Vijay CM Oath Ceremony: తమిళనాడులో టీవీకే అధినేత విజయ్ ప్రభుత్వ ఏర్పాటుకు మరో కీలక అడుగు పడింది. పూర్తి సంఖ్యాబలం సాధించిన అనంతరం గవర్నర్ రాజేంద్ర విశ్వనాథ్ ఆర్లేకర్ను విజయ్ శుక్రవారం కలిశారు. మద్దతు లేఖలను సమర్పించిన తర్వాత ఆయనకు ప్రభుత్వం ఏర్పాటు చేసే అవకాశాలు బలపడ్డాయి. ఈ నేపథ్యంలో చెన్నైలోని లోక్భవన్కు వచ్చిన విజయ్ కోసం ప్రత్యేక కాన్వాయ్ను ఏర్పాటు చేయాలని గవర్నర్ కార్యాలయం అధికారులకు ఆదేశాలు ఇవ్వడం రాజకీయ వర్గాల్లో చర్చనీయాంశమైంది.
ఇటీవల జరిగిన తమిళనాడు అసెంబ్లీ ఎన్నికల్లో విజయ్ నేతృత్వంలోని తమిళగ వెట్రి కళగం (టీవీకే) పార్టీ 108 సీట్లు గెలుచుకుని అతిపెద్ద పార్టీగా అవతరించింది. అయితే స్పష్టమైన మెజారిటీ లేకపోవడంతో ప్రభుత్వం ఏర్పాటు చేసేందుకు గవర్నర్ నుంచి తొలి దశలో ఆహ్వానం రాలేదు. రెండు మార్లు.. గవర్నర్ను కలిసినా సంఖ్యాబలం లేదన్న కారణంగా, ప్రభుత్వ ఏర్పాటుకు అనుమతి లభించలేదు.
ఇప్పుడు కాంగ్రెస్, లెఫ్ట్ పార్టీలతో పాటు వీసీకే మద్దతు ప్రకటించడంతో విజయ్కు అవసరమైన మెజారిటీ లభించింది. దీంతో రాజకీయ సమీకరణాలు ఒక్కసారిగా మారిపోయాయి. ముఖ్యమంత్రి హోదా లేకుండా.. కాన్వాయ్, జెడ్ ప్లస్ భద్రతపై అభ్యంతరం తెలిపిన గవర్నర్, ఇప్పుడు అదే విజయ్కు ప్రత్యేక ప్రోటోకాల్ కల్పించాలని ఆదేశించడం గమనార్హం.
కాన్వాయ్ వివాదం నుంచి గవర్నర్ ఆహ్వానం వరకు
విజయ్కు ముఖ్యమంత్రి హోదా లేకుండానే తమిళనాడు పోలీసు అధికారులు గతంలో ప్రత్యేక కాన్వాయ్ ఏర్పాటు చేయడం వివాదానికి దారితీసింది. ఈ అంశంపై గవర్నర్ రాజేంద్ర విశ్వనాథ్ ఆర్లేకర్ తీవ్ర అసంతృప్తి వ్యక్తం చేసినట్లు రాజకీయ వర్గాల్లో చర్చ జరిగింది. “ప్రభుత్వం ఏర్పాటు చేయకముందే రాచమర్యాదలు ఎందుకు?” అంటూ పోలీసు ఉన్నతాధికారులను గవర్నర్ ప్రశ్నించినట్లు సమాచారం. ముఖ్యమంత్రి కాని వ్యక్తికి అధికారిక ప్రోటోకాల్ ఎలా ఇస్తారన్న అంశంపై వివరణ కోరినట్లు తెలుస్తోంది.
ఈ పరిణామాల మధ్య గురువారం రాష్ట్ర శాంతిభద్రతలపై గవర్నర్తో చీఫ్ సెక్రటరీ సాయి కుమార్, డీజీపీ సందీప్ రాయ్ రాథోర్లు సమావేశమయ్యారు. ఈ సమావేశంలో విజయ్కు కల్పిస్తున్న జెడ్ ప్లస్ భద్రత అంశం కూడా చర్చకు వచ్చినట్లు సమాచారం. గవర్నర్ అభ్యంతరాల తర్వాత విజయ్కు ఇచ్చిన జెడ్ ప్లస్ భద్రతను తమిళనాడు పోలీసు శాఖ ఉపసంహరించుకుంది. దీంతో రాజకీయంగా ఈ వ్యవహారం మరింత వేడెక్కింది.
కాంగ్రెస్, లెఫ్ట్ మద్దతుతో మారిన రాజకీయ చిత్రం
శుక్రవారం పరిస్థితులు ఒక్కసారిగా మారాయి. కాంగ్రెస్ పార్టీ, లెఫ్ట్ పార్టీలు, వీసీకే విజయ్కు బహిరంగ మద్దతు ప్రకటించాయి. దీంతో టీవీకే ప్రభుత్వం ఏర్పాటు చేయడానికి అవసరమైన సంఖ్యాబలం దాదాపు ఖరారైంది.
వెంటనే విజయ్ గవర్నర్ను కలిసి మద్దతు లేఖలను సమర్పించారు. ప్రభుత్వ ఏర్పాటుకు ఆహ్వానించాలని అధికారికంగా కోరారు. ఈ సమావేశం అనంతరం రాజ్భవన్లో రాజకీయ చర్చలు వేగం పుంజుకున్నాయి. విజయ్కు మద్దతు ప్రకటించిన పార్టీల నిర్ణయం తమిళనాడు రాజకీయాల్లో కీలక మలుపుగా మారింది. ముఖ్యంగా డీఎంకే, ఏఐఏడీఎంకే వంటి సంప్రదాయ పార్టీల ఆధిపత్యం మధ్య టీవీకే ఎదుగుదల రాష్ట్ర రాజకీయాల్లో కొత్త సమీకరణాలకు దారి తీసింది.
గవర్నర్ ఆదేశాలతో ప్రత్యేక కాన్వాయ్
మద్దతు నిరూపించుకున్న తర్వాత విజయ్ చెన్నైలోని లోక్భవన్కు చేరుకున్నారు. ఈ సందర్భంగా గవర్నర్ ఆదేశాల మేరకు పోలీసు శాఖ ప్రత్యేక కాన్వాయ్ను సిద్ధం చేసింది. ఇదే అంశం ఇప్పుడు రాజకీయ వర్గాల్లో చర్చనీయాంశమైంది.
కొద్ది రోజుల క్రితం కాన్వాయ్ కల్పించడంపై అసంతృప్తి వ్యక్తం చేసిన గవర్నర్ కార్యాలయం, ఇప్పుడు అధికారిక ప్రోటోకాల్ కల్పించడం రాజకీయంగా ఆసక్తికర పరిణామంగా మారింది. విజయ్ లోక్భవన్ నుంచి తిరిగి వెళ్లేటప్పుడు కూడా అదే ప్రత్యేక కాన్వాయ్లో ప్రయాణించారు. దీంతో “పోగొట్టుకున్న చోటే వెతుక్కోవడం” అనే వ్యాఖ్యలు సోషల్ మీడియాలో వైరల్ అవుతున్నాయి.
రేపు విజయ్ ప్రమాణ స్వీకారం
తమిళనాడు కొత్త ముఖ్యమంత్రిగా విజయ్ శనివారం ఉదయం 11 గంటలకు ప్రమాణ స్వీకారం చేయనున్నారు. చెన్నైలోని నెహ్రూ ఇండోర్ స్టేడియంలో ఈ కార్యక్రమం జరగనుంది. రాష్ట్ర రాజకీయాల్లో ఇది చారిత్రాత్మక ఘట్టంగా భావిస్తున్నారు.
సినీ నటుడిగా కోట్లాది అభిమానులను సంపాదించిన విజయ్, ఇప్పుడు రాజకీయ నాయకుడిగా అధికార పీఠాన్ని అధిరోహించబోతున్నారు. టీవీకే పార్టీ స్థాపించిన కొద్ది కాలంలోనే అధికారానికి చేరువ కావడం రాజకీయంగా పెద్ద విజయంగా విశ్లేషిస్తున్నారు. మంత్రివర్గ ప్రమాణ స్వీకారం ఈ నెల 11 లేదా 12 తేదీల్లో జరగనున్నట్లు సమాచారం. కీలక శాఖల కేటాయింపుపై ఇప్పటికే పార్టీ లోపల చర్చలు ప్రారంభమైనట్లు తెలుస్తోంది.
తమిళనాడు రాజకీయాల్లో కొత్త దశ
విజయ్ ముఖ్యమంత్రిగా బాధ్యతలు చేపట్టబోతుండటంతో తమిళనాడు రాజకీయాల్లో కొత్త అధ్యాయం ప్రారంభమవుతోందని విశ్లేషకులు అభిప్రాయపడుతున్నారు. సంప్రదాయ పార్టీలకు భిన్నంగా యువత, మధ్యతరగతి వర్గాలను ఆకర్షించడంలో టీవీకే సక్సెస్ అయినట్లు ఎన్నికల ఫలితాలు సూచించాయి.
సినీ రంగం నుంచి రాజకీయాల్లోకి వచ్చిన నాయకుల ప్రభావం తమిళనాడులో కొత్త విషయం కాదు. ఎంజీఆర్, జయలలిత, కరుణానిధి తర్వాత ఇప్పుడు విజయ్ కూడా అదే జాబితాలో చేరబోతున్నారు. ప్రస్తుతం రాష్ట్ర ప్రజల దృష్టి మొత్తం విజయ్ ప్రభుత్వ తొలి నిర్ణయాలపైనే నిలిచింది. ఎన్నికల హామీల అమలు, సంక్షేమ పథకాలు, ఉద్యోగాల కల్పన వంటి అంశాలు కొత్త ప్రభుత్వానికి ప్రధాన సవాళ్లుగా మారనున్నాయి.
Also Read: ఎన్నికల్లో హవా: విజయ్ కార్ల గురించి తెలుసా?
ఉమశ్రీ – నేను MarthaTelugu వెబ్సైట్లో చీఫ్ ఎడిటర్గా పనిచేస్తున్నాను. నాకు ఆటోమొబైల్, లైఫ్ స్టైల్ విభాగాల్లో అత్యంత ప్రావీణ్యం కలిగి ఉంది. ఈ విభాగాల్లో యూజర్లకు అవసరమైన అన్ని వార్తలను సమగ్రంగా అందిస్తాను. నాకు జర్నలిజం రంగంలో 8 సంవత్సరాల అనుభవం ఉంది.