది. అవి:

    • లైవ్
    • ఫీల్
    • ఫీల్ (ఓ)
    • షైన్

    వీటి ధరలు రూ. 7.16 లక్షల నుంచి రూ. 9.24 లక్షల (ఎక్స్ షోరూమ్) మధ్య ఉన్నాయి. అంటే దీని ధర స్టాండర్డ్ మోడల్ కంటే కూడా రూ. 93,000 ఎక్కువని తెలుస్తోంది. కంపెనీ ఈ కారుపై 3 సంవత్సరాలు లేదా 1 లక్ష కిలోమీటర్ల వారంటీ అందిస్తుంది.

    డిజైన్ మరియు ఫీచర్లు

    చూడటానికి సాధారణ సిట్రోయెన్ సీ3 మాదిరిగా ఉన్నప్పటికీ.. సీ3 సీఎన్‌జీ అదే లైటింగ్ సెటప్, ఇంటీరియర్ డిజైన్ మరియు ఫీచర్స్ కలిగి ఉంటుంది. అయితే ఇది సీఎన్‌జీ కారు అని ప్రత్యేకంగా తెలియడానికి CNG బ్యాడ్జెస్ వంటివి అక్కడక్కడా కనిపిస్తాయి. ఇందులోని సీఎన్‌జీ ట్యాంక్ కెపాసిటీ 55 లీటర్ల వరకు ఉంటుంది.

    మైలేజ్

    సిట్రోయెన్ సీ3 సీఎన్‌జీ కారు.. ఒక కేజీ సీఎన్‌జీతో 28.1 కిమీ మైలేజ్ అందిస్తుందని కంపెనీ పేర్కొంది. దీన్ని బట్టి చూస్తే.. పెట్రోల్ సిట్రోయెన్ సీ3 కారు కంటే కూడా సీఎన్‌జీ సీ3 మైలేజ్ కొంత ఎక్కువే అని తెలుస్తోంది. కాబట్టి ఎక్కువ మైలేజ్ కావాలనుకునే వారికి ఈ మోడల్ మంచి ఎంపిక అవుతుంది. ప్రస్తుతం ఈ కారు బ్రాండ్ యొక్క అధీకృత డీలర్‌షిప్‌లలో అందుబాటులో ఉంది.

    సీఎన్‌జీ కార్లకు డిమాండ్ ఎందుకు పెరుగుతోంది?

    నిజానికి భారతదేశంలో ఒకప్పుడు డీజిల్ కార్లకు డిమాండ్ ఉండేది. ఆ తరువాత పెట్రోల్ కార్లకు.. ఇప్పుడు ఎలక్ట్రిక్ లేదా సీఎన్‌జీ వెహికల్స్ వైపు వినియోగదారులు మొగ్గు చూపుతున్నారు. కాలాన్ని బట్టి మనిషి కూడా కొత్తదనాన్ని కోరుకుంటున్నాడు. అంతే కాకుండా సీఎన్‌జీ కార్ల మైలేజ్ పెట్రోల్ కార్ల మైలేజ్ కంటే కూడా ఎక్కువే. సాధారణ లేదా మధ్యతరగతి ప్రజలు ఎవరైనా.. ఎక్కువ మైలేజ్ ఇచ్చే కార్లనే ఉపయోగించడానికి ఆసక్తి చూపుతుంటారు. ఈ కారణంగానే మార్కెట్లో లాంచ్ అవుతున్న సీఎన్‌జీ కార్ల సంఖ్య పెరుగుతోంది, కొనుగోలుదారులు కూడా ఎక్కువవుతున్నారు.

    సీఎన్‌జీ వాహనాల భవిష్యత్తు ఎలా ఉండనుంది?

    ప్రస్తుతం ఇండియన్ మార్కెట్లో చాలా కంపెనీలు సీఎన్‌జీ కార్లను లాంచ్ చేశాయి. మరికొన్ని కంపెనీలు లాంచ్ చేయడానికి సిద్ధమవుతున్నాయి. ఇప్పుడు కేవలం కార్లు మాత్రమే కాకుండా బైకులు కూడా సీఎన్‌జీ రూపంలో మార్కెట్లో అందుబాటులో ఉన్నాయి. స్కూటర్లను లాంచ్ చేయడానికి కూడా కొన్ని సంస్థలు సన్నద్ధమవుతున్నాయి. ఇవన్నీ గమనిస్తుంటే.. రాబోయే రోజుల్లో సీఎన్‌జీ వాహనాలకు డిమాండ్ మరింత పెరిగే అవకాశం ఉందని స్పష్టమవుతోంది.

  • పసిడి ప్రియులకు శుభవార్త! రూ.2130 తగ్గిన గోల్డ్ రేటు: ఈ రోజు ధరలు ఇవే

    పసిడి ప్రియులకు శుభవార్త! రూ.2130 తగ్గిన గోల్డ్ రేటు: ఈ రోజు ధరలు ఇవే

    Gold and Silver Price Today: భారతదేశంలో బంగారం ధరలు రోజురోజుకి క్రమంగా తగ్గుతున్న సూచనలు స్పష్టంగా కనిపిస్తున్నాయి. ఈ నెల ప్రారంభంలో భారీగా పెరిగిన పసిడి ధరలు, ఆ తరువాత ఒడిదుడుకులకు లోనవుతూ, గత రెండు రోజులుగా ఊహించని రీతిలో తగ్గాయి. ఈ రోజు (మే 15) బంగారం ధర గరిష్టంగా 2130 రూపాయల వరకు తగ్గింది. ఈ కథనంలో దేశంలోని ప్రధాన నగరాల్లో బంగారం ధరలు, అలాగే వెండి ధరల వివరాలను స్పష్టంగా తెలుసుకుందాం.

