కోల్కతాలో జరిగిన బీజేపీ శాసనసభా పక్ష సమావేశంలో సువేందు అధికారి పశ్చిమ బెంగాల్ కొత్త ముఖ్యమంత్రిగా ఏకగ్రీవంగా ఎంపికయ్యారు. కేంద్ర హోం మంత్రి అమిత్ షా సమక్షంలో ఎమ్మెల్యేలు ఈ నిర్ణయం తీసుకున్నారు. శనివారం ఉదయం 11 గంటలకు సువేందు అధికారి ముఖ్యమంత్రిగా ప్రమాణ స్వీకారం చేయనున్నారు. దీంతో పశ్చిమ బెంగాల్లో తొలిసారిగా బీజేపీ ప్రభుత్వం అధికారంలోకి రానుంది.
పశ్చిమ బెంగాల్ రాజకీయాల్లో కీలక మలుపుగా భావిస్తున్న ఈ పరిణామం దేశవ్యాప్తంగా చర్చనీయాంశమైంది. నందిగ్రామ్, భవానిపూర్ నియోజకవర్గాల్లో విజయం సాధించిన సువేందు అధికారి, మమతా బెనర్జీపై సాధించిన రాజకీయ ఆధిపత్యంతో రాష్ట్ర రాజకీయాల్లో కొత్త అధ్యాయానికి శ్రీకారం చుట్టారు. ముఖ్యంగా భవానిపూర్లో మమతా బెనర్జీని ఓడించడం బీజేపీకి భారీ మానసిక బలం ఇచ్చింది.
సువేందు అధికారి సీఎం ఎంపికతో బెంగాల్లో రాజకీయ సమీకరణాలు పూర్తిగా మారిపోయాయి. ఇప్పటివరకు తృణమూల్ కాంగ్రెస్ ఆధిపత్యంలో కొనసాగిన రాష్ట్రంలో ఇప్పుడు బీజేపీ అధికారంలోకి రావడం జాతీయ రాజకీయాల్లో కూడా కీలక పరిణామంగా విశ్లేషిస్తున్నారు. గ్రామీణ స్థాయిలో బలమైన కేడర్ నిర్మాణం, ఉద్యమాల ద్వారా ప్రజల్లో ప్రభావం చూపగలిగిన నాయకుడిగా సువేందు అధికారి పేరు తెచ్చుకున్నారు.
బీజేపీ శాసనసభా పక్ష సమావేశంలో కీలక నిర్ణయం
కేంద్ర హోం మంత్రి అమిత్ షా శుక్రవారం కోల్కతాలో పర్యటించి కొత్తగా ఎన్నికైన బీజేపీ ఎమ్మెల్యేలతో సమావేశమయ్యారు. న్యూటౌన్లోని బిస్వ బంగ్లా కన్వెన్షన్ సెంటర్లో జరిగిన బీజేపీ శాసనసభా పక్ష సమావేశంలో సువేందు అధికారి పేరును ఎమ్మెల్యేలు ప్రతిపాదించగా, అందరూ ఏకగ్రీవంగా ఆమోదించారు.
పార్టీ వర్గాల సమాచారం ప్రకారం, సువేందు అధికారి ముఖ్యమంత్రిగా ప్రమాణ స్వీకారం చేయనుండగా ఇద్దరు మహిళలకు డిప్యూటీ సీఎం పదవులు ఇవ్వాలని కూడా నిర్ణయించినట్లు తెలుస్తోంది. ఈ నిర్ణయం ద్వారా మహిళా నాయకత్వానికి ప్రాధాన్యత ఇవ్వాలని బీజేపీ భావిస్తున్నట్లు రాజకీయ విశ్లేషకులు పేర్కొంటున్నారు. సువేందు అధికారి ప్రమాణ స్వీకార కార్యక్రమానికి జాతీయ స్థాయి బీజేపీ నేతలు హాజరయ్యే అవకాశం ఉంది. కోల్కతాలో ఇప్పటికే భద్రతా ఏర్పాట్లు కట్టుదిట్టం చేశారు. రాష్ట్ర రాజకీయాల్లో ఈ మార్పు నేపథ్యంలో అన్ని పార్టీల దృష్టి ఇప్పుడు బెంగాల్పైనే కేంద్రీకృతమైంది.
సువేందు అధికారి రాజకీయ ప్రయాణం
సువేందు అధికారి 1970 డిసెంబర్ 15న పూర్బ మెదినిపూర్ జిల్లాలోని కార్కులి గ్రామంలో జన్మించారు. ఆయన తండ్రి సిసిర్ అధికారి మాజీ యూనియన్ మంత్రి, ఎంపీగా పనిచేశారు. రాజకీయ కుటుంబ నేపథ్యం ఉన్నప్పటికీ, సువేందు అధికారి తనకంటూ ప్రత్యేక గుర్తింపు సంపాదించుకున్నారు.
1995లో కాంగ్రెస్ పార్టీ తరఫున కాంతి మునిసిపాలిటీ కౌన్సిలర్గా ఎన్నికై ఆయన రాజకీయ ప్రస్థానం ప్రారంభమైంది. అనంతరం 1998లో మమతా బెనర్జీ స్థాపించిన తృణమూల్ కాంగ్రెస్లో చేరారు. టీఎంసీలో యువనేతగా ఎదిగిన ఆయన 2006లో కాంతి దక్షిణ నియోజకవర్గం నుంచి ఎమ్మెల్యేగా విజయం సాధించారు. అదే సంవత్సరంలో కాంతి మునిసిపాలిటీ చైర్మన్గా కూడా బాధ్యతలు చేపట్టారు. పార్టీ నిర్మాణంలో కీలక పాత్ర పోషిస్తూ గ్రామీణ ప్రాంతాల్లో బలమైన కేడర్ను నిర్మించడంలో ఆయన సక్సెస్ అయ్యారు.
నందిగ్రామ్ ఉద్యమంతో జాతీయ గుర్తింపు
2007లో నందిగ్రామ్ భూసేకరణ వ్యతిరేక ఉద్యమం సువేందు అధికారి రాజకీయ జీవితంలో పెద్ద మలుపుగా మారింది. రైతుల భూములను స్వాధీనం చేసుకోవడంపై ప్రారంభమైన ఈ ఉద్యమానికి ఆయన నాయకత్వం వహించారు. ఈ ఉద్యమం ద్వారా తృణమూల్ కాంగ్రెస్కు రాష్ట్రవ్యాప్తంగా భారీ ప్రజాదరణ లభించింది.
నందిగ్రామ్ ఉద్యమం మమతా బెనర్జీ రాజకీయ ఎదుగుదలకు కూడా కీలకంగా మారింది. అయితే అదే ఉద్యమం ద్వారా సువేందు అధికారి కూడా ప్రజల్లో బలమైన నాయకుడిగా ఎదిగారు. గ్రామీణ ప్రాంతాల్లో ప్రజల సమస్యలపై పోరాడే నాయకుడిగా ఆయనకు మంచి గుర్తింపు వచ్చింది.
2009లో తమ్లుక్ లోక్సభ నియోజకవర్గం నుంచి ఎంపీగా గెలిచిన ఆయన, 2014లో మళ్లీ అదే స్థానం నుంచి విజయం సాధించారు. అనంతరం 2016లో నందిగ్రామ్ నుంచి ఎమ్మెల్యేగా గెలిచి మమతా బెనర్జీ మంత్రివర్గంలో రవాణా శాఖ మంత్రిగా బాధ్యతలు చేపట్టారు. 2018 నుంచి 2020 వరకు నీటి వనరులు, సాగు శాఖ మంత్రిగా కూడా పనిచేశారు. ప్రభుత్వంలో కీలక శాఖలను నిర్వహిస్తూ పరిపాలనలో తనదైన ముద్ర వేశారు.
టీఎంసీ నుంచి బీజేపీ వరకు
టీఎంసీలో కీలక నేతగా ఎదిగిన సువేందు అధికారి, 2020లో పార్టీతో విభేదాలు పెరగడంతో రాజీనామా చేశారు. ముఖ్యంగా అభిషేక్ బెనర్జీకి ప్రాధాన్యత పెరుగుతుండటంపై ఆయన అసంతృప్తి వ్యక్తం చేసినట్లు అప్పట్లో వార్తలు వచ్చాయి.
2020 డిసెంబర్ 19న అమిత్ షా సమక్షంలో ఆయన అధికారికంగా బీజేపీలో చేరారు. ఇది బెంగాల్ రాజకీయాల్లో సంచలనంగా మారింది. సువేందు అధికారి చేరికతో బీజేపీకి గ్రామీణ స్థాయిలో బలమైన నాయకత్వం లభించింది.
2021 అసెంబ్లీ ఎన్నికల్లో నందిగ్రామ్లో మమతా బెనర్జీని ఓడించడం ద్వారా ఆయన జాతీయ స్థాయిలో గుర్తింపు పొందారు. ఆ ఎన్నికల తర్వాత పశ్చిమ బెంగాల్ అసెంబ్లీలో ప్రతిపక్ష నేతగా బాధ్యతలు నిర్వహించారు.
2026 ఎన్నికల్లో మరోసారి నందిగ్రామ్తో పాటు భవానిపూర్లో కూడా విజయం సాధించారు. ముఖ్యంగా మమతా బెనర్జీని ఆమె బలమైన నియోజకవర్గంగా భావించిన భవానిపూర్లో ఓడించడం రాజకీయంగా కీలక ఘట్టంగా మారింది.
బెంగాల్లో బీజేపీకి కొత్త అధ్యాయం
సువేందు అధికారి ముఖ్యమంత్రిగా ఎంపిక కావడం ద్వారా పశ్చిమ బెంగాల్లో బీజేపీ కొత్త చరిత్ర సృష్టించింది. రాష్ట్రంలో బీజేపీకి చెందిన తొలి ముఖ్యమంత్రిగా ఆయన బాధ్యతలు చేపట్టనున్నారు. ఇది పార్టీకి రాజకీయంగా ఎంతో ప్రతిష్ఠాత్మకమైన విజయంగా భావిస్తున్నారు.
1967 తర్వాత ఒకే వ్యక్తి రెండు నియోజకవర్గాల్లో గెలిచి సిట్టింగ్ ముఖ్యమంత్రిని ఓడించిన అరుదైన ఘట్టంగా ఈ ఎన్నికలు నిలిచాయి. దీంతో సువేందు అధికారి పేరు దేశవ్యాప్తంగా చర్చకు వచ్చింది.
రాజకీయ విశ్లేషకుల అభిప్రాయం ప్రకారం, గ్రామీణ స్థాయిలో బలమైన పట్టున్న నాయకుడిగా సువేందు అధికారి బీజేపీకి దీర్ఘకాలిక ప్రయోజనం చేకూర్చే అవకాశం ఉంది. ముఖ్యంగా నందిగ్రామ్ ఉద్యమం నుంచి వచ్చిన నాయకుడిగా రైతు వర్గాల్లో కూడా ఆయనకు ప్రభావం ఉంది. పశ్చిమ బెంగాల్లో బీజేపీ ప్రభుత్వం అధికారంలోకి రావడం వల్ల రాష్ట్ర రాజకీయాలతో పాటు జాతీయ రాజకీయ సమీకరణాలపై కూడా ప్రభావం పడే అవకాశం ఉందని పరిశీలకులు భావిస్తున్నారు. ఇక కొత్త ప్రభుత్వం తీసుకునే నిర్ణయాలపై అందరి దృష్టి నిలిచింది.
Also Read:అకౌంట్లో బ్యాలెన్స్ లేకున్నా.. రూ.10,000 వరకు విత్డ్రా చేసుకోవచ్చిలా!!
గిరిబాబు – నేను MarthaTelugu వెబ్సైట్లో డిజిటల్ కంటెంట్ రైటర్గా పనిచేస్తున్నారు. శ్రీ వెంకటేశ్వర యూనివర్సిటీలో MA తెలుగు చేశారు. నాకు రైటర్గా మూడేళ్ల అనుభవం ఉంది. నాకు జాతీయ వార్తలు, బిజినెస్, ప్రత్యేక కథనాలు రాయడంలో ప్రావీణ్యం ఉంది. వార్తలు మాత్రమే కాకుండా పాటలు, కవితలు, షార్ట్ ఫిలిమ్స్ వంటివాటికి మాటలు రాసే అలవాటు ఉంది. సహజంగా జానపద, సినిమా పాటలు గాయకుణ్ణి.