    హైదరాబాద్, చెన్నై, ముంబై, బెంగళూరులలో నేటి బంగారం ధరలు

    లక్ష రూపాయల మార్కును దాటిన బంగారం ధర, ఇప్పుడు ఆంధ్రప్రదేశ్ మరియు తెలంగాణ రాష్ట్రాలతో పాటు చెన్నై, ముంబై, మరియు బెంగళూరు వంటి ప్రధాన నగరాల్లో కూడా వరుసగా రెండో రోజు పతనమైంది. ఈ నగరాల్లో నేటి బంగారం ధరల వివరాలు:

    • 10 గ్రాముల 22 క్యారెట్ల బంగారం ధర: రూ. 1950 తగ్గి, రూ. 86,100 వద్ద స్థిరపడింది.
    • 10 గ్రాముల 24 క్యారెట్ల బంగారం ధర: రూ. 2130 తగ్గి, రూ. 93,930 వద్ద ఉంది.

    నిన్నటి ధరలతో పోలిస్తే ఈరోజు ధరలు గణనీయంగా తగ్గినట్లు స్పష్టమవుతోంది.

    ఢిల్లీలో బంగారం ధరల పరిస్థితి

    దేశంలోని ఇతర నగరాలతో పోలిస్తే, ఢిల్లీలో బంగారం ధరలు సాధారణంగా కొంత ఎక్కువగా ఉంటాయి. అయినప్పటికీ, దేశ రాజధాని నగరంలో కూడా బంగారం ధరలు తగ్గుముఖం పట్టాయి:

    • 10 గ్రాముల 22 క్యారెట్ల బంగారం ధర: రూ. 1950 తగ్గి, రూ. 86,250 వద్ద ఉంది.
    • 10 గ్రాముల 24 క్యారెట్ల బంగారం ధర: రూ. 2130 తగ్గి, రూ. 94,080 వద్ద నిలిచింది.

    నిన్న స్వల్పంగా తగ్గిన బంగారం ధర, ఈరోజు మరింత క్షీణించింది.

    వెండి ధరలు ఎలా ఉన్నాయంటే?

    బంగారం ధరల బాటలోనే వెండి ధరలు కూడా గణనీయంగా తగ్గాయి. నిన్న కిలో వెండి ధర రూ. 1,09,000 ఉండగా, ఈరోజు రూ. 1000 తగ్గి, రూ. 1,08,000 వద్దకు చేరింది. ఈ ధరలు తెలుగు రాష్ట్రాలతో పాటు, ముంబై, చెన్నై, మరియు బెంగళూరు వంటి నగరాలకు వర్తిస్తాయి. అయితే, ఢిల్లీలో కిలో వెండి ధర రూ. 900 తగ్గింది. దీంతో అక్కడ కిలో వెండి ధర రూ. 97,000 వద్దకు చేరింది.

    బంగారం ధరల తగ్గుదలకు కారణాలు మరియు కొనుగోలు దారులకు సూచనలు

    అంతర్జాతీయ మార్కెట్లో ఏర్పడుతున్న మార్పుల కారణంగానే బంగారం ధరలు భారీగా తగ్గుతున్నట్లు తెలుస్తోంది. ఈ ధరలు ఇంకా తగ్గే అవకాశం ఉందని నిపుణులు సైతం చెబుతున్నారు. అమెరికా – చైనా దేశాలు ప్రతీకార సుంకాలను తగ్గించుకోవడం కూడా బంగారం ధరలు తగ్గడానికి ఒక కారణమని తెలుస్తోంది. 90 రోజుల వరకు కొత్త సుంకాలు ఆ రెండు దెసలలో అమలులో ఉంటాయి. కాబట్టి గోల్డ్ రేటు కొంతవరకు తగ్గుముఖం పట్టిందనిపిస్తోంది. ఇక్కడ గుర్తుంచుకోవలసిన విషయం ఏమిటంటే.. బంగారం ధరలు తగ్గినప్పుడే పసిడి ప్రియులు కొనుగోలు చేయడం ఉత్తమం. కాబట్టి ధరలు తగ్గుతున్నప్పుడు.. బంగారం కొనాలనే ఆలోచన ఉన్నవారు వెంటనే కొనుగోలు చేసుకోవడం ఉత్తమం.

  • మొదలైన సరస్వతి పుష్కరాలు: తెలుసుకోవలసిన విషయాలు ఇవే..

    మొదలైన సరస్వతి పుష్కరాలు: తెలుసుకోవలసిన విషయాలు ఇవే..

    Saraswati Pushkaralu in Telangana: తెలంగాణ ప్రభుత్వం ఎంతో ప్రతిష్టాత్మకంగా నిర్వహిస్తున్న సరస్వతి నది పుష్కరాలు ఈ రోజు (మే 15) నుంచి అంగరంగ వైభవంగా ప్రారంభమయ్యాయి. ఈ పవిత్రమైన కార్యక్రమానికి ముఖ్యమంత్రి శ్రీ రేవంత్ రెడ్డి గారు కుటుంబ సమేతంగా హాజరై ప్రత్యేక పూజలు నిర్వహించనున్నారు. పుష్కరాల ప్రాంగణంలో నూతనంగా ఏర్పాటు చేసిన సరస్వతీ దేవి విగ్రహావిష్కరణతో పాటు, భక్తుల సౌకర్యార్థం నిర్మించిన గదుల సముదాయాన్ని కూడా ఆయన ప్రారంభించనున్నారు. కాళేశ్వర క్షేత్రంలో జరుగుతున్న ఈ పుష్కరాల్లో పాల్గొంటున్న మొదటి ముఖ్యమంత్రిగా రేవంత్ రెడ్డి నిలవడం ఒక విశేషం. ఈ నెల 26వ తేదీ వరకు కొనసాగే ఈ పుష్కరాలకు సంబంధించిన మరిన్ని వివరాలు ఇప్పుడు చూద్దాం.

    పుష్కరాల ప్రారంభం & పూజా కార్యక్రమాలు

    తెలంగాణలోని జయశంకర్ భూపాలపల్లి జిల్లా, పవిత్ర కాళేశ్వరం క్షేత్రంలోని త్రివేణి సంగమం (గోదావరి, ప్రాణహిత, మరియు అంతర్వాహినిగా ప్రవహించే సరస్వతి నదుల కలయిక) వద్ద గురువారం ఉదయం 5:44 గంటలకు సరస్వతి ఘాట్ వద్ద శ్రీ గురు మదనానంద సరస్వతి పీఠాధిపతి శ్రీ మాధవానంద స్వామి వారు ప్రత్యేక పూజలతో పుష్కరాలను లాంఛనంగా ప్రారంభించారు. పుష్కరాల సమయంలో ప్రతి రోజు సాయంత్రం 6:45 గంటల నుంచి 7:35 గంటల వరకు సరస్వతి నవరత్న మాల హారతి కార్యక్రమం అత్యంత భక్తిశ్రద్ధలతో జరగనుంది.

    భక్తుల సౌకర్యార్థం ప్రభుత్వ ఏర్పాట్లు

    రాష్ట్ర ప్రభుత్వం ఈ పుష్కరాల నిర్వహణ కోసం సుమారు రూ. 35 కోట్లు ఖర్చు చేసినట్లు తెలుస్తోంది. సరస్వతి నది పుష్కరాలకు విచ్చేసే లక్షలాది భక్తుల కోసం తాత్కాలిక టెంట్ సిటీని ఏర్పాటు చేశారు. దీంతో పాటు, భక్తులకు ఎటువంటి అసౌకర్యం కలగకుండా తాగునీటి సౌకర్యం, స్నానఘట్టాల నిర్మాణం, వాహనాల పార్కింగ్ వంటి వాటికోసం కూడా ప్రత్యేక ఏర్పాట్లు పూర్తి చేశారు. పుష్కరాలకు ప్రతి రోజు సుమారు ఒక లక్ష నుంచి లక్షన్నర మంది భక్తులు తరలివచ్చే అవకాశం ఉందని అధికారులు అంచనా వేస్తున్నారు.

    పర్యావరణ పరిరక్షణకు చర్యలు

    పుష్కరాల సమయంలో నదీ జలాలు కలుషితం కాకుండా అన్ని రకాల చర్యలు తీసుకోవాలని పర్యావరణ శాఖ మంత్రి శ్రీమతి కొండా సురేఖ గారు సంబంధిత అధికారులను ఆదేశించారు. ఈ మేరకు వారు పుష్కరాలకు సంబంధించిన పోస్టర్లను కూడా బుధవారం ఆవిష్కరించారు. 2013లో ఉమ్మడి ఆంధ్రప్రదేశ్ ప్రభుత్వం ఈ పుష్కరాలను నిర్వహించగా, ఆ తరువాత తెలంగాణ రాష్ట్రంలో సరస్వతి పుష్కరాలు జరగడం ఇదే ప్రప్రథమం.

    పుష్కరాల చారిత్రక ప్రాముఖ్యత

    ప్రతి 12 సంవత్సరాలకు ఒకసారి జరిగే ఈ సరస్వతి నది పుష్కరాలకు అశేష జనవాహిని తరలివస్తుంది. భూపాలపల్లి జిల్లా మహదేవపురం మండలంలోని కాళేశ్వరం వద్ద, మహారాష్ట్ర మీదుగా ప్రవహించే గోదావరి నదిలో ప్రాణహిత నది కలుస్తుంది. ఈ రెండు నదులు కలిసే పవిత్ర ప్రదేశంలోనే అంతర్వాహినిగా సరస్వతి నది ఉద్భవిస్తుందని ప్రతీతి. ఇక్కడ ప్రసిద్ధ మహా సరస్వతి ఆలయంతో పాటు, కాళేశ్వర ముక్తేశ్వర ఆలయం కూడా కొలువై ఉంది. సరస్వతి నది పుష్కరాలను కేవలం తెలంగాణలోనే కాకుండా, దేశంలోని ఇతర రాష్ట్రాల్లోనూ భక్తిశ్రద్ధలతో నిర్వహిస్తారు.

  • బంగారం కొనడానికి ఇదే మంచి సమయం!.. అమాంతం తగ్గుతున్న ధరలు

    బంగారం కొనడానికి ఇదే మంచి సమయం!.. అమాంతం తగ్గుతున్న ధరలు

    Gold and Silver Price: బంగారం ధరలు ఎప్పుడు తగ్గుతాయా, ఎప్పుడు కొనుగోలు చేద్దామా అని ఎదురుచూసే వారికి ఇది నిజంగా శుభవార్త. పసిడి ధరలు (Gold Prices) మే 14వ తేదీన మరోసారి తగ్గుముఖం పట్టాయి. దీంతో దేశంలోని దాదాపు అన్ని ప్రధాన నగరాల్లోనూ గోల్డ్ రేటు తగ్గింది. నిన్న కొంత పెరిగిన ధరలు, ఈరోజు స్వల్పంగా తగ్గడం గమనార్హం. ఈ కథనంలో, తెలుగు రాష్ట్రాలు మరియు దేశ రాజధాని ఢిల్లీలో బంగారం, వెండి ధరల తాజా వివరాలు (Gold and Silver Price Today) వివరంగా తెలుసుకుందాం.

    హైదరాబాద్, విజయవాడలో నేటి బంగారం ధరలు

    తెలుగు రాష్ట్రాల్లోని ప్రధాన నగరాలైన హైదరాబాద్ మరియు విజయవాడలలో బంగారం ధరలు ఈరోజు (మే 14) ఇలా ఉన్నాయి:

    • 22 క్యారెట్ల 10 గ్రాముల బంగారం ధర: రూ. 500 తగ్గి, రూ. 88,050 వద్ద స్థిరపడింది.
    • 24 క్యారెట్ల 10 గ్రాముల బంగారం ధర: రూ. 540 తగ్గి, రూ. 96,060 వద్ద నిలిచింది.

    ఇదే విధమైన ధరల తగ్గుదల గుంటూరు, ప్రొద్దుటూరు, విజయనగరం వంటి నగరాలతో పాటు దేశంలోని ఇతర ముఖ్య నగరాలైన ముంబై, బెంగళూరు, చెన్నైలలో కూడా కొనసాగుతోంది.

    దేశ రాజధాని ఢిల్లీలో పసిడి పతనం (Gold Rate in Delhi)

    దేశ రాజధాని ఢిల్లీలో కూడా బంగారం ధరలు ఈ రోజు (బుధవారం, మే 14) తగ్గాయి. ఇక్కడ తాజా రేట్లు క్రింది విధంగా ఉన్నాయి:

    • 22 క్యారెట్ల 10 గ్రాముల బంగారం ధర: రూ. 500 తగ్గి, రూ. 88,200 వద్ద ఉంది.
    • 24 క్యారెట్ల 10 గ్రాముల బంగారం ధర: రూ. 540 తగ్గి, రూ. 96,210 వద్ద కొనసాగుతోంది.

    వెండి ధరలు ఎలా ఉన్నాయంటే? (Silver Price Update)

    బంగారంతో పాటు వెండి ధరలు కూడా వినియోగదారులకు ముఖ్యమైనవే. దేశంలోని వివిధ ప్రాంతాల్లో వెండి ధరలు ఇలా ఉన్నాయి:

    ప్రధాన నగరాల్లో కేజీ వెండి ధర

    తెలుగు రాష్ట్రాల్లో (హైదరాబాద్, విజయవాడ), అలాగే ముంబై, చెన్నై మరియు బెంగళూరులో కేజీ వెండి ధర రూ. 1,09,000 వద్ద స్థిరంగా ఉంది.

    ఢిల్లీలో కేజీ వెండి ధర

    అయితే, దేశ రాజధాని ఢిల్లీలో మాత్రం కేజీ వెండి ధర రూ. 97,900 వద్ద ఉంది. దీనిని బట్టి చూస్తే, ఢిల్లీలో బంగారం ధరలు ఇతర నగరాలతో పోలిస్తే స్వల్పంగా ఎక్కువగా ఉన్నప్పటికీ, వెండి ధరలు మాత్రం కొంత తక్కువగానే ఉన్నాయని స్పష్టమవుతోంది.

    బంగారం ధరలు తగ్గడానికి కారణం ఏమిటి?

    దేశంలో బంగారం ధరలు తగ్గడానికి అంతర్జాతీయ పరిణామాలు ప్రధాన కారణంగా కనిపిస్తున్నాయి. ముఖ్యంగా, అమెరికా మరియు చైనా మధ్య కుదిరిన వాణిజ్య సుంకాల ఒప్పందం (Tariff Deal) ఈ తగ్గుదలకు దోహదపడినట్లు తెలుస్తోంది.

    అమెరికా-చైనా టారిఫ్ డీల్ వివరాలు:

    • ప్రారంభంలో, అమెరికా ఉత్పత్తులపై చైనా 125 శాతం వరకు సుంకాలను విధించింది.
    • దీనికి ప్రతిగా, చైనా ఉత్పత్తులపై అమెరికా ఏకంగా 145 శాతం వరకు సుంకాలను విధించింది.
    • ఇటీవల ఇరు దేశాల మధ్య కుదిరిన ఒక ఒప్పందం ప్రకారం, ప్రతీకార సుంకాలను 115 శాతం మేర తగ్గించుకున్నాయి.
    • అంటే, ఇప్పుడు చైనా అమెరికాపై విధించే సుంకం 10 శాతానికి (125% – 115%) తగ్గింది.
    • అదేవిధంగా, అమెరికా కూడా చైనాపై విధించే సుంకం 30 శాతానికి (145% – 115%) చేరింది.

    అమెరికా మరియు చైనా కుదుర్చుకున్న ఈ కొత్త సుంకాలు 90 రోజుల పాటు అమలులో ఉంటాయి. ఈ రెండు అగ్రదేశాల మధ్య కుదిరిన ఒప్పందం కారణంగా స్టాక్ మార్కెట్లు లాభాల బాట పట్టాయి, ఇది బంగారం వంటి సురక్షిత పెట్టుబడులపై ఒత్తిడి తగ్గించి, ధరలు తగ్గుముఖం పట్టడానికి దారితీసిందని ఆర్థిక నిపుణులు విశ్లేషిస్తున్నారు. రానున్న రోజుల్లో బంగారం ధరలు మరింత తగ్గే అవకాశం ఉందని కూడా వారు అంచనా వేస్తున్నారు.

  • లాంచ్‌కు సిద్దమైన 2025 ఆల్ట్రోజ్ పేస్‌లిఫ్ట్ ఇదే.. పూర్తి వివరాలు

    లాంచ్‌కు సిద్దమైన 2025 ఆల్ట్రోజ్ పేస్‌లిఫ్ట్ ఇదే.. పూర్తి వివరాలు

    2025 Tata Altroz Facelift: దేశీయ వాహన తయారీ దిగ్గజం టాటా మోటార్స్, ఇప్పటికే ఇండియన్ మార్కెట్లో తన సరసమైన కారు ‘ఆల్ట్రోజ్’ను విజయవంతంగా విక్రయిస్తోంది. ఇప్పుడు, ఈ ఆల్ట్రోజ్ శ్రేణిలో అప్‌డేటెడ్ మోడల్ లేదా ఫేస్‌లిఫ్ట్ వెర్షన్ (2025 ఆల్ట్రోజ్) లాంచ్ చేయడానికి సిద్ధమవుతోంది. ఈ నెల 22న అధికారికంగా భారతీయ విఫణిలో అడుగెట్టనున్న ఈ సరికొత్త ఆల్ట్రోజ్ వివరాలు, లాంచ్‌కు ముందే కొన్ని ఆసక్తికరమైన అంశాలతో వెలుగులోకి వచ్చాయి. దీనికి సంబంధించిన మరిన్ని వివరాలను ఇక్కడ వివరంగా తెలుసుకుందాం.

    2025 టాటా ఆల్ట్రోజ్

    2020లో మార్కెట్లోకి ప్రవేశపెట్టిన టాటా ఆల్ట్రోజ్ కారు, మొదటి నుంచే అద్భుతమైన అమ్మకాలు సాధిస్తూ వినియోగదారుల ఆదరణ పొందింది. మారుతున్న కాలానికి అనుగుణంగా, మార్కెట్‌లోని పోటీని తట్టుకుని, కస్టమర్లను ఆకట్టుకోవడానికి కంపెనీ ఈ కారును ఎప్పటికప్పుడు అప్డేట్ చేస్తూనే ఉంది. ఇందులో భాగంగానే, టర్బో పెట్రోల్ మరియు CNG మోడల్స్ కూడా లాంచ్ చేసి తన పోర్ట్‌ఫోలియోను విస్తరించింది. ఇప్పుడు 2025 ఆల్ట్రోజ్ ఫేస్‌లిఫ్ట్ విడుదలతో మరో ముందడుగు వేయనుంది.

    డిజైన్ అప్డేట్స్

    సరికొత్త 2025 ఆల్ట్రోజ్ చూడటానికి దాదాపు ప్రస్తుతం ఉన్న మోడల్ మాదిరిగానే ఉన్నప్పటికీ, కొన్ని కీలకమైన మార్పులతో రానుంది.

    ఎక్స్‌టీరియర్ అప్‌డేట్స్

    • ఈ కారులోని హాలోజన్ ప్రొజెక్టర్ హెడ్‌ల్యాంప్‌ల స్థానంలో, ఎంబెడెడ్ ఎల్ఈడీ డీఆర్‌ఎల్‌లతో కూడిన కొత్త ఎల్ఈడీ ప్రొజెక్టర్ యూనిట్స్ అమర్చారు.
    • క్లోజ్డ్ గ్రిల్ షేప్ సరికొత్త ఫినిషింగ్ పొందుతుంది.
    • బంపర్ డిజైన్ కూడా మరింత ఆకర్షణీయంగా తీర్చిదిద్దారు.
    • వెనుక వైపు ఇన్ఫినిటీ ఎల్ఈడీ కనెక్టెడ్ టెయిల్‌ల్యాంప్‌లతో జతచేయబడిన బ్లాక్ అవుట్ టెయిల్‌గేట్ ప్రత్యేక ఆకర్షణగా నిలుస్తుంది.

    ఇంటీరియర్

    హ్యుందాయ్ ఐ20 మరియు మారుతి సుజుకి బాలెనొ వంటి ప్రత్యర్థులకు గట్టి పోటీనిచ్చేలా, టాటా ఆల్ట్రోజ్ అప్డేటెడ్ డ్యాష్‌బోర్డ్ మరియు అనేక నూతన ఫీచర్లను పొందుతుంది. ఏసీ కంట్రోల్స్ మరియు టాప్ మోడళ్లలో 10.25 ఇంచెస్ డిజిటల్ ఇన్‌స్ట్రుమెంట్ క్లస్టర్‌తో సహా అనేక అప్డేట్స్ ఉన్నాయి.

    ఇంజన్ ఆప్షన్స్

    సరికొత్త ఆల్ట్రోజ్ పెట్రోల్, డీజిల్ మరియు CNG పవర్‌ట్రెయిన్ ఆప్షన్స్‌తో వస్తుందని సమాచారం. అంతే కాకుండా, టర్బో పెట్రోల్ ఇంజిన్ కూడా పొందే అవకాశం ఉందని తెలుస్తోంది. అయితే, దీనికి సంబంధించిన అధికారిక ప్రకటన ఇంకా వెలువడలేదు.

    వేరియంట్లు

    2025 టాటా ఆల్ట్రోజ్ ఐదు ప్రధాన వేరియంట్లలో లాంచ్ అవుతుందని సమాచారం. అవి:

    • స్మార్ట్ (Smart)
    • ప్యూర్ (Pure)
    • క్రియేటివ్ (Creative)
    • అకంప్లిష్డ్ ఎస్ (Accomplished S)
    • అకంప్లిష్డ్ ప్లస్ ఎస్ (Accomplished Plus S)

    కంపెనీ వీటి ధరలను లాంచ్ సమయంలో అధికారికంగా వెల్లడించే అవకాశం ఉంది. బుకింగ్స్ ఎప్పుడు ప్రారంభమవుతాయనేది కూడా త్వరలోనే తెలియజేస్తారు.

    వేరియంట్స్ వారీగా ఫీచర్స్

    ➤ స్మార్ట్ ట్రిమ్:

    • ఆరు ఎయిర్‌బ్యాగ్‌లు
    • ఎలక్ట్రానిక్ స్టెబిలిటీ ప్రోగ్రామ్ (ESP)
    • ఎల్ఈడీ టెయిల్ లాంప్‌లు
    • ప్రొజెక్టర్ హెడ్‌ల్యాంప్‌లు
    • ఫ్లష్ సెట్టింగ్ ఫ్రంట్ డోర్ హ్యాండిల్స్

    ➤ ప్యూర్ ట్రిమ్:

    • 7 ఇంచెస్ టచ్‌స్క్రీన్ ఇన్ఫోటైన్‌మెంట్ సిస్టమ్
    • ఆటో ఫోల్డ్ వింగ్ మిర్రర్స్
    • ఆటో క్లైమేట్ కంట్రోల్
    • ఎల్ఈడీ హెడ్‌ల్యాంప్స్
    • రివర్స్ కెమెరా
    • క్రూయిజ్ కంట్రోల్
    • సన్‌రూఫ్ (ఆప్షనల్)

    ➤ క్రియేటివ్ ట్రిమ్:

    • 360 డిగ్రీ కెమెరా
    • 10.25 ఇంచెస్ టచ్‌స్క్రీన్ ఇన్ఫోటైన్‌మెంట్ సిస్టమ్
    • కీలెస్ గో
    • రియర్ ఏసీ వెంట్స్
    • యాంబియంట్ లైటింగ్
    • సన్‌రూఫ్ (ఆప్షనల్)

    ➤ అకంప్లిష్డ్ ట్రిమ్:

    • 16 ఇంచెస్ అల్లాయ్ వీల్స్
    • 7.0 ఇంచెస్ డిజిటల్ ఇన్‌స్ట్రుమెంట్ క్లస్టర్
    • ఎల్ఈడీ ఫాగ్ లాంప్స్
    • వైర్‌లెస్ స్మార్ట్‌ఫోన్ ఛార్జింగ్
    • ఇన్ఫినిటీ ఎల్ఈడీ టెయిల్‌ల్యాంప్స్
    • సన్‌రూఫ్
    • కాంట్రాస్ట్ ఫినిష్డ్ రూఫ్

    ➤ అకంప్లిష్డ్ ప్లస్ ఎస్ ట్రిమ్:

    • 10.25 ఇంచెస్ డిజిటల్ ఇన్‌స్ట్రుమెంట్ క్లస్టర్
    • కనెక్టెడ్ కార్ టెక్నాలజీ
    • బ్లైండ్ స్పాట్ మానిటరింగ్
    • ఎయిర్ ప్యూరిఫైయర్
    • మరిన్ని టాప్-ఎండ్ ఫీచర్లు
  • కొత్త ఇంట్లోకి అనసూయ.. గృహప్రవేశం ఫోటోలు చూశారా?

    కొత్త ఇంట్లోకి అనసూయ.. గృహప్రవేశం ఫోటోలు చూశారా?

    Anasuya Bharadwaj New House: ప్రముఖ యాంకర్ మరియు సినీ నటి అనసూయ భరద్వాజ్ గురించి తెలుగు ప్రేక్షకులకు ప్రత్యేక పరిచయం అక్కర్లేదు. ‘జబర్దస్త్’ కామెడీ షో ద్వారా బుల్లితెరపై ఓ వెలుగు వెలిగిన ఈ నటి, ఒకవైపు టీవీ కార్యక్రమాలతో అలరిస్తూనే, మరోవైపు సినిమాల్లో తనదైన నటనతో మెప్పిస్తూ ఎంతో బిజీగా గడుపుతున్నారు. తాజాగా, అనసూయ తన జీవితంలో మరో ముఖ్యమైన ఘట్టాన్ని చేరుకున్నారు – ఆమె తన కొత్త ఇంట్లోకి అడుగుపెట్టారు. ఈ గృహప్రవేశానికి సంబంధించిన ఫోటోలు ప్రస్తుతం సోషల్ మీడియాలో వైరల్ అవుతున్నాయి.

    ‘శ్రీరామ సంజీవిని’ – అనసూయ కలల సౌధం

    తన నూతన గృహప్రవేశ వేడుకకు సంబంధించిన ఫోటోలను అనసూయ తన సోషల్ మీడియా ఖాతాలో పంచుకున్నారు. “ఆ శ్రీరామాంజనేయ కృపతో.. మా తల్లిదండ్రుల కృపతో.. మీ అందరి ప్రేమతో.. మా జీవితంలోని మరో అధ్యాయం” అంటూ తన ఆనందాన్ని వ్యక్తం చేశారు. అంతేకాకుండా, తమ కొత్త ఇంటికి ‘శ్రీరామ సంజీవిని’ అని పేరుపెట్టినట్లు కూడా అనసూయ వెల్లడించారు. ఈ వార్త తెలియగానే అభిమానులు, శ్రేయోభిలాషులు ఆమెకు శుభాకాంక్షలు తెలుపుతూ కామెంట్లు పెడుతున్నారు.

    సాంప్రదాయబద్ధంగా జరిగిన గృహప్రవేశ కార్యక్రమాలు

    అనసూయ తన భర్త సుశాంక్ భరద్వాజ్ మరియు పిల్లలతో కలిసి శాస్త్రోక్తంగా గృహ ప్రవేశ కార్యక్రమాల్లో పాల్గొన్నారు. తెలుగు సాంప్రదాయం ప్రకారం, ఇంట్లోకి ప్రవేశించేటప్పుడు నిర్వహించాల్సిన పూజా కార్యక్రమాలను భక్తిశ్రద్ధలతో పూర్తి చేసినట్లు తెలుస్తోంది. ఈ వేడుకకు అనసూయ కుటుంబ సభ్యులు మరియు అత్యంత సన్నిహితులు మాత్రమే హాజరైనట్లు సమాచారం. ఇల్లు చూడటానికి చాలా విశాలంగా, అద్భుతంగా ఉందని, అనసూయ అభిరుచులకు అనుగుణంగా ఆధునిక ఇంటీరియర్‌తో తీర్చిదిద్దారని తెలుస్తోంది.

    నటి అనసూయ భరద్వాజ్ – కెరీర్ మరియు వ్యక్తిగత విశేషాలు

    1985 మే 15న జన్మించిన అనసూయ భరద్వాజ్, టీవీ యాంకర్‌గా తన కెరీర్‌ను ప్రారంభించారు. 2016లో ‘క్షణం’ సినిమాతో తెలుగు సినీ పరిశ్రమలోకి అడుగుపెట్టి, నటిగా తన ప్రస్థానాన్ని మొదలుపెట్టారు. ఆ తర్వాత ‘సోగ్గాడే చిన్ని నాయన’ చిత్రంలో కీలక పాత్రలో కనిపించారు.

    సినిమాల్లో మైలురాళ్లు: రంగమ్మత్త నుండి దాక్షాయణి వరకు

    ‘రంగస్థలం’ సినిమాలో రంగమ్మత్తగా, ‘పుష్ప: ది రైజ్’ సినిమాలో దాక్షాయణిగా ఆమె పోషించిన పాత్రలు విమర్శకుల ప్రశంసలతో పాటు ప్రేక్షకుల మన్ననలు పొందాయి. ఈ పాత్రలు ఆమె కెరీర్‌లో మైలురాళ్లుగా నిలిచాయి. ప్రస్తుతం పవన్ కళ్యాణ్ నటిస్తున్న ప్రతిష్టాత్మక చిత్రం ‘హరిహర వీరమల్లు’లో కూడా అనసూయ ఒక ముఖ్యమైన పాత్రలో కనిపించనున్నారు.

    బహుముఖ ప్రజ్ఞ: యాంకరింగ్, నటన మరియు ఇతరాలు

    సినిమాలతో పాటు, అనసూయ షాపింగ్ మాల్స్ ప్రారంభోత్సవాలు వంటి కార్యక్రమాల్లో కూడా చురుగ్గా పాల్గొంటారు. ఎంబీఏ పూర్తిచేసిన ఈమె, కెరీర్ ఆరంభంలో హెచ్ఆర్ ఎగ్జిక్యూటివ్‌గా కూడా పనిచేశారు. తొలినాళ్లలో వచ్చిన సినిమా ఆఫర్లను తిరస్కరించి, న్యూస్ ప్రెజెంటర్‌గా, అలాగే ‘వేదం’, ‘పైసా’ వంటి సినిమాలకు డబ్బింగ్ ఆర్టిస్ట్‌గా కూడా తన ప్రతిభను చాటుకున్నారు.

    కుటుంబ జీవితం మరియు విజయాలు

    అనసూయ 2010లో సుశాంక్ భరద్వాజ్‌ను ప్రేమ వివాహం చేసుకున్నారు. ఈ దంపతులకు ఇద్దరు పిల్లలు (అయాన్ష్, శౌర్య). అటు కుటుంబ బాధ్యతలు నిర్వర్తిస్తూ, ఇటు కెరీర్‌లో దూసుకుపోతున్న అనసూయ, తన నటనకు గాను పలు అవార్డులను కూడా అందుకున్నారు. ఇప్పుడు సొంత ఇంటి కలను నెరవేర్చుకుని, జీవితంలో మరో విజయాన్ని సాధించారు.

    అనసూయ లగ్జరీ కారు మరియు రెమ్యునరేషన్

    టీవీ షోలలో యాంకరింగ్‌ చేస్తూ, సినిమాల్లో నటిస్తూ బిజీగా ఉండే అనసూయ భరద్వాజ్, 2016లో సుమారు రూ. 93 లక్షల విలువైన లగ్జరీ కారు ఆడి క్యూ 7 (Audi Q7) ను కొనుగోలు చేశారు. విశ్వసనీయ సమాచారం ప్రకారం, ఆమె ఒక్కో టీవీ షో ఎపిసోడ్‌కు సుమారు రూ. 1.2 లక్షల వరకు పారితోషికం తీసుకుంటున్నట్లు తెలుస్తోంది. అయితే, సినిమాలకు ఆమె అందుకునే రెమ్యునరేషన్ వివరాలు అధికారికంగా వెల్లడి కాలేదు.

  • టీటీడీ గొప్ప అవకాశం: VIP దర్శనం ఉచితంగా పొందండిలా..

    టీటీడీ గొప్ప అవకాశం: VIP దర్శనం ఉచితంగా పొందండిలా..

    TTD Govinda Koti Scheme: యువతలో రోజురోజుకి ఆధ్యాత్మిక చింతన కనుమరుగైపోతోంది. దీనిని మెరుగుపరచడానికి తిరుమల తిరుపతి దేవస్థానం (టీటీడీ) వారు వినూత్న పద్దతిని అమలులోకి తీసుకొచ్చారు. ఎవరైతే గోవింద కోటి రాస్తారో.. వారికి ఉచితంగా వీఐపీ దర్శనం కల్పిస్తారు. దీని గురించి మరిన్ని వివరాలు వివరంగా తెలుసుకుందాం.

    గోవింద కోటి అంటే ఏమిటి? TTD వినూత్న పథకం

    నిజానికి చాలామందికి రామకోటి మాత్రమే తెలుసు. ఈ తరహాలోనే టీటీడీ యాజమాన్యం గోవింద కోటి తీసుకొచ్చించి. ఈ పథకం ద్వారా యువతలో భక్తి భావాన్ని పెంపొందించడమే ముఖ్య ఉద్దేశ్యం.

    VIP దర్శనం పొందే విధానాలు:

    • కుటుంబంతో సహా VIP దర్శనం: 25 సంవత్సరాలు లేదా అంతకంటే తక్కువ వయసున్న యువత గోవింద కోటి (కోటిసార్లు గోవింద నామం) రాస్తారో.. అలాంటి వారికి, వారి ఫ్యామిలీతో సహా వీఐపీ దర్శనం చేసుకునే అవకాశం లభిస్తుంది.
    • వ్యక్తిగత VIP బ్రేక్ దర్శనం: ఎవరైనా 10,01,116 (పది లక్షల వెయ్యి నూట పదహారు) సార్లు గోవింద నామం రాస్తారో.. అలాంటి వారికి (రాసిన వ్యక్తికి మాత్రమే) వీఐపీ బ్రేక్ దర్శనం లభిస్తుంది.

    గోవింద కోటి పుస్తకాలు మరియు నియమాలు

    పుస్తకాలు ఎక్కడ లభిస్తాయి?

    గోవింద కోటి రాయాలనుకునే వారికోసం కావాల్సిన పుస్తకాలు.. టీటీడీ సమాచార కేంద్రాలు, పుస్తక విక్రయ కేంద్రాలు, టీటీడీ అధికారిక వెబ్‌సైట్ లేదా ఆన్‌లైన్‌లో లభిస్తాయి.

    పుస్తకాల వివరాలు మరియు పూర్తి చేయడానికి పట్టే సమయం:

    ఒక్కో పుస్తకంలో 200 పేజీలు ఉంటాయి. ఇలాంటి ఒక పుస్తకంలో 39,600 నామాలు రాయవచ్చు.

    • 10,01,116 నామాలు రాయడానికి సుమారు 26 పుస్తకాలు అవసరమవుతాయి. ఈ పుస్తకాలను రాయడానికి కనీసం మూడేళ్ల సమయం పడుతుంది.
    • కోటి నామాలు రాయడానికి 252 కంటే ఎక్కువ పుస్తకాలు కావాల్సి ఉంటుంది, దీనికి మరింత ఎక్కువ సమయం పడుతుంది.

    గోవిండ కోటి పూర్తి చేశాక VIP దర్శనం పొందడం ఎలా?

    ఎవరైతే గోవింద కోటి పూర్తి చేస్తారో.. అలాంటి వారు తాము రాసిన పుస్తకాలను తిరుమలలోని పేష్కార్ కార్యాలయంలో సమర్పిస్తే.. వారికి ఆ మరుసటిరోజే వీఐపీ దర్శనం చేసుకునే ఏర్పాటు చేస్తారు. ఈ విధంగా ఉచితంగానే శ్రీవారి వీఐపీ దర్శనం చేసుకోవచ్చు. ఈ అవకాశాన్ని లేదా పద్దతిని టీటీడీ యాజమాన్యం ఎప్పుడో ప్రవేశపెట్టింది.

    గోవింద కోటి ద్వారా లబ్ధి పొందిన వారు

    ఇప్పటి వరకు గోవింద కోటి రాసి ఉచిత వీఐపీ దర్శనం చేసుకున్నవారు కేవలం ముగ్గురు మాత్రమే అని తెలుస్తోంది. ఇందులో మొదటి వ్యక్తి బెంగళూరుకు చెందిన కీర్తన అనే యువతి. ఇంటర్ పూర్తిచేసిన ఈ యువతి 10,01,116 సార్లు గోవింద నామం రాసి టీటీడీ యాజమాన్యానికి సమర్పించింది. యాజమాన్యం ఈమెకు ఉచిత వీఐపీ బ్రేక్ దర్శనం కల్పించింది. ఆ తరువాత మరో ఇద్దరు యువత కూడా 10,01,116 సార్లు గోవింద నామం రాసి ఉచిత వీఐపీ దర్శనం చేసుకున్నట్లు సమాచారం.

    గోవింద కోటి వల్ల కలిగే ప్రయోజనాలు

    యువతలో ఆధ్యాత్మిక చింతన పెంపొందించడానికి టీటీడీ తీసుకున్న గొప్ప నిర్ణయం ఈ గోవింద కోటి. దీనివల్ల భక్తి భావం పెరుగుతుంది. తద్వారా మనసులో చెడు ఆలోచనలు తొలగిపోతాయి. ఏకాగ్రత పెరిగి, బాధ్యతాయుతమైన పౌరులుగా ఎదుగుతారు. ఇది కేవలం వారి కుటుంబానికి మాత్రమే కాకుండా.. సమాజానికి కూడా ఉపయోగపడుతుంది